ກອງປະຊຸມຜູ້ບັນຊາການກອງທັບອາກາດອາຊຽນຄັ້ງທີ 10 ໄຂຂຶ້ນຢູ່ນະຄອນຫລວງວຽງຈັນ

           ກອງປະຊຸມຜູ້ບັນຊາການກອງທັບອາກາດອາຊຽນຄັ້ງທີ 10 ຫລື AACC ທີ່ ສປປ ລາວ ໄດ້ຮັບກຽດ ເປັນເຈົ້າພາບ ໄດ້ໄຂຂຶ້ນ ຢ່າງເປັນທາງການໃນຕອນເຊົ້າ ວັນທີ 3 ພະຈິກ 2013 ນີ້ຢູ່ໂຮງ ແຮມດອນຈັນພາເລດ ນະຄອນຫລວງວຽງຈັນ ພາຍໃຕ້ຄຳຂວັນ  “ຄູ່ຮ່ວມມືເພື່ອສັນຕິພາບ ແລະ ການພັດທະນາ” ໂດຍການ ເປັນ ປະທານ ຂອງທ່ານ ພັນເອກ ຄຳພັດ ພິມມະຫາໄຊ ຫົວໜ້າກົມທະຫານອາກາດກະ ຊວງປ້ອງກັນປະເທດ ສປປ ລາວ, ມີຜູ້ ບັນຊາການກອງທັບອາກາດຂອງບັນດາປະເທດສະມາຊິກອາຊຽນພ້ອມດ້ວຍຄະນະ ເຂົ້າຮ່ວມເພື່ອແລກປ່ຽນຄວາມ ຄິດເຫັນ, ປະສົບການ ແລະ ບົດຮຽນຕົວຈິງໃນການຊ່ວຍເຫລືອດ້ານມະນຸດສະທຳ ແລະ ບັນເທົາທຸກໄພພິບັດ, ທັງປຶກສາຫາລືເອກະສານແມ່ບົດຂອງກອງທັບອາກາດລາວໃນການສ້າງຕັ້ງຫລັກການພື້ນຖານໃນການ ຮ່ວມມືຂອງ ກອງທັບອາກາດອາຊຽນດ້ານການຊ່ວຍເຫລືອມະນຸດສະທຳ ແລະ ບັນເທົາທຸກໄພພິບັດ.          

           

       ທ່ານ ພົນຕີ ຈັນສະໝອນ ຈັນຍາລາດ ລັດຖະມົນຕີຊ່ວຍວ່າການກະຊວງປ້ອງກັນປະເທດໄດ້ມີຄໍາເຫັນຕໍ່ ກອງປະຊຸມຄັ້ງ ນີ້ວ່າ: “ການເປັນເຈົ້າພາບກອງປະຊຸມຜູ້ບັນຊາການກອງທັບອາກາດອາຊຽນ ຄັ້ງທີ 10 ໄດ້ສະແດງ ເຖິງການ ປະຕິບັດສິດ ແລະ ພັນທະໃນການ ເປັນສະມາຊິກອາຊຽນຂອງ ສປປ ລາວ, ທັງເປັນການເພີ່ມທະວີ ຄວາມເຂົ້າອົກເຂົ້າໃຈ, ເຊື່ອໝັ້ນ ແລະ ໄວ້ າງໃຈກັນພາຍໃນກອງທັບອາກາດອາຊຽນໄປສູ່ຄຸນນະພາບໃໝ່ເພື່ອຮັບ ມືກັບສິ່ງທ້າທາຍຕ່າງໆ, ສົ່ງເສີມສັນຕິພາບ ແລະ ການພັດທະນາເພື່ອຜົນປະໂຫຍດລວມຂອງອາຊຽນ ແລະ ເພື່ອ ບັນລຸເປົ້າໝາຍໃນການສ້າງປະຊາຄົມອາຊຽນທີ່ປະກອບ ດ້ວຍ 3 ເສົາຄ້ຳຄື: ປະຊາຄົມການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ, ເຊິ່ງເປັນປະຊາຄົມທີ່ມີວິໄສ ທັດອັນໜຶ່ງອັນດຽວກັນໃຫ້ປະກົດຜົນເປັນ ຈິງໃນປີ 2015.                     

           ຕໍ່ການພົວພັນ ແລະ ຮ່ວມມືດ້ານວຽກງານປ້ອງກັນຊາດ ແລະ ຄວາມໝັ້ນຄົງລະຫວ່າງ ສປປ ລາວ ກັບ ປະເທດໃກ້ຄຽງແມ່ນໄດ້ສ້າງຕັ້ງຄະນະກຳມະການຮ່ວມມືໃນການຮັກສາຄວາມສະຫງົບ ແລະ ຄວາມເປັນລະບຽບ ຮຽບຮ້ອຍຕາມຊາຍແດນນຳກັນ. ຄະນະກຳມະການດັ່ງກ່າວໄດ້ມີການພົບປະ, ປຶກສາຫາລື ແລະ ແລກປ່ຽນຂໍ້ມູນ ຂ່າວສານກັນຢ່າງເປັນປົກກະຕິ ເພື່ອແນໃສ່ຈຳກັດ ແລະ ສະກັດກັ້ນການເຄື່ອນໄຫວທີ່ຜິດກົດໝາຍໂດຍສະເພາະ ແມ່ນອາດສະຍາກຳຂ້າມຊາດ, ການຄ້າມະນຸດ, ການຄ້າຂາຍຢາເສບຕິດ, ການຟອກເງິນ, ການຄ້າຂາຍເຖື່ອນ ແລະ ອື່ນໆເພື່ອແນໃສ່ສ້າງຊາຍແດນໃຫ້ກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມືເພື່ອການພັດ ທະນາຢ່າງແທ້ຈິງ”.                         

       ກອງປະຊຸມຄັ້ງນີ້, ໄດ້ເຫັນດີຕໍ່ຂໍ້ສະເໜີຂອງກອງທັບອາກາດລາວໃນການສ້າງຕັ້ງຫລັກການພື້ນຖານໃນການ ຮ່ວມມືຂອງກອງທັບອາກາດອາຊຽນ, ດ້ານການຊ່ວຍເຫລືອມະນຸດສະທຳ ແລະ ບັນເທົາທຸກໄພພິບັດແຕ່ຈະຕ້ອງ ປຶກສາຫາລືກັນລະອຽດຕື່ມ, ຈຶ່ງເຫັນດີສືບຕໍ່ຫາລືໃນກອງປະຊຸມຜູ້ບັນຊາການກອງທັບອາກາດອາຊຽນຄັ້ງທີ 11 ເຊິ່ງ ຈະຈັດຂຶ້ນຢູ່ປະເທດມຽນມາ ໃນປີ 2014; ກອງປະຊຸມຍັງໄດ້ຮັບຮອງເອົາເອກະສານແມ່ບົດກ່ຽວກັບບົດບາດ ແລະ ໜ້າທີ່ຂອງໜ່ວຍງານວິຊາການດ້ານການສຶກສາ ແລະ ເຝິກອົບຮົມຂອງກອງທັບອາກາດມາເລເຊຍທີ່ລິເລີ່ມມາແຕ່ ກອງປະຊຸມ AAC ຄັ້ງທີ 9; ໄດ້ມີການລົງນາມບົດບັນທຶກກອງປະຊຸມ ແລະ ມອບໂອນໃຫ້ກອງທັບອາກາດສາທາ ລະນະລັດສະຫະພາບມຽນມາເປັນເຈົ້າພາບຈັດກອງປະຊຸມຜູ້ບັນຊາການກອງທັບອາກາດຄັ້ງທີ 11 ປີ 2014.                    

          ກອງປະຊຸມຜູ້ບັນຊາການກອງທັບອາກາດອາຊຽນຈັດຂຶ້ນທຳອິດຢູ່ບາງກອກປະເທດໄທ ໃນປີ 2004 ແລະ ສືບຕໍ່ຈັດຂຶ້ນທຸກໆປີໃນບັນດາປະເທດສະມາຊິກອາຊຽນເພື່ອສົ່ງເສີມຄວາມເຊື່ອໝັ້ນ, ຄວາມໄວ້ເນື້ອເຊື່ອໃຈ ກັນ, ການຮ່ວມມືອັນໃກ້ຊິດເພື່ອຮັບມືກັບສິ່ງທ້າທາຍຕໍ່ຄວາມໝັ້ນຄົງ, ປະກອບສ່ວນເຂົ້າໃນການປົກປັກຮັກສາ ສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນກໍຄືການປະກອບສ່ວນເຂົ້າໃນການສ້າງປະຊາຄົມອາ ຊຽນໃນປີ 2015 ໃຫ້ປະກົດເປັນຈິງ.