ຄະນະກຳມະການແຫ່ງຊາດຕ້ານ ແລະ ຄວບຄຸມພະຍາດຕິດຕໍ່ຫາລືການກຳຈັດພະຍາດໄຂ້ເລືອດອອກ

            ວັນທີ 15 ສິງຫານີ້, ຄະນະກຳມະການແຫ່ງຊາດຕ້ານ ແລະ ຄວມຄຸມ ພະຍາດຕິດຕໍ່ໄດ້ຈັດກອງປະຊຸມ ປຶກສາຫາລືການສະກັດກັ້ນ ແລະ ກຳຈັດພະຍາດ ໄຂ້ເລືອດອອກທີ່ຍັງສືບຕໍ່ລະບາດຮ້າຍແຮງໃນຂອບເຂດທົ່ວປະເທດຢູ່ນະຄອນ ຫຼວງວຽງຈັນ ພາຍໃຕ້ການເປັນປະທານຂອງທ່ານ ອາຊາງ ລາວລີ ຮອງນາຍົກ ລັດຖະມົນຕີ, ຜູ້ຊີ້ ນຳວຽກງານວັດທະນະທຳສັງຄົມ, ປະທານຄະນະກຳມະ ການແຫ່ງຊາດຕ້ານ ແລະ ຄວບຄຸມພະຍາດຕິດຕໍ່, ມີລັດຖະມົນຕີຈາກກະ ຊວງຕ່າງໆພ້ອມເຈົ້າຄອງນະຄອນຫຼວງວຽງຈັນ ແລະ ບັນດາເຈົ້າແຂວງທີ່ມີ ລະບາດຂອງພະ ຍາດໄຂ້ເລືອດອອກເຂົ້າຮ່ວມນຳດ້ວຍ .    

            ໃນກອງປະຊຸມໄດ້ຮັບຟັງການລາຍງານສະພາບການລະບາດຂອງພະ ຍາດໄຂ້ຍຸງໃນຂອບເຂດທົ່ວປະ ເທດຈາກຄະນະກຳມະການແຫ່ງຊາດ, ຍຸດທະສາດ ແລະ ມາດຕະການຄວບຄຸມ ແລະ ຄວາມຕ້ອງການອຸປະ ກອນຈຳເປັນໃນການສະກັດກັ້ນ ແລະ ຕ້ານການລະບາດຂອງພະຍາດດັ່ງກ່າວໃກ້ມີປະສິດທິຜົນ. ຈາກນັ້ນທ່ານ ຮອງນາຍົກລັດຖະມົນຕີ ອາຊາງ ລາວລີ ໄດ້ໃຫ້ການໂອ້ລົມ ແລະ ຊີ້ນຳບັນຫາສຳຄັນຕ່າງໆຂອງການເພີ່ມ ທະວີຕ້ານ ແລະ ຄວບຄຸມພະຍາດອັນຕະລາຍຮ້າຍແຮງນີ້ໂດຍທ່ານໄດ້ເນັ້ນວ່າ: ການລະບາດຂອງພະຍາດໄຂ້ ເລືອດອອກໄດ້ສົ່ງ

ຜົນໃຫ້ມີຄົນເຈັບ ແລະ ເສຍຊີວິດເປັນຈຳນວນຫຼາຍສົມຄວນຖ້າທຽບໃສ່ການລະບາດຫເມື່ອຫຼາຍປີຜ່ານມາ ແລະ ມັນເປັນການລະບາດຄັ້ງໃຫຍ່ ແລະ ຮຸນແຮງທີ່ບໍ່ເຄີຍມີມາຢູ່ລາວພວກເຮົາ. ດັ່ງນັ້ນການຈັດກອງປະຊຸມໃນມື້ນີ້ຈຶ່ງມີຄວາມ ຈຳເປັນຕ້ອງໄດ້ຊອກຫາປັດໃຈ ແລະ ເຫດຜົນຕ່າງໆທີ່ພາໃຫ້ມີການລະບາດແກ່ ຍາວ ແລະ ເຫດຜົນທີ່ພາໃຫ້ຜູ້ເສຍຊີວິດ ເປັນຈຳນວນຫຼາຍ ແລະ ກໍຕ້ອງຖອດຖອນບົດຮຽນໃຫ້ໄດ້ວ່າ: ອັນ ໃດທີ່ເຮັດໄດ້ ແລະ ອັນໃດຍັງຄ້າງຄາ ເຊັ່ນ: ດ້ານ ວິຊາການ, ວັດຖະອຸປະກອນ, ງົບປະມານ, ການປະກອບສ່ວນ ຂອງປະຊາຊົນ ແລະ ພັກ- ລັດ, ອຳນາດການປົກຄອງ. ເພື່ອ ເຮັດໃຫ້ການຕ້ານພະຍາດດັ່ງກ່າວໄດ້ຮັບຜົນ ແລະ ນັບແຕ່ນີ້ ໄປຕ້ອງໄດ້ກະກຽມ, ກຳນົດຍຸດທະສາດ, ແຜນຕອບໂຕ້ພະຍາດທີ່ເກີດຂື້ນໃໝ່ໃຫ້ມີປະສິດທິຜົນ ກວ່າເກົ່າເພື່ອເຮັດໃຫ້ສະພາບການລະບາດຂອງພະຍາດດັ່ງກ່າວມີຄວາມສະຫງົບ ແລະ ປົກກະຕິໂດຍໄວ.   

          ກອງປະຊຸຸມຍັງໄດ້ຮັບຟັງການປະກອບຄຳຄິດເຫັນຈາກພາກສ່ວນກ່ຽວຂ້ອງຕ່າງໆໂດຍໄດ້ລົງເລິກ ຄວາມຕ້ອງການວັດຖຸອຸປະກອນອັນຈຳເປັນທີ່ຈະຕ້ອງລົງທຶນໃສ່ເພື່ອຮັບປະກັນໃຫ້ແກ່ການປ້ອງກັນ, ການ ບົ່ງມະຕິ ແລະ ການປິ່ນປົວຜູ້ເປັນພະຍາດໄຂ້ຍຸງລາຍຢູ່ຂັ້ນສຸກສາລາ, ເຂດຫ່າງໄກສອກຫຼີກພ້ອມເບິ່ງຄືນປັດ ໄຈຕ່າງໆທີ່ອຳນວຍຄວາມສະດວກໃຫ້ແກ່ການປ້ອງກັນ ແລະ ປິ່ນປົວໃຫ້ຮັບປະກັນ ແລະ ມີຄຸນນະພາບດີຂຶ້ນ ກວ່າເກົ່າ.