ທ່ານ ຮອງ​ນາຍົກລັດຖະມົນຕີ ບຸນ​ປອນ ບຸດ​ຕະນະ​ວົງ ສຳ​ເລັດ​ການຢ້ຽມຢາມອົດ​ສະ​ຕາ​ລີ

 ທ່ານ ດຣ. ບູນປອນ ບຸດຕະນະວົງ ຮອງນາຍົກລັດຖະມົນຕີ ຜູ້ຊີ້ນໍາວຽກງານເສດ ຖະກິດມະຫາພາກ ແລະ ບໍລິການ ​ໄດ້​ສຳ​ເລັດ​ການຢ້ຽມຢາມ ແລະ ເຮັດວຽກຢູ່ປະ ເທດອົດສະຕາລີ ຕາມການເຊື້ອເຊີນຂອງລັດຖະບານ​ປະ​ເທດ​ດັ່ງກ່າວ ​ໃນ​ລະ ຫວ່າງ ວັນທີ 2-9 ກໍລະກົດນີ້, ​ໂດຍໄດ້ພົບປະ ແລະ ປຶກສາຫາລື ກັບ ທ່ານ ວາເຣນ ທຣັດ (Warren Truss) ຮອງນາຍົກລັດ ຖະມົນຕີ ລັດຖະມົນຕີວ່າການກະຊວງ ພື້ນ ຖານໂຄງລ່າງ ແລະ ການພັດທະນາພາກພື້ນ ອົດສະຕຼາລີ. ທັງສອງຝ່າຍໄດ້ຕີລາຄາ ສູງຕໍ່ໜ້າ​ຜົນການພົວພັນຮ່ວມມືຂອງ ສອງປະເທດ ລາວ-ອົດສະຕາລີ ແລະ ໄດ້ແລກປ່ຽນຄໍາຄິດຄໍາເຫັນຕໍ່ກັບບັນຫາສໍາ ຄັນຕ່າງໆ, ເພື່ອສືບຕໍ່ຮັດແໜ້ນສາຍພົວພັນຮ່ວມມືລະຫວ່າງສອງປະເທດ. ໃນໂອກາດດັ່ງກ່າວ ທ່ານ ຮອງນາຍົກ ບູນປອນ
ບຸດຕະນະວົງ ໄດ້ສະເໜີໃຫ້ທັງສອງປະເທດສືບຕໍ່ເສີມຂະຫຍາຍມູນເຊື້ອການຮ່ວມມືອັນດີງາມທີ່ຜ່ານມາ ແລະ ຜັນຂະ ຫຍາຍເຂົ້າສູ່​ລ່ວງ​ເລິກໃນຂົງເຂດອື່ນໆ ເປັນຕົ້ນ: ດ້ານການສຶກສາ, ການຫລຸດຜ່ອນຄວາມທຸກຍາກ, ການຄ້າ-ການລົງທຶນ, ລວມທັງ ການຊ່ວຍເຫຼືອ ສປປ ລາວ ໃນການເປັນເຈົ້າພາບຈັດກອງປະຊຸມສຸດ​ຍອດອາຊຽນ ທີ່​ຈະ​ມີ​ຂຶ້ນໃນປີ 2016 ທີ່ຈະມາເຖິງ​ໃຫ້​ປະສົບ​ຜົນສຳ​ເລັດ. ພ້ອມດຽວກັນ ກໍ່ໄດ້ສະເໜີ ຝ່າຍອົດສະຕຼາລີ ຊ່ວຍຊຸກຍູ້ ບັນດານັກທຸລະກິດ ແລະ ນັກທ່ອງທ່ຽວ ​ເຂົ້າມາລົງທຶນ ແລະ ທ່ອງທ່ຽວລາວ ໃຫ້ຫຼາຍຂຶ້ນ.

ໃນໄລຍະເຄື່ອນໄຫວເຮັດວຽກ ຢູ່ ປະເທດອົດສະຕຼາລີ ຄັ້ງນີ້, ທ່ານຮອງນາຍົກ ດຣ. ບຸນປອນ ບຸດຕະນະວົງ ຍັງໄດ້ເຂົ້າຮ່ວມພິທີເຊັນສັນຍາ ວ່າດ້ວຍການຮ່ວມມື ດ້ານການຂົນສົ່ງທາງອາກາດ (Lao Air Service Agreement) ລະຫວ່າງ ສປປ ລາວ ແລະ ປະເທດອົດສະຕາລີ ​ແລະ ​ເຂົ້າພົບປະເຮັດວຽກກັບພາກສ່ວນສໍາຄັນຕ່າງໆຂອງອົດສະຕາລີ​ ຄື: ສະພາຄຸ້ມຄອງບໍ່ແຮ່ (Minerals Council), ທະນາຄານກາງແຫ່ງ ປະເທດ ອົດສະຕາລີ (Reserve Bank of Australia ຫຼຶ RBA) ກ່ຽວກັບການຄຸ້ມຄອງ ແລະ ພັດທະນາ ລະບົບຊໍາລະສະສາງແຫ່ງຊາດ (National Payment System) ​ແລະ ພົບປະ ກັບອົງການຄຸ້ມຄອງດ້ານຄວາມໝັ້ນຄົງຂອງຂະແໜງທະນາຄານ ແລະ ສະຖາບັນການເງິນ ອົດສະຕາລີ (Australia Prudential and Regulatory Authority ຫຼືAPRA), ສະພາການຄ້າ ແລະ ຜູ້ປະ ກອບການ ນັກທຸລະກິດ ອົດສະຕາລີ ເພື່ອປຶກສາຫາລືແລກ ປ່ຽນຄໍາຄິດຄໍາເຫັນ ເພື່ອເປັນການດຶງດູດການລົງ ທຶນຂອງອົດສະຕາລີ ເຂົ້າມາລົງທຶນ ຢູ່ ສປປ ລາວ ໃຫ້ຫລາຍຂຶ້ນ.