ກອງປະຊຸມປະຈໍາປີ 2013-2014 ຂອງຂະແໜງອຸດສາຫະກໍາ ແລະ ການຄ້າ

ວັນທີ 12 ມີນານີ້ ກະຊວງອຸດສາຫະກໍາ ແລະ ການຄ້າ, ໄດ້ຈັດກອງປະ ຊຸມປະຈໍາປີ 2013-2014 ຂອງຕົນຂຶ້ນ, ໂດຍການເຂົ້າຮ່ວມຂອງ ທ່ານ ສົມສະ ຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນໍາວຽກງານຂົງເຂດການຜະລິດ ແລະ ຈໍລະຈອນ, ຜູ້ຊີ້ນໍາວຽກງານຂົງເຂດອຸດສາຫະກໍາ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກໍາ ແລະ ການຄ້າ ແລະ ພ້ອມດ້ວຍພະນັກງານກ່ຽວຂ້ອງເຂົ້າຮ່ວມເປັນຈໍານວນຫຼາຍ.

ກອງປະຊຸມຈະໄດ້ທົບທວນຄືນບັນດາວຽກງານທີ່ພົ້ນເດັ່ນທີ່ປະຕິບັດໃນໄລຍະຜ່ານມາໂດຍສະເພາະບັນດາຄາດໝາຍ-ແຜນການຕ່າງໆທີ່ໄດ້ກໍານົດໄວ້ໃນແຜນພັດທະນາ 5 ປີ ຜ່ານມາ ກໍຄືແຜນການປະຈໍາສົກປີ 2013-2014 ຂອງຂະແໜງການ ແລະ ສຸມໃສ່ຄົ້ນຄ້ວາປະກອບຄໍາເຫັນຕໍ່ເອກະ ສານສໍາຄັນຈໍານວນໜຶ່ງ ເຊັ່ນ: ຮ່າງວິໄສທັດຮອດປີ 2030, ຍຸດທະສາດຮອດປີ 2025, ແຜນພັດທະນາ 5 ປີ ຄັ້ງທີ VIII  (2016-2020), ນະໂຍບາຍຕ່າງໆເພື່ອປະຕິບັດໂຄງການຄໍ້າປະກັນສະບຽງອາຫານຂອງລັດຖະບານ ແລະ ສົ່ງເສີມການຜະ ລິດເປັນສິນຄ້າຂອງປະຊາຊົນ. ພ້ອມນັ້ນຍັງຈະໄດ້ປຶກສາຫາລືເພື່ອຊອກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ, ບັນຫາ,

ສິ່ງທ້າທາຍ ແລະ ວິທີແກ້ໄຂຕໍ່ການປະຕິບັດພາລະບົດບາດຄຸ້ມຄອງມະຫາພາກຂອງຂະແໜງການດັ່ງກ່າວເຊັ່ນ: ບັນຫາ ການປັບປຸງ ແລະ ດັດສົມໂຮງງານປຸງແຕ່ງໄມ໊, ການຂຶ້ນທະບຽນວິສາຫະກິດ, ການຄຸ້ມ ຄອງສິນຄ້າທີ່ກະທົບໄວ, ການນໍາ ເຂົ້າພາຫະນະ,​ ໂກຕາສົ່ງອອກສິນຄ້າ ແລະ ອື່ນໆເພື່ອແນໃສ່ສ້າງຄວາມເປັນເອກະພາບທາງດ້ານທັດສະນະ, ແກ້ໄຂບັນຫາ ຫຍໍ້ທໍ້ທາງດ້ານນິຕິກໍາໃຫ້ເຂັ້ມງວດ ແລະ ແກ້ໄຂບັນຫາຊ່ອງຫວ່າງຕ່າງໆທີ່ເກີດຂຶ້ນໃນສັງຄົມ.

ໃນໂອກາດນີ້ ທ່ານ ຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ກໍໄດ້ໃຫ້ກຽດໂອ້ລົມຕໍ່ກອງປະ ຊຸມ, ໂດຍໄດ້ສະແດງຄວາມຊົມເຊີຍຕໍ່ຜົນງານທີ່ຂະແໜງອຸດສາຫະກໍາ ແລະ ການຄ້າຍາດມາໄດ້ໃນປີຜ່ານມາ ພ້ອມທັງເນັ້ນ ໃຫ້ເພີ່ມທະວີຄວາມເອົາໃຈໃສ່ຢ່າງຕັ້ງໜ້າຊ່ວຍເຫຼືອສະໜັບສະໜູນພາກທຸລະກິດ ແລະ ຜູ້ປະກອບການໃນການກຽມ ຄວາມພ້ອມເຂົ້າສູ່ການສ້າງປະຊາຄົມເສດຖະກິດອາຊຽນໃນທ້າຍປີ 2015 ຕາມທິດສ້າງຕະຫຼາດ, ຖານການຜະລິດອັນ ດຽວໃນອາຊຽນ ແລະ ໃນຕໍ່ໜ້ານີ້ຕ້ອງເຮັດໃຫ້ການຜະລິດຕິດພັນກັບຕະຫຼາດຂອງພາກພຶ້ນ ໃນຕ່ອງໂສ້ການສະໜອງ ຫຼື ການສ້າງມູນຄ່າໃຫ້ມີທ່າແຮງເຊິ່ງເປັນການແບ່ງງານຂອງພາກພື້ນ.