ກອງປະຊຸມໃຫຍ່ຄັ້ງທີ II ຂອງອົງຄະນະພັກກະຊວງພະລັງງານ ແລະ ບໍ່ແຮ່

ກອງປະຊຸມໃຫຍ່ຄັ້ງທີ II ຂອງອົງຄະນະພັກກະຊວງພະລັງງານ ແລະ ບໍ່ແຮ່ ໄດ້ໄຂຂຶ້ນຢ່າງເປັນທາງການໃນວັນທີ 6-7 ເມສານີ້, ຢູ່ສຳນັກງານໃຫຍ່ລັດ ວິສາຫະກິດໄຟຟ້າລາວ, ນະຄອນຫລວງວຽງຈັນ, ໂດຍໃຫ້ກຽດເຂົ້າຮ່ວມຂອງ ສະຫາຍ ຈັນສີ ໂພສີຄຳ ເລຂາທິການສູນກາງ, ຫົວໜ້າຈັດຕັ້ງສູນກາງພັກ, ມີບັນ ດາສະຫາຍຄະນະພັກ, ສະມາຊິກພັກອ້ອມຂ້າງກະຊວງດັ່ງກ່າວເຂົ້າຮ່ວມ ຢ່າງ ພ້ອມພຽງ.

    ສະຫາຍເລຂາຄະນະພັກ, ລັດຖະມົນຕີວ່າການກະຊວງພະລັງງານ ແລະ ບໍ່ແຮ່ ດຣ ສຸລິວົງ ດາລາວົງ ໄດ້ຂຶ້ນຜ່ານຮ່າງລາຍ ງານການເມືອງວ່າ: ອົງຄະນະພັກກະຊວງພະລັງງານ ແລະ ບໍ່ແຮ່, ແມ່ນໜຶ່ງໃນການຈັດຕັ້ງພັກ, ມີບົດບາດໃນການຊີ້ນຳ- ນຳພາກະຊວງພະລັງງານ ແລະ ບໍ່ແຮ່ ເຮັດໜ້າທີ່ເປັນເສນາທິການໃຫ້ແກ່ລັດຖະບານກ່ຽວກັບວຽກງານພະລັງງານ ແລະ ບໍ່ແຮ່ ເພື່ອດຳເນີນການຄຸ້ມຄອງການຜະລິດພະລັງງານ ແລະ ຂຸດຄົ້ນແຮ່ທາດ, ປະກອບສ່ວນສຳຄັນເຂົ້າໃນການ ຈັດຕັ້ງຜັນຂະ ຫຍາຍມະຕິກອງປະຊຸມໃຫຍ່ຄັ້ງທີ IX ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VII

ເປັນຕົ້ນແມ່ນການຈັດຕັ້ງປະຕິບັດແນວທາງຫັນເປັນອຸດສະຫະກຳ ແລະ ທັນສະໄໝ ແລະ ແຜນຍຸດທະສາດການພັດທະ ນາວຽກງານພະລັງງານ ແລະ ບໍ່ແຮ່ຢູ່ລາວແຕ່ນີ້ຮອດປີ 2020 ສ້າງປະຖົມປັດ​ໄຈໃຫ້ແກ່ການພັດທະນາເສດຖະກິດ-ສັງຄົມ ເພື່ອນຳເອົາປະເທດຊາດກ້າວຂຶ້ນສູ່ຈຸດໝາຍສັງຄົມນິຍົມ. ປັດຈຸບັນອົງຄະນະພັກກະຊວງປະກອບມີ 2 ຄະນະພັກຮາກຖານ, ມີ 23 ໜ່ວຍພັກຂຶ້ນກັບ ແລະ 10 ໜ່ວຍພັກເອກກະລາດ, ມີສະມາຊິກພັກທັງໝົດ 599 ສະຫາຍ. ນັບແຕ່ໄລຍະປີ 2011-2015 ຄະນະພັກໄດ້ຖືເອົາວຽກງານການນຳພາແນວຄິດການເມືອງໃຫ້ສະມາຊິກ, ເອົາ ໃຈໃສ່ເຊື່ອມຊຶມບັນດາມະຕິ, ຄຳສັ່ງຕ່າງໆຂອງພັກຢ່າງເປັນປົກກະຕິ, ເພື່ອຮັບປະກັນການຈັດຕັ້ງປະຕິບັດໃຫ້ສອດຄ່ອງກັບແຜນການ, ທິດທາງຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດໃຫ້ບັນລຸຄາດໝາຍປະກອບສ່ວນໃຫ້ລວມຍອດຜະລິດຕະພັນພາຍໃນ (GDP) ສະເລ່ຍບໍ່ຫລຸດ 8% ຕໍ່ປີ. ໃນຊ່ວງໄລຍະປີ 2011-2015 ລວມຍອດມູນຄ່າຜະລິດຕະພັນຂອງຂະແໜງພະລັງານ ແລະ ບໍ່ແຮ່ ບັນລຸໄດ້ 94.342,39 ຕື້ກີບ, ເພີ່ມຂຶ້ນ 9,22% ທຽບໃສ່ປີ2006-2010, ກວມເອົາປະມານ 12% ຂອງ (GDP), ການຂະຫຍາຍຕົວສະເລ່ຍ 18.868,47 ຕື້ກີບຕໍ່ປີ, ໃນນັ້ນຂະແໜງບໍ່ແຮ່ກວມເອົາ 13.349,36 ຕື້ກີບຕໍ່ປີ. ພົ້ນເດັ່ນຫລາຍແມ່ນໂຄງການຂຸດຄົ້ນຄຳ-ທອງເຊໂປນແຂວງສະຫວັນນະເຂດ, ໂຄງການຄຳ-ທອງພູເບ້ຍແຂວງໄຊສົມບູນ, ການຂຸດຄົ້ນເກືອໂປຕັດຢູ່ທົ່ງພຽງວຽງຈັນ, ຄຳມ່ວນ, ການຂຸດຄົ້ນຖ່ານຫີນລິກໄນຮັບໃຊ້ການຜະລິດພະລັງງານໄຟຟ້າຄວາມຮ້ອນຢູ່ເມືອງຫົງສາແຂວງໄຊຍະບູລີ ແລະ ການຂຸດຄົ້ນແຮ່ທາດອື່ນໆ. ສຳລັບໃນຂະແໜງພະລັງງານແມ່ນໄດ້ເອົາໃຈໃສ່ພັດທະນາລະບົບໄຟຟ້າຢ່າງຮອບດ້ານ ເຊັ່ນ: ເພີ່ມການລົງທຶນໃສ່ການພັດທະນາແຫລ່ງຜະລິດໄຟຟ້ານ້ຳຕົກ, ລະບົບສາຍສົ່ງ, ສະຖານີບັນຊາທີ່ທັນສະໄໝ, ການຂະຫຍາຍຕາໜ່າງໄຟຟ້າອອກສູ່ຊົນນະບົດຫ່າງໄກສອກຫລີກ ແລະ ເຂດຈຸດສຸມຍຸດທະສາດ, ແນໃສ່ສະໜອງພະລັງງານໃຫ້ພຽງພໍກັບຄວາມຕ້ອງການຊົມໃຊ້ຢູ່ພາຍໃນ ແລະ ສົ່ງອອກຂາຍຕ່າງປະເທດ, ປັດຈຸບັນມີແຫລ່ງຜະລິດໄຟຟ້າ 29 ແຫ່ງ, ລວມມີກຳລັງການຕິດຕັ້ງທັງໝົດ3.320,75 ເມກາວັດ, ສາມາດຜະລິດກະແສໄຟຟ້າໄດ້ທັງໝົດ 16.172,61 ລ້ານກິໂລວັດໂມງຕໍ່ປີ. ນອກຈາກນີ້, ຍັງມີການພັດທະນາໂຄງການພະລັງງານນ້ຳ ແລະ ອື່ນໆ ທີ່ພວມດຳເນີນການກໍ່ສ້າງປະມານ 71 ແຫ່ງ, ຄາດວ່າຈະມີກຳລັງຕິດຕັ້ງປະມານ 21.668 ເມກາວັດ. ປັດຈຸບັນອັດຕາການຊົມໃຊ້ໄຟຟ້າໄດ້ກວມເອົາ 88% ຂອງຈຳ ນວນຄອບຄົວ, 82,32% ຂອງຈຳນວນບ້ານ ແລະ 99,31% ຂອງຈຳນວນເມືອງໃນທົ່ວປະເທດ, ຄຽງຄູ່ກັນນັ້ນ ການພັດທະນາພະລັງງານໄຟຟ້າທົດແທນກໍໄດ້ຮັບພັດທະນາ ແລະ ສົ່ງເສີມຢ່າງຕັ້ງໜ້າ, ປັດຈຸບັນມີ 12.789 ຄອບຄົວເທົ່າກັບ 1,15% ຂອງຈຳນວນຄອບຄົວໃນທົ່ວປະເທດໄດ້ນຳໃຊ້ພະລັງງານຈາກແສງຕາເວັນ, ສ່ວນພະລັງງານຊີວະມວນ, ລົມ ແລະ ອື່ນໆ ກໍພວມມີການເລີ່ມຕົ້ນເຂົ້າສູ່ການພັດທະນາຢູ່ບາງທ້ອງຖິ່ນທີ່ມີເງື່ອນໄຂ.

    ສະຫາຍເລຂາຄະນະພັກ, ລັດຖະມົນຕີວ່າການກະຊວງພະລັງງານ ແລະ ບໍ່ແຮ່ ກ່າວວ່າ: ຕະຫລອດໄລຍະ 5 ປີ ຜ່ານມາ, ຄະນະພັກກະຊວງຍາມໃດກໍໄດ້ເອົາໃຈໃສ່ປັບປຸງການຈັດຕັ້ງ ແລະ ການເຄື່ອນໄຫວຂອງຕົນໃຫ້ມີຄຸນນະພາບ ແລະ ສາມາດບືນຕົວຂຶ້ນເຮັດຫລ້ອນໜ້າທີ່ໃນການຊີ້ນຳ-ນຳພາວຽກງານໄດ້ເປັນຢ່າງດີ, ອັນໄດ້ປະກອບສ່ວນສຳຄັນ ແລະ ສົມກຽດເຂົ້າໃນຜົນງານລວມໃນການນຳພາ ແລະ ຜົນສຳເລັດລວມຂອງພັກກໍຄືຂອງຊາດ.