laophatthananewspaper: ສຳມະນາກ່ຽວກັບການສົ່ງເສີມການລົງທຶນ-ການຄ້າ ແລະ ການທ່ອງທ່ຽວ ຂອງນະຄອນໂຮ່ຈີມິງ ເຂົ້າມາລາວ

ໃນວັນທີ 07 ເມສານີ້, ຢູ່ໂຮງແຮມດອນຈັນພາເລດ ນະຄອນຫລວງວຽງຈັນ ໄດ້ຈັດງານວາງສະແດງ ແລະ ສຳມະນາ ໃນຫົວຂໍ້ “ ສົ່ງເສີມການລົງທຶນ-ການຄ້າ-ການທ່ອງທ່ຽວ ຂອງນະຄອນໂຮ່ຈີມິງ ເຂົ້າມາລາວ ” ຂຶ້ນໂດຍໃຫ້ກຽດເປັນປະທານຂອງ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະ ກິດການຜະລິດ ແລະ ຈໍລະຈອນ, ທັງເປັນປະທານຄະນະກຳມາທິການຮ່ວມມື ລາວ-ຫວຽດນາມ ແລະ ທ່ານ ເລແທງຫ້າຍ ສະມາຊິກສະພາ, ເລຂາຄະນະພັກນະຄອນໂຮ່ຈີມິງ ເຊິ່ງມີບັນດາຜູ້ແທນຂອງສອງຝ່າຍ, ການນຳນະ ຄອນຫຼວງວຽງຈັນ ແລະ ນັກທຸລະກິດ ລາວ-ຫວຽດນາມ ເຂົ້າຮ່ວມເປັນຈຳນວນຫລາຍ.

ການຈັດງານຄັ້ງນີ້ ແມ່ນເພື່ອເປັນການເສີມຂະຫຍາຍສາຍພົວພັນການຮ່ວມມືຮອບດ້ານ ແລະ ຄວາມສາມັກ ຄີພິເສດ ລະຫວ່າງສອງຊາດ ລາວ-ຫວຽດນາມ ໃຫ້ນັບມື້ນັບແໜ້ນແຟ້ນຂຶ້ນ ເວົ້າສະເພາະເພື່ອຊຸກຍູ້ສົ່ງເສີມການຮ່ວມມືທາງດ້ານທຸລະກິດຂອງສອງປະເທດ ໄດ້ມີການແລກປ່ຽນດ້ານຂໍ້ມູນຂ່າວສານ, ຜະລິດຕະພັນ, ຊອກຮູ້ບັນດາໂຄງການຮ່ວມມື, ສ້າງຄູ່ຮ່ວມທຸລະກິດ, ເສີມຂະຫຍາຍທ່າແຮງບົ່ມຊ້ອນຢູ່ແຕ່ລະທ້ອງຖິ່ນຂອງລາວ, ສ້າງໂອກາດໃຫ້ແກ່ການລົງທຶນຂອງນັກທຸລະກິດຫວຽດນາມຢູ່ລາວ ແລະ ການລົງທຶນຂອງນັກທຸລະກິດລາວຢູ່ຫວຽດ ນາມ. ໃນກອງປະຊຸມໄດ້ມີການສະເໜີພາບລວມ, ສິ່ງແວດລ້ອມ, ເງື່ອນໄຂ ແລະ ທິດທາງນະໂຍບາຍການລົງທຶນ-ການຄ້າ ຢູ່ ສປປ ລາວ; ສະເໜີບັນດາໂຄງການທີ່ເປັນທ່າແຮງການລົງທຶນຢູ່ນະຄອນຫຼວງວຽງຈັນ; ການລົງທຶນໃນເຂດອຸດສາຫະກຳຂອງລາວ ແລະ ສະເໜີທ່າແຮງອື່ນໆ ໃນບາງທ້ອງຖິ່ນຂອງລາວ. ພ້ອມນີ້, ຍັງມີສິນຄ້າຂອງຫວຽດ ນາມຫຼາຍກວ່າ 40 ຫົວໜ່ວຍທຸລະກິດ ມາວາງສະແດງອີກດ້ວຍ.

ໂອກາດນີ້, ທ່ານ ສົມສະຫວາດ ເລັ່ງສະຫວັດ ໄດ້ກ່າວວ່າ: ປັດຈຸບັນ, ສອງປະເທດພວກເຮົາພວມພ້ອມກັນດຳເນີນພາລະກິດປ່ຽນແປງໃໝ່, ລາວ ແລະ ຫວຽດນາມ ກໍລ້ວນແຕ່ເປັນສະມາຊິກຂອງອາຊຽນ ແລະ ອົງການການຄ້າໂລກ. ເມື່ອບໍ່ດົນມານີ້ ການນຳຂອງສອງພັກ ໄດ້ຈັດກອງປະຊຸມພົບປະປະຈຳປີ 2014 ຊຶ່ງໄດ້ໃຫ້ທິດຊີ້ນຳ ໃນການເພີ່ມທະວີການຮ່ວມມືຮອບດ້ານລະຫວ່າງສອງປະເທດ ລາວ-ຫວຽດນາມ ແລະ ຫວັງຢ່າງຍິ່ງວ່າ ກອງປະ ຊຸມສຳມະນາເທື່ອນີ້ ບັນດານັກທຸລະກິດຂອງລາວເຮົາ ຈະຖືເອົາໂອກາດນີ້ ຊອກຮູ້ຂໍ້ມູນທີ່ຈຳເປັນ ເພື່ອຊຸກຍູ້ການຮ່ວມມືທາງດ້ານເສດຖະກິດ-ການຄ້າ ແລະ ການທ່ອງທ່ຽວ ຂອງນະຄອນໂຮ່ຈີມິງ ກັບ ສປປ ລາວ ເຊິ່ງນະຄອນໂຮ່ຈີມິງ ກໍເປັນນະຄອນໜຶ່ງ ທີ່ນຳໜ້າຂອງຫວຽດນາມທາງດ້ານເສດຖະກິດ, ມີທ່າແຮງໃນຫຼາຍໆດ້ານ ຈຶ່ງສະເໜີໃຫ້ບັນດາຫົວໜ່ວຍທຸລະກິດຂອງລາວຮ່ວມກັນປຶກສາຫາລືເຖິງຄວາມເປັນໄປໄດ້ໃນການຮ່ວມມືເຊິ່ງກັນ ແລະ ກັນ ລວມທັງສ້າງເງື່ອນໄຂອຳນວຍຄວາມສະດວກໃຫ້ນັກທຸລະກິດນະຄອນໂຮ່ຈີມິງ ເຂົ້າມາລົງທຶນຢູ່ລາວ. ພ້ອມກັນນັ້ນ, ກໍ່ຮຽກຮ້ອງໃຫ້ວິສາຫະກິດຂອງລາວ ບຸກບືນຂຶ້ນ ເພື່ອໄປລົງທຶນຢູ່ນະຄອນໂຮ່ຈີ່ມິນໃຫ້ຫຼາຍຂຶ້ນກວ່າເກົ່າ; ໃນຕອນທ້າຍ, ທ່ານຮອງນາຍົກລັດຖະມົນຕີ ຍັງໄດ້ແຈ້ງໃຫ້ຊາບວ່າກົມການເມືອງສູນກາງພັກຂອງສອງພັກ ກໍຄືລັດ ຖະບານຂອງສອງປະເທດ ລາວ-ຫວຽດນາມ ໄດ້ເປັນເອກະພາບກັນ ໃນການຊຸກຍູ້ການຄ້າຂອງສອງຝ່າຍໃຫ້ບັນລຸມູນຄ່າ 2 ຕື້ໂດລາສະຫະລັດ ໃນປີ 2015 ແລະ ຍັງຫວັງວ່າ ເຖິງປີ 2020 ການຄ້າລະຫວ່າງສອງປະເທດ ຈະເພີ່ມຂຶ້ນເປັນ 10 ຕື້ໂດລາ ແລະ ເພື່ອບັນລຸໄດ້ເປົ້າໝາຍດັ່ງກ່າວນັ້ນ ພວກເຮົາຕ້ອງໄດ້ຍຶດໝັ້ນໃນແນວທາງ ແລະ ການຊີ້ນຳຂອງສອງພັກ ພ້ອມກັນຊອກຫາທຸກວິທີເພື່ອຊຸກຍູ້ການຄ້າ-ການລົງທຶນນຳກັນ.