ພາຍໃຕ້ການນຳພາຂອງພັກກຳລັງປ້ອງກັນຄວາມສະຫງົບເຕີບໃຫຍ່ເຂັ້ມແຂງຮອບດ້ານ

      ໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 60 ປີ (22 ມີນາ 1955-22 ມີນາ 2015) ແລະ ວັນ ສ້າງຕັ້ງກຳລັງປ້ອງກັນຄວາມສະຫງົບຄົບຮອບ 54 ປີ, ທ່ານພົນຈັດຕະວາ ສົມແກ້ວ ສີລາວົງ ກຳມະການສູນກາງພັກ, ຮັກສາການ ລັດຖະມົນຕີວ່າການກະຊວງປ້ອງກັນຄວາມສະຫງົບ, ໄດ້ໃຫ້ສຳພາດຕໍ່ນັກຂ່າວ ພວກເຮົາໃນວັນທີ 9 ເມສານີ້ ວ່າ: ຄືດັ່ງພວກເຮົາຮູ້ນຳກັນວ່າ: ນັບເປັນເວລາຫລາຍ ຮ້ອຍປີທີ່ປະຊາຊົນລາວບັນດາເຜົ່າໄດ້ຖືກພວກຈັກກະພັດ ຕ່າງດ້າວ ເຂົ້າມາຮຸກຮານ ກົດຂີ່ຂູດຮີດ ແລະ ທໍລະມານຢ່າງໜັກໜ່ວງຈົນອົດບໍ່ລົນທົນບໍ່ໄຫວ, ຈຶ່ງໄດ້ພ້ອມ ກັນລຸກຂຶ້ນຕໍ່ສູ້ຢ່າງຕໍ່ ເນື່ອງຂອງຫລາຍຂະບວນການ, ຫລາຍຍຸກ, ຫລາຍສະໄໝ, ແຕ່ກໍບໍ່ໄດ້ຮັບໄຊຊະນະ, ຍ້ອນການຕໍ່ສູ້ໃນ ໄລຍະນັ້ນບໍ່ທັນ ມີພັກນຳພາ, ບໍ່ມີແນວທາງອັນຖືກຕ້ອງຈຶ່ງຖືກປະລາໄຊ.

ແຕ່ພາຍຫລັງພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນໃນປີ 1955 ເຊິ່ງພັກໄດ້ມີແນວທາງອັນຖືກຕ້ອງ ແລະ ສະຫລາດສ່ອງໄສໃນການນຳພາປະຊາຊົນລາວບັນດາເຜົ່າຕໍ່ສູ້ຢ່າງພິລະອາດຫານ ແລະ ມີໄຫວພິບ,ຈຶ່ງສາມາດຍາດ ໄດ້ໄຊຊະ ນະຢ່າງຕໍ່ເນື່ອງຈາກໄຊຊະນະນີ້ໄປສູ່ໄຊຊະນະໃໝ່ໃຫຍ່ຫລວງກວ່າເກົ່າ ແລະ ສາມາດປົດປ່ອຍປະເທດຊາດ ໄດ້ຢ່າງສົມບູນ ໃນປີ 1975.

     ທ່ານຜູ້ຮັກສາການລັດຖະມົນຕີວ່າການກະຊວງປ້ອງກັນຄວາມສະຫງົບ ກ່າວວ່າ: ຕະຫລອດໄລຍະຜ່ານ

ມາ, ກຳລັງປ້ອງກັນຄວາມສະຫງົບພວກເຮົາ, ກໍໄດ້ເສີມຂະຫຍາຍທາດແທ້ມູນເຊື້ອອັນດີງາມຂອງກຳລັງປະ

ກອບອາວຸດທີ່ມີພັກເປັນຜູ້ນຳພາ, ຍາມໃດກຳລັງພວກເຮົາກໍມີຄວາມໃກ້ຊິດຕິດແທດ ແລະ ໄດ້ຮັບການອູ້ມຊູຊ່ວຍ ເຫລືອຈາກປະຊາຊົນໃນການປະຕິບັດໜ້າທີ່ວຽກງານ, ຜ່ານຜ່າຄວາມຫຍຸ້ງຍາກການທົດສອບທ້າທາຍຕ່າງໆ ແລະ ຕອບຕ້ານຕີເອົາຊະນະສັດຕູຜູ້ທີ່ມີກຳລັງແຮງເໜືອກວ່າຫລາຍເທົ່າ. ໃນແນວຮົບປ້ອງກັນຄວາມສະຫງົບ, ກຳລັງປະ ຕິວັດຜູ້ໜູ່ມນ້ອຍຂອງພວກເຮົາໄດ້ປະສານສົມທົບການປະຕິບັດແນວທາງພາລະກິດຂອງພັກ ແລະປະຊາຊົນມອບໝາຍ ໃຫ້ໃນການກໍ່ສ້າງກຳລັງໃຫ້ເຕີບໃຫຍ່ຂະຫຍາຍຕົວນັບທັງດ້ານປະລິມານ ແລະ ຄຸນນະພາບ, ສ້າງຕົນເອງໃຫ້ກາຍເປັນກຳ ລັງປະຕິວັດທີ່ມີການຈັດຕັ້ງເຂັ້ມແຂງ, ມີວິຊາສະເພາະ ແລະ ແບບແຜນທັນສະໄໝ, ສູ້ຮົບເດັດດ່ຽວອາດຫານ, ປະກອບ ສ່ວນຢ່າງສົມກຽດເຂົ້າໃນໄຊຊະນະ ລວມຂອງພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ແລະ ເພື່ອຄວາມເປັນເອກະ ລາດມາໃຫ້ປະເທດຊາດ ແລະ ຄວາມຢູ່ເຢັນເປັນສຸກມາໃຫ້ປະຊາຊົນລາວບັນດາເຜົ່າ ແລະ ຕະຫລອດ 54 ປີຜ່ານມາ, ກຳລັງປ້ອງກັນຄວາມສະຫງົບໄດ້ຮັບການປັບປຸງ ແລະ ກໍ່ສ້າງໃຫ້ເຕີບໃຫຍ່ຂະຫຍາຍຕົວຮອບດ້ານ, ໄດ້ກາຍເປັນກຳລັງ

ຫລັກໃນການປະຕິບັດແນວທາງ ປກຊ-ປກສ ຮອບດ້ານຂອງພັກ, ເຮັດສຳເລັດໜ້າທີ່ການເມືອງທີ່ພັກ ແລະ ລັດ ແລະ ປະຊາຊົນມອບໝາຍໃຫ້, ຮັບປະກັນເຮັດໃຫ້ປະເທດຊາດມີຄວາມສະຫງົບທາງດ້ານການເມືອງ, ສັງຄົມມີຄວາມເປັນ ລະບຽບຮຽບຮ້ອຍໂດຍພື້ນຖານ, ເຮັດໃຫ້ບົດບາດອິດທິພົນຂອງປະເທດເຮົາພົ້ນເດັ່ນໃນເວທີພາກພື້ນ ແລະ ສາກົນ.

      ຜູ້ຮັກສາການລັດຖະມົນຕີວ່າການກະຊວງປ້ອງກັນຄວາມສະຫງົບ ກ່າວວ່າ: ເມື່ອຫວນຄືນຜ່ານມາ, ກຳລັງປ້ອງກັນ ຄວາມສະຫງົບພວກເຮົາສາມາດຍາດໄດ້ຜົນງານ ແລະ ມີຜົນສຳເລັດໃຫຍ່ຫລວງເປັນປະຫວັດສາດນັ້ນ, ແມ່ນຍ້ອນມີ ການນຳພາອັນຖືກຕ້ອງສ່ອງໃສຂອງພັກ ແລະ ຍ້ອນຄວາມຕັດສີນໃຈສູງຂອງພະນັກງານ-ນັກຮົບໃນການປະຕິບັດໜ້າ ທີ່, ຍາມໃດກໍເສີມຂະຫຍາຍມູນເຊື້ອຕໍ່ສູ້ອັນເດັດດ່ຽວອາດຫານບໍ່ຍອມຈຳນົນ, ເຖິງວ່າຫຍຸ້ງຍາກພຽງໃດກໍພ້ອມກັນບຸກ, ທຸກປານໃດກໍພ້ອມກັນສູ້ ແລະ ກ້າເສຍສະຫລະໂດຍບໍ່ຢ້ານກົວຕໍ່ສັດຕູ ແລະ ອຸປະສັກນາໆປະການ, ຍາມໃດກຳລັງ ພວກເຮົາກໍຈົ່ງຮັກພັກດີຕໍ່ພັກ ແລະ ລັດ ແລະ ປະເທດຊາດ ເພື່ອຕອບສະໜອງໜ້າທີ່ການເມືອງຂອງພັກໃນແຕ່ລະໄລ ຍະ ແລະ ໄດ້ຮັບການເອົາໃຈໃສ່ເບິ່ງແຍງ, ຖະໜອມຫອມຮັກ ແລະ ອູ້ມຊູຊ່ວຍເຫລືອຈາກປະຊາຊົນລາວບັນດາເຜົ່າ, ພ້ອມນັ້ນກໍຍ້ອນໄດ້ຮັບການຮ່ວມມື ແລະ ສະໜັບສະໜູນຈາກບັນດາປະເທດເພື່ອນມິດ ແລະ ສາກົນ, ຈົນມີຫລາຍປະ ເທດໄດ້ໃຫ້ການຍ້ອງຍໍຊົມເຊີຍວ່າ ສປປ ລາວ ເປັນປະເທດທີ່ມີເສດຖະກິດ, ການຄ້າ, ການລົງທຶນຂະຫຍາຍຕົວໄວ ແລະ ເປັນປະເທດທີ່ໜ້າທ່ອງທ່ຽວທີ່ສຸດໃນໂລກໃນຫລາຍປີຜ່ານມາ, ເຊິ່ງທັງໝົດນັ້ນກໍເປັນຜົນມາຈາກປະເທດເຮົາມີ

ຄວາມສະຫງົບປອດໄພດີ ແລະ ໃນຕໍ່ໜ້ານີ້, ສປປ ລາວ ຈະໄດ້ມີການເຊື່ອມໂຍງກັບພາກພື້ນຫລາຍກວ່າເກົ່າ, ໂດຍສະ ເພາະການເຂົ້າສູ່ປະຊາຄົມອາຊຽນໃນທ້າຍປີ 2015, ຍິ່ງມີຄວາມຈຳເປັນຕ້ອງໄດ້ມີການປັບປຸງກຳລັງໃຫ້ເຂັ້ມແຂງ ແລະ ທັນສະໄໝ, ເພື່ອຮັບປະກັນຄວາມສະຫງົບປອດໄພໃຫ້ສູງກວ່າເກົ່າ, ທັງເປັນການປະກອບສ່ວນດຶງດູດການລົງທຶນ, ການທ່ອງທ່ຽວຢູ່ປະເທດເຮົານັບມື້ເພີ່ມຂຶ້ນ ແລະ ໃນນາມເປັນກຳມະການສູນກາງພັກກໍຄືສະມາຊິກພັກປະຊາຊົນປະ ຕິວັດລາວຜູ້ໜຶ່ງມີຄວາມຮູ້ສຶກພາກພູມໃຈທີ່ຕົນເອງໄດ້ກຳເນີດເກີດຂຶ້ນຢູ່ໃນແປວໄຟປະຕິວັດ, ອັນໄດ້ມີໂອກາດປະ ກອບສ່ວນດ້ານເຫື່ອແຮງ, ສະຕິປັນຍາ ເຂົ້າໃນພາລະກິດລວມໃນການປົກປັກຮັກສາ ແລະ ສ້າງສາປະເທດຊາດ, ພ້ອມທັງຮຽກຮ້ອງໃຫ້ສະມາຊິກພັກ, ພະນັກງານ-ນັກຮົມໃນທົ່ວກຳລັງປ້ອງກັນຄວາມສະຫງົບທຸກທົ່ວໜ້າຈົ່ງອອກ ແຮງແຂງຂັນຝຶກຝົນຫລໍ່ຫລອມຕົນເອງທຸກດ້ານເພື່ອໃຫ້ກາຍເປັນສະມາຊິກພັກ, ພະນັກງານ ແລະ ນັກຮົບຜູ້ດີເດັ່ນ ຂອງພັກຢ່າງແທ້ຈິງ ແລະ ໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 60 ປີ ແລະ ວັນສ້າງຕັ້ງກຳລັງ ປ້ອງກັນຄວາມສະຫງົບຄົບຮອບ 54 ປີ, ກໍຄືບຸນປີໃໝ່ລາວ ພສ 2558 ທີ່ໝູນວຽນມາເຖິງນີ້, ຂ້າພະເຈົ້າຂໍອວຍ ພອນໄຊອັນປະເສີດມາຍັງບັນດາການນຳພັກ-ລັດ ແລະ ພະນັກງານ-ນັກຮົບ ໃນທົ່ວປະເທດຈົ່ງມີສຸຂະພາບແຂງແຮງ, ພ້ອມກັນກ້າວຂຶ້ນຍາດໄດ້ຜົນສຳເລັດໃໝ່ໃຫຍ່ຫລວງກວ່າເກົ່າ.