laophatthananewspaper: ກະຊວງສຶກສາທິການ ແລະ ກິລາ ຕອບຂໍ້ຂ້ອງໃຈຂອງສັງຄົມ

ໃນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VII ໄດ້ເປີດສາຍດ່ວນ 156 ໃຫ້ປະຊາຊົນທົ່ວປະເທດ ທີ່ມີຂໍ້ຊັກຖາມບັນຫາຕ່າງໆທີ່ຂ້ອງຄາໃຈ ໂທລະສັບເຂົ້າມາ ເພື່ອໃຫ້ບັນດາກະຊວງ, ອົງການກ່ຽວຂ້ອງ ໄດ້ອອກມາໃຫ້ຄວາມກະຈ່າງແຈ້ງຕໍ່ປະຊາຊົນ, ເຊິ່ງໃນວັນທີ 24 ທັນ ວານີ້, ທ່ານນາງ ແສງເດືອນ ຫລ້າຈັນທະບູນ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາ ໄດ້ອອກມາຊີ້ແຈງຕໍ່ຄຳຊັກຖາມຂອງປະຊາຊົນບ້ານຖ້ຳໄຕ້, ເມືອງກາສີ ແຂວງວຽງຈັນ ທີ່ໄດ້ສະເໜີກ່ຽວກັບບັນຫາບ້ານດັ່ງກ່າວຫ່າງໄກຈາກຕົວເມືອງກາສີ 12 ກິໂລແມັດ, ຊຶ່ງບ້ານດັ່ງກ່າວ ມີ 100 ກວ່າຫລັງຄາເຮືອນ, ປັດຈຸບັນຍັງບໍ່ມີໂຮງຮຽນ, ນັກຮຽນໄດ້ພາກັນໄປຮຽນໜັງສືຢູ່ສະໂມສອນຂອງບ້ານ, ໂດຍຂັ້ນ ແລະ ແອ້ມດ້ວຍໄມ້ເຮ້ຍມີຫ້ອງຮຽນໜຶ່ງຫ້ອງນັບແຕ່ອານຸບານ ຫາ ມັດທະຍົມປີທີໜຶ່ງ ເຫັນວ່າມີຄວາມຫຍຸ້ງຍາກຫລາຍ. ຕໍ່ບັນຫານີ້ ທ່ານລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາ ຕອບວ່າ: ທາງກະຊວງພວມດຳເນີນການຂໍທຶນປຸກສ້າງໂຮງຮຽນບ້ານດັ່ງກ່າວ, ເຊິ່ງມີມູນຄ່າ 800 ລ້ານກີບ, ໃນສົກປີ 2015-2016 ພະແນກສຶກສາທິການ ແລະ ກິລາແຂວງ ກໍມີງົບປະມານ 100 ລ້ານກີບ ສະນັ້ນ ໃນປີນີ້ ກໍດຳເນີນການຈັດຊື້ຈັດຈ້າງ ຕາມລະບຽບຫລັກການ, ໄດ້ສຳເລັດການປະມູນ ແລະ ເຮັດສັນຍາກັບບໍລິສັດທີ່ຊະນະການປະມູນແລ້ວ ແລະ ໄດ້ເລີ່ມລົງມືກໍ່ສ້າງຕັ້ງແຕ່ວັນທີ 15 ທັນວາ 2015 ເປັນຕົ້ນມາ.

ສ່ວນປະຊາຊົນຢູ່ເມືອງອາດສະພອນ ແຂວງສະຫວັນນະເຂດ ໄດ້ສະເໜີກ່ຽວກັບຄູ-ອາຈານ ໃນປັດຈຸບັນ ເວລາຍາມຫ້ອງເສັງ ເຫັນວ່າຍັງບໍ່ທັນເຄັ່ງຄັດເທົ່າທີ່ຄວນ. ຕໍ່ບັນຫາດັ່ງກ່າວ ທ່ານລັດຖະມົນຕີຊ່ວຍ ໄດ້ຊີ້ແຈງວ່າ: ການສອບເສັງຈົບຊັ້ນໃນແຕ່ລະຂັ້ນຮຽນທາງພະແນກສຶກສາທິການ ແລະ ກິລາແຂວງ ໄດ້ມີການຈັດຕັ້ງຄະນະຮັບຜິດຊອບແຕ່ລະແຂວງລົງຮອດຂັ້ນເມືອງເປັນຜູ້ຕິດຕາມຊີ້ນຳ. ນອກຈາກຂັ້ນແຂວງ ແລະ ເມືອງແລ້ວ ຍັງມີຄະນະຮັບຜິດຊອບຈາກກະຊວງສຶກສາທິການ ແລະ ກິລາ ເປັນຜູ້ຊີ້ນຳໃນການສອບເສັງໂດຍກົງ, ແຕ່ມີບາງຄັ້ງທີ່ຫ້ອງສອບເສັງບໍ່ເຄັ່ງຄັດເທົ່າທີ່ຄວນນັ້ນ ແຕ່ກໍມີບາງສູນເທົ່ານັ້ນ ເຖິງຢ່າງໃດກໍຕາມ ພວກເຮົາຈະໄດ້ເອົາໃຈໃສ່ຕິດຕາມໃຫ້ເຄັ່ງຄັດ ແລະ ປັບປຸງໃຫ້ດີຂຶ້ນກວ່າເກົ່າ. ນອກຈາກນີ້ ຍັງມີພະນັກງານັກຮົບເກົ່າຈາກເມືອງປາກຊັນ, ແຂວງບໍລິຄຳໄຊ ສະເໜີກ່ຽວກັບບັນຫາໂຮງຮຽນມັດທະຍົມຕອນປາຍປາກງຽບ, ເມືອງປາກຊັນ ແຂວງບໍລິຄຳໄຊ ເກັບເງິນນຳຜູ້ປົກຄອງນັກຮຽນເດືອນລະ 10-40 ພັນກີບຕໍ່ຄົນ, ໂດຍອ້າງວ່າເກັບຄ່າບຳລຸງຮັກສາຄອມພິວເຕີ, ຄ່າຂີ້ເຫຍື້ອຂອງໂຮງຮຽນ, ຄ່ານ້ຳດື່ມຂອງຄູອາຈານ ເຫັນວ່າບໍ່ສົມຄວນ ຕໍ່ບັນຫາດັ່ງກ່າວ ທ່ານລັດຖະມົນຕີຊ່ວຍ ກະຊວງສຶກສາ ຕອບວ່າ: ໄດ້ປະສານໄປຍັງພາກສ່ວນກ່ຽວຂ້ອງ ແລະ ເກັບກຳຂໍ້ມູນມາເຫັນວ່າ ໂຮງຮຽນໄດ້ມີແຜນພັດທະນາໂຮງຮຽນຂອງຕົນ, ເຊິ່ງໃນກອງປະຊຸມປະຈຳປີ ໄດ້ມີການປຶກສາຫາລືເປັນເອກກະພາບກັນກ່ຽວກັບການພັດທະນາໂຮງຮຽນ ແລະ ການເກັບເງິນຮັບໃຊ້ວຽກງານແຕ່ລະວຽກ, ໂດຍມີຜູ້ເຂົ້າຮ່ວມ ຈາກພະແນກສຶກສາທິການ ແລະ ກິລາແຂວງ, ປະທານພັດທະນາການສຶກສາ, ຄະນະພັດທະນາການສຶກສາເຂດບໍລິຫານໃນ 8 ໝູ່ບ້ານ, ຄະນະພັກແຕ່ລະບ້ານໃນເຂດບໍລິຫານ ແລະ ຄະນະອຳນວຍການ ແລະ ຄູອາຈານທັງໝົດ ພາຍໃນໂຮງຮຽນ ໃນການເກັບເງິນແຕ່ລະເດືອນ ໂຮງຮຽນມີໃບບິນໃຫ້ນັກຮຽນເພື່ອແຈ້ງ ໃຫ້ຜູ້ປົກຄອງຊາບໃນການເກັບເງິນເຊັ່ນ: ເກັບຄ່າບູລະນະຄອມພິວເຕີ ເດືອນລະ 15.000 ກີບ/ຄົນ, ເກັບຄ່າອານາໄມຊື້ຖົງຢາງ ແລະ ລົດ ອພບຕ ເມືອງ ເດືອນລະ 2.000 ກີບ/ຄົນ ເພື່ອຊ່ວຍພັດທະນາໂຮງຮຽນ.