ກອງປະຊຸມລະດັບຊາດເພື່ອຜ່ານຮ່າງນະໂຍບາຍທີ່ດິນແຫ່ງຊາດ

         ໃນຕອນເຊົ້າວັນທີ 13 ກຸມພານີ້, ກະຊວງຊັບພະຍາ ກອນທຳມະຊາດ ແລະ ສິ່ງແວດລ້ອມ ໄດ້ຈັດກອງ ປະຊຸມ ຄະນະຊີ້ນຳລະດັບຊາດເພື່ອຜ່ານຮ່າງ ນະໂຍບາຍທີ່ດິນ ແຫ່ງຊາດຂຶ້ນທີ່ໂຮງແຮມລ້ານຊ້າງ ນະຄອນຫຼວງ ວຽງຈັນ ໂດຍການ​ເຂົ້າຮ່ວມຂອງທ່ານ ອາຊາງ ລາວລີ ຮອງນາຍົກ ລັດຖະມົນຕີ, ຜູ້ຊີ້ນຳຂົງ​ເຂດ​ວຽກ​ງານວັດ ທະນະທຳ-ສັງຄົມ, ພ້ອມ​ນັ້ນກໍ​ມີທ່ານ ນູລິນ ສິນບັນດິດ ລັດຖະມົນຕີວ່າການ ກະຊວງຊັບພະຍາກອນທຳມະ ຊາດ ແລະ ສິ່ງແວດລ້ອມ ແລະ ທ່ານ ດຣ ນາງ ສຸວັນເພັງ ບຸບຜານຸວົງ ປະທານຄະນະ ກຳມາທິການເສດ ຖະກິດ, ແຜນການ ແລະ ການເງິນສະພາ ແຫ່ງຊາດ, ມີບັນດາຫົວໜ້າກົມ, ຮອງຫົວໜ້າ, ພະນັກງານອ້ອມຂ້າງ ພາຍໃນກະຊວງເຂົ້າຮ່ວມ 40 ກວ່າທ່ານ.

           ​ໃນ​ກອງ​ປະຊຸມ, ຮອງ​ນາຍົກລັດຖະມົນຕີ ອາຊາງ ລາວລີ ​ໄດ້​ມີ​ຄຳ​ເຫັນວ່າ: ກອງປະຊຸມຄັ້ງນີ້ມີ ຄວາມສຳຄັນເປັນ ຢ່າງຍິ່ງທີ່ຈະໄດ້ຮັບຟັງການລາຍງານຄວາມຄືບໜ້າຂອງການຮ່າງນະໂຍບາຍທີ່ດິນແຫ່ງຊາດ ຕາມແນວທາງນະໂຍບາຍຂອງພັກ ໃນການຫັນຊັບພະຍາກອນດິນເປັນທຶນພ້ອມທັງຕີລາຄາສູງຕໍ່ຄວາມເອົາໃຈ ໃສ່ຂອງຄະນະພັກ, ຄະນະນຳກະຊວງ, ສະພາແຫ່ງ ຊາດລວມທັງຄະນະຄົ້ນຄວ້າສ້າງນະໂຍບາຍທີ່ດິນແຫ່ງ ຊາດທີ່ໄດ້ສຸມຈິດສຸມໃຈໃສ່ການສ້າງຮ່າງນະໂຍບາຍ ດັ່ງກ່າວສຳເລັດ

ໂດຍພື້ນຖານ ແລະ ຮຽກຮ້ອງໃຫ້ກອງ ປະ ຊຸມຄັ້ງນີ້ຈົ່ງຕັ້ງໜ້າຄົ້ນຄວ້າ, ປະກອບຄຳຄິດຄຳເຫັນໃຫ້ກວ້າງຂວາງ, ເລິກເຊິ່ງ ແລະ ສອດຄອງກັບຕົວ ຈິງເຂົ້າໃນການປັບປຸງເນື້ອໃນຂອງຮ່າງນະໂຍບາຍທີ່ດິນແຫ່ງຊາດກ່ອນຈະເຂົ້າຜ່ານກອງປະຊຸມລັດຖະບານ ແລະ ກອງປະຊຸມສະໄໝສາມັນຂອງສະພາແຫ່ງຊາດໃນເດືອນມິຖຸນາ 2013 ທີ່ຈະມາເຖິງນີ້.

          ທ່ານ ນູລິນ ສິນບັນດິດ ລັດຖະມົນຕີວ່າການກະຊວງຊັບພະຍາກອນທຳມະຊາດ ແລະ ສິ່ງ ແວດລ້ອມ (ກຊສ) ທັງເປັນປະທານຄະນະຊີ້ນຳໃນການສ້າງແຜນແມ່ບົດຈັດສັນການນຳໃຊ້ທີ່ດິນ ແລະ ນະໂຍບາຍທີ່ດິນ ແຫ່ງຊາດກ່າວວ່າ: ນັບແຕ່ໄດ້ຜ່ານກອງປະຊຸມລັດຖະບານປະຈຳເດືອນກໍລະກົດ 2012 ເປັນຕົ້ນມາ, ທາງຄະ ນະຮັບຜິດຊອບກໍໄດ້ທົບທວນນະໂຍບາຍທີ່ດິນແຫ່ງຊາດຂອງ ກຊສ ແລະ ສືບຕໍ່ຄົ້ນຄວ້າປັບປຸງຕາມ ຄຳເຫັນ ຂອງກອງປະຊຸມລັດຖະບານດັ່ງກ່າວຈົນເຮັດໃຫ້ການສ້າງຮ່າງນະໂຍບາຍທີ່ດິນແຫ່ງຊາດ​ໄດ້ສຳເລັດ ລົງໂດຍຂັ້ນ ພື້ນຖານ ແລະ ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມຄັ້ງນີ້ປະກອບຄຳຄິດຄຳເຫັນໃສ່ຮ່າງນະໂຍບາຍດັ່ງກ່າວ ທີ່ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມເປັນໃຈກາງໃນການຄົ້ນຄວ້າໂດຍການປະສານສົມ ທົບກັບບັນດາກະຊວງ ແລະ ຂະແໜງການທີ່ກ່ຽວຂ້ອງຢູ່ຂັ້ນສູນກາງ ແລະ ທ້ອງຖິ່ນນັ້ນໃຫ້ມີເນື້ອໃນຄົບ ຖ້ວນ, ສົມບູນ ແລະ ເລິກເຊິ່ງຂຶ້ນກວ່າເກົ່າ.