ລາວເວດດິງແຟ 2016 ໄດ້ຮັບຄວາມສົນໃຈຈາກມວນຊົນບໍ່ໜ້ອຍ

          ວັນທີ 29 ຕຸລາຜ່ານມານີ້, ສູນການຄ້າວຽງຈັນ ເຊັນເຕີ ຮ່ວມກັບ ວາລະສານວິວາ, ຈັດງານລາວເວດດິ້ງແຟ 2016 (Wedding Fare 2016), ຂຶ້ນທີ່ສູນການຄ້າວຽງຈັນ ເຊັນເຕີ ພາຍໃຕ້ຫົວຂໍ້: ຄົບເຄື່ອງເລື່ອງງານແຕ່ງ, ໂດຍໄດ້ລວບລວມເອົາບັນດາເຄື່ອງປະກອບໃນງານດອງຕາມຮີດຄອງລາວ ມາວາງສະແດງໃນພື້ນທີ່ຊັ້ນລຸ່ມຂອງສູນການຄ້າດັ່ງກ່າວ, ຊຶ່ງປະກອບມີ: ຊຸດຜ້າໄໝລາວສຳລັບເຈົ້າບ່າວ-ເຈົ້າສາວ, ຍາດພີ່ນ້ອງ ແລະ ໝູ່ເພື່ອນ ຈາກຮ້ານຜ້າໄໝທີ່ມີຊື່ສຽງຂອງລາວ, ຮ້ານເສີມຄວາມງາມໃຫ້ເຈົ້າບ່າວ-ເຈົ້າສາວທີ່ດີທີ່ສຸດ, ຊຸດພາຂວັນ ໝາກເບັງໃຫຍ່ອາລັງການ ທີ່ເປັນເອກກະລັກຂອງພິທີບາສີສູ່ຂວັນ,

ພ້ອມທັງ ຂັນໝາກ-ຂັນພູ ຕາມສະບັບດັ່ງເດີມ, ດອກໄມ້ເອ້ປະດັບພາຍໃນງານແຕ່ງດອງ, ເຄັກແຊບຈາກຮ້ານທີ່ມີຊື່ສຽງ, ຊຸດບ່ອນນອນທີ່ນຸ່ມແບບໜ້າສຳພັດ, ເຟີນີເຈີຕົບແຕ່ງເຮືອນຫໍ, ບັດເຊີນ ແລະ ຂອງທີ່ລະນຶກທີ່ທັນສະໄໝ ປະສົມກັບຄວາມເປັນລາວ, ພ້ອມທັງເຄື່ອງປະດັບສຳລັບງານດ້ວຍຈາກຮ້ານຄຳພູວົງ.

          ເພື່ອເຮັດໃຫ້ງານແຕ່ງດອງຂອງແຕ່ລະຄູ່ບ່າວສາວ ອອກມາສົມບູນແບບດີຂຶ້ນ, ພາຍໃນງານ ຍັງໄດ້ຈັດພິທີແຕ່ງດອງແບບຈຳລອງ, ໂດຍເລີ່ມຈາກພິທີແຫ່ເຂີຍ, ບາສີສູ່ຂວັນບ່າວສາວ, ພ້ອມເຈົ້າໂຄດລຸງຕາ, ມັດຂໍ້ຕໍ່ແຂນ ແລະ ເຕັ້ນບັດສະຫລົບ ໃຫ້ຄ້າຍຄືກັບການແຕ່ງດອງຕົວຈິງ, ນອກນີ້ ຍັງໄດ້ມີການຍ່າງໂຊຊຸດຜ້າໄໝລາວ, ຊຸດສາກົນ ແລະ ອື່ນໆທີ່ສາມາດນຳໄປເປັນແບບເພື່ອນຳໃຊ້ເຂົ້າໃນງານແຕ່ງດອງຕົວຈິງໄດ້, ຊຶ່ງງານດັ່ງກ່າວ ມັນໄດ້ສ້າງຄວາມປະທັບໃຈໃຫ້ຜູ້ເຂົ້າຮ່ວມຊົມບໍ່ໜ້ອຍ, ເພື່ອເປັນການສົ່ງເສີມ ແລະ ອະນຸລັກຮີດຄອງລາວໄວ້ໃຫ້ຍືນຍົງ.

ອຳນວຍການສູນການຄ້າ ວຽງຈັນເຊັນເຕີ ກ່າວວ່າ: ວັດທະນະທຳຂອງລາວເຮົານັ້ນ ເປັນເອກກະລັກສະເພາະ, ມີຮີດ 12 ຄອງ 14, ທີ່ເດັ່ນກວ່າໝູ່ແມ່ນປະເພນີແຕ່ງດອງ, ຊຶ່ງມັນມີມາແຕ່ບູຮານນະການ, ທີ່ໄດ້ສືບທອດກັນມາຢ່າງມີຄວາມໝາຍສຳຄັນຍິ່ງ ເພື່ອບົ່ງບອກເຖິງຄວາມເປັນລາວຫລາຍທີ່ສຸດ, ຍ້ອນການນຸ່ງຖືຂອງເຈົ້າພາບ ແລະ ແຂກທີ່ເຂົ້າຮ່ວມງານ, ຊຶ່ງທຸກຄົນແມ່ນນຸ່ງສິ້ນໄໝ, ໃສ່ຜ້າບ່ຽງ, ເກົ້າຜົມ ແລະ ອື່ນໆທີ່ເປັນເອກກະລັກຂອງລາວ, ສະນັ້ນ ນັບແຕ່ມື້ອອກພັນສາເປັນຕົ້ນໄປ ເປັນເລີກງາມຍາມດີທີ່ຄູ່ບ່າວສາວ ລວມເຖິງຍາດພີ່ນ້ອງ, ເຈົ້າໂຄດລຸງຕາ ໄດ້ມີການຫ້າງຫາກະກຽມເພື່ອເຮັດໃຫ້ງານຂອງຕົນ ອອກມາເປັນທີ່ປະທັບໃຈ ດັ່ງນັ້ນ ທາງສູນການຄ້າວຽງຈັນ ເຊັນເຕີ ໄດ້ຈັດງານດັ່ງກ່າວຂຶ້ນເພື່ອສົ່ງເສີມ ແລະ ຮັກສາຮີດຄອງປະເພນີຂອງລາວໄວ້ ໃຫ້ລູກຫລານຜູ້ເກີດໃໝ່ໃຫຍ່ລຸນ  ບໍ່ໃຫ້ໄປຫລົງໄຫລກັບຮີດຄອງປະເພນີແບບໃໝ່ເກີນໄປ ຈົນລືມຮີດຄອງປະເພນີລາວເຮົາທີ່ມີມາແຕ່ບູຮານນະການ.