ເສັ້ນທາງທ່ານາແລ້ງ-ຊຽງຄວນ ເປ່ເພໜັກໜ່ວງຂະນະທີ່ການສ້ອມແປງຖາວອນຄວາມຫວັງຍັງໄກ

          ເສັ້ນທາງເລກ 11 ໃຕ້ ນັບແຕ່ຂົວມິດຕະພາບວຽງຈັນ-ໜອງຄາຍໄປຕໍ່ໃສ່ ເສັ້ນທາງເມືອງປາກງື່ມ, ນະຄອນຫລວງວຽງຈັນ. ມີຄວາມຍາວ 20 ກວ່າກິໂລ ແມັດ, ແມ່ນເສັ້ນທາງຍຸດທະສາດສຳຄັນໜຶ່ງຂອງຊາດ, ຖືເປັນເສັ້ນທາງສາຍເລືອດ ຫລັກຮັບໃຊ້ໃຫ້ແກ່ການຄົມມານາຄົມຂົນສົ່ງສີນຄ້າພຶດຜົນການຜະລິດຕ່າງໆຂອງ ປະຊາຊົນ ແລະ ການຂົນສົ່ງສີນຄ້າຕາມຊາຍແດນຈາກເຂດຊານເມືອງເຂົ້າສູ່ຕົ ວເມືອງ, ແຕ່ມາຮອດປັດຈຸບັນເສັ້ນທາງສາຍນີ້ ໄດ້ຊຸດໂຊມລົງຫລາຍໂດຍສະເພາະໃນ ຍ່ານແຕ່ຂົວ ມິດຕະພາບຫາແຫລ່ງທ່ອງທ່ຽວວັດທະນາ ທຳຊຽງຄວນມີຄວາມຍາວປະມານ 10 ກວ່າກິໂລແມັດ, ເກີດສະພາບ ເປ່ເພໜັກໜ່ວງ, ບາງຈຸດເປັນຂຸມເລິກສ້າງຄວາມຫຍຸ້ງ ຍາກລຳບາກຕໍ່ການສັນຈອນບໍ່ໜ້ອຍ.

       ທ່ານ ຈັນທະລາ ອິນທະລັງສີ ເຈົ້າເມືອງຫາດຊາຍຟອງ ໃຫ້ສຳພາດຕໍ່ນັກຂ່າວໜັງສືພີມລາວພັດທະນາ ເມື່ອບໍ່ດົນນີ້ວ່າ: ເສັ້ນທາງດັ່ງກ່າວ ເກີດການເປ່ເພແກ່ຍາວມາເປັນເວລາດົນນານແລ້ວ, ຕົ້ນຕໍແມ່ນຍ້ອນມີລົດແກ່ແຮ່-ຊາຍ, ລົດບັນທຸກສີນຄ້າ

ແລ່ນຜ່ານໄປມາເປັນຈຳນວນຫລາຍໃນແຕ່ລະວັນ ແລະ ໃນໄລຍະລະດູຝົນການສັນຈອນຍິ່ງພົບຄວາມຫຍຸ້ງຍາກທີ່ສຸດ, ເຖິງວ່າ ໃນໄລຍະຜ່ານມາການສ້ອມແປງເສັ້ນທາງດັ່ງກ່າວ ແມ່ນໄດ້ປະຕິບັດມາຫລາຍຄັ້ງແຕ່ກໍເປັນການຊົ່ວຄາວເທົ່ານັ້ນ ເພື່ອໃຫ້ສາ ມາດທ່ຽວໄປມາໄດ້ເທົ່ານັ້ນໂດຍການອຸປະຖຳຊ່ວຍເຫລືອຂອງປະຊາຊົນ, ຫ້າງຮ້ານຫົວໜ່ວຍທຸລະກິດ ແລະ ຜູ້ປະກອບການ ດູດແຮ່-ຊາຍ, ແຕ່ກໍບໍ່ສາມາດຮັບປະກັນການນຳໃຊ້ໄດ້ໃນໄລຍະຍາວຈຶ່ງກັບຄືນມາຕົກຢູ່ໃນສະພາບເປເພຄືດັ່ງກ່າວ.

            ທ່ານເຈົ້າເມືອງຫາດຊາຍຟອງ ກ່າວວ່າ: ຜ່ານມາ ເຄີຍສະເໜີຕໍ່ພະແນກໂຍທາທິການ ແລະ ຂົ່ນສົ່ງ ນະຄອນຫລວງ ວຽງຈັນ ແລະ ພາກສ່ວນກ່ຽວຂ້ອງອື່ນໆຫລາຍຄັ້ງເພື່ອຊ່ວຍປົວແປງໃຫ້ໄດ້ມາດຕະຖານ, ແຕ່ກໍໄດ້ຮັບຄຳຕອບພຽງວ່າຍັງບໍ່ມີ ງົບປະມານ ແລະ ເມື່ອບໍ່ດົນມານີ້ ທ່ານຮອງປະທານປະເທດ ບຸນຍັງ ວໍລະຈິດ ກໍໄດ້ລົງໄປຢ້ຽມຢາມເມືອງຫາດຊາຍຟອງ ແລະ ໄດ້ແນະນຳໃຫ້ຄະນະນຳນະຄອນຫລວງວຽງຈັນ ຄົ້ນຄວ້າໃນການແກ້ໄຂບັນຫາເສັ້ນທາງດັ່ງກ່າວໃຫ້ຮັບປະກັນການສັນຈອນ ໄປມາສະດວກ, ໂດຍພາກສ່ວນ ຮັບພິຊອບຂັ້ນເມືອງໄດ້ປະເມີນການສຳຫລວດສ້ອມແປງຊົ່ວຄາວກ່ອນລະດູຝົນ ນີ້ໃຫ້ນະ ຄອນຫລວງວຽງຈັນແລ້ວມີມູນຄ່າປະມານ 660 ລ້ານກວ່າກີບ ແລະ ໃນໄລຍະລໍຖ້າງົບປະມານທີ່ສະເໜີໄປນັ້ນທາງເມືອງໄດ້ ປຸກລະດົມຂໍການຊ່ວຍເຫລືອຮອບໃໝ່ນຳຫົວໜ່ວຍທຸລະກິດແຮ່-ຊາຍ ຈຳນວນໜຶ່ງ ແລະ ນຳປະຊສຊົນບ້ານລະ 1 ລ້ານກີບ ເພື່ອສ້ອມແປງໃນຈຸດທີ່ມີການເປ່ເພໜັກໃຫ້ສາມາດທ່ຽວໄປມາໄດ້ດີຂຶ້ນ.