ຖອດຖອນບົດຮຽນການເກັບກຳ ແລະ ລາຍງານຂໍ້ມູນເຝົ້າລະວັງພະຍາດຢູ່ໂຮງໝໍໃຫຍ່ຕ່າງໆ

ໃນວັນທີ 12 ມີນານີ້, ພະແນກສາທາລະນະສຸກນະຄອນຫຼວງວຽງຈັນ ໄດ້ຈັດກອງປະຊຸມຖອດຖອນບົດ ຮຽນການເກັບກຳຂໍ້ມູນເຝົ້າລະວັງພະ ຍາດຢູບັນດາໂຮງໝໍສູນກາງໃນສົກປີ 2013-2014 , ເພື່ອເປັນ ການທົບທວນ ບັນດາກິດຈະການເຝົ້າລະວັງປະຍາດທີ່ໄດ້ຈັດຕັ້ງປະຕິບັດໃນໄລຍະຜ່ານມາ, ທັງເປັນການຜັນ ຂະຫຍາຍໃຫ້ມີປະ ສິດທິພາບ, ເປັນລະບົບຕໍ່ເນື່ອງ ແລະ ເປັນການສ້າງຄວາມເອກະພາບໃນການເກັບກຳຂໍ້ມູນຕ່າງໆທາງດ້ານສະຖິຕິ ແລະຕົວເລກການເຝົ້າລະວັງຂອງແຕ່ລະໂຮງໝໍສູນກາງໃຫ້ເປັນເອກະພາບ, ທັງເປັນການປຸກລະດົມການມີສ່ວນ ຮ່ວມຂອງບຸກຄົນ ແລະ ອົງການຈັດຕັ້ງທີ່ກ່ຽວຂ້ອງ.

ຫົວໜ້າຂະແໜງລະບາດວິທະຍາ, ພະແນກສາທາລະນະສຸກນະຄອນຫຼວງກ່າວໃນກອງປະຊຸມວ່າ: ການ ລາຍ ງານຂໍ້ມູນເຝົ້າລະວັງພະຍາດຂອງບັນດາໂຮງໝໍສູນກາງຕໍ່ໜ່ວຍງານເຝົ້າລະວັງພະຍາດແມ່ນມີຄວາມຈຳເປັນ ຫຼາຍໃນການເຕືອນໃຫ້ປະຊົນຊົນຮັບຮູ້ ແລະ ປ້ອງກັນພະຍາດຕິດຕໍ່ທີ່ເກີດຂຶ້ນ ແລະ ເພື່ອສາມາດຕອບ ໂຕ້ກັບພະ ຍາດຕິດຕໍ່ທີ່ເກີດຂື້ນໄດ້ທັນເວລາ, ເພາະວ່າ 70% ຂອງຄົນເຈັບແມ່ນເຂົ້າມາປິ່ນປົວຢູ່ໂຮງໝໍສູນກາງ, ຊຶ່ງຜ່ານຈາກ

ການຈັດຕັ້ງປະຕິບັດວຽກງນເຝົ້າລະວັງຢູ່ບັນດາໂຮງໝໍດັ່ງກ່າວ ໃນໄລຍະຜ່ານມາ ຖືວ່າປະຕິບັດໄດ້ດີພໍສົມຄວນ, ໂດຍສະເພາະແມ່ນໂຮງໝໍມະໂຫສົດ, ເສດຖາທິລາດແລະໂຮງໝໍ່ແມ່ ແລະ ເດັກ, ສ່ວນໂຮງໝໍອື່ນແມ່ນຍັງປະຕິບັດ ບໍ່ໄດ້ດີເທົ່າທີ່ຄວນ, ອັນເນື່ອງມາຈາກຄວາມຫຍຸ້ງຍາກທາງດ້ານບຸກຄະລາກອນ, ອຸປະກອນ ແລະ ງົບປະມານ ແລະ ໃນກອງປະຊຸມຄັ້ງນີ້ຈະໄດ້ຮ່ວມເປັນປຶກສາຫາລືເພື່ອຫາວິທີ່ແກ້ໄຂຂໍ້ຄົງຄ້າງ ເຫຼົ່ານັ້ນ, ເພື່ອເຮັດໃຫ້ວຽກງານເຝົ້າລະ ວັງຢູ່ບັນດາໂຮງໝໍສູນກາງມີປະສິດທິພາບ ແລະ ເປັນເອກະພາບກັນ ນັບທັງດ້ານປະລິມານ ແລະ ຄຸນນະພາບ, ສາມາດນຳໄປໃຊ້ໃນການວາງແຜນຍຸດທະສາດທາງດ້ານການພັດທະນາລະບົບສາທາລະນະສຸກໃຫ້ມີຄວາມຍືນຍົງ ແລະ ແທດເໝາະກັບຕົວຈິງ, ເປັນຕົ້ນແມ່ນການຈັດຕັ້ງປະຕິ ບັດແບບມີສ່ວນຮ່ວມ ແລະ ເອກະພາບໃນການ ນຳໃຊ້ງົບປະມານ ແລະ ທ່າແຮງຂອງແຕ່ລະພາກສ່ວນໃຫ້ມີຄວາມເໝາະສົມ.