ຫລາຍພາກສ່ວນຮຽນຮູ້ວິທີປ້ອງກັນການໂຈລະກຳຂໍ້ມູນຂ່າວສານຂອງຕົນ

          ວັນທີ 23 ມີນານີ້, ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບ ບໍລິສັດເຈເອວເອັສ ໄອທີ ຈຳກັດ, ໄດ້ຈັດກອງປະຊຸມສຳມະນາວິຊາການທາງດ້ານເຕັກໂນໂລຊີຂໍ້ມູນຂ່າວສານ, ໃນຫົວຂໍ້: “ຄວາມປອດໄພຂອງຂໍ້ມູນ ແລະ ມາດຕະຖານ ໄອເອັສໂອ 27001”, ໂດຍການເປັນປະທານຂອງທ່ານ ຫຸມພັນ ອິນທະຣາດ ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ມີທ່ານ ວົງພູທອນ ສີຈັນທະລາດ ປະທານບໍລິສັດ ເຈເອວເອັສ ພ້ອມນັກສຳມະນາກອນຈາກພາກສ່ວນຕ່າງໆເຂົ້າຮ່ວມເປັນຈຳນວນຫລາຍ.

          ທ່ານຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ກ່າວວ່າ: ການສຳມະນາຄັ້ງນີ້ ກໍເພື່ອເປັນການເຜີຍແຜ່ຂໍ້ມູນຕ່າງໆໃຫ້ພາກສ່ວນກ່ຽວຂ້ອງທັງພາກລັດ ແລະ ເອກກະຊົນ ໄດ້ຮັບຮູ້ ແລະ ເຂົ້າໃຈກ່ຽວກັບຜົນຮ້າຍຂອງການໂຈລະກຳຂໍ້ມູນ ແລະ ວິທີການປ້ອງກັນ. ຍ້ອນວ່າປັດຈຸບັນວຽກງານ

ເຕັກໂນໂລຊີຂໍ້ມູນຂ່າວສານ ມີຄວາມສຳຄັນ ແລະ ຖືກນຳໃຊ້ຢ່າງກວ້າງຂວາງ, ດັ່ງນັ້ນ ຈຶ່ງເປັນບັນຫາໃຫຍ່ທີ່ຈະຕ້ອງມີວິທີປ້ອງກັນຄວາມປອດໄພ ແລະ ມາດຕະຖານຂອງລະບົບຂໍ້ມູນຂ່າວສານ ດັ່ງນັ້ນ ຈຶ່ງຈຳເປັນຕ້ອງໄດ້ສຶກສາ-ຮຽນຮູ້ວິທີຮັກສາລະບົບຂໍ້ມູນຂອງຕົນໃຫ້ມີຄວາມປອດໄພ ແລະ ໝັ້ນຄົງຍິ່ງຂຶ້ນ. ພ້ອມນີ້ ທ່ານຮອງລັດຖະມົນຕີ ຍັງໄດ້ກ່າວສະແດງຄວາມຂອບໃຈມາຍັງບໍລິສັດ ເຈເອວເອັສ ທີ່ນຳເອົາຄວາມຮູ້ ແລະ ປະສົບການຕ່າງໆ ມາເຜີຍແຜ່ໃຫ້ນັກສຳມະນາກອນຜູ້ເຂົ້າຮ່ວມໄດ້ມີໂອກາດຮຽນຮູ້ບົດຮຽນ ແລະ ປະສົບການຕ່າງໆ ເພື່ອໄປນຳໃຊ້ຢູ່ອົງກອນຂອງຕົນໃຫ້ເກີດປະໂຫຍດສູງສຸດ.