ສໍາເລັດກອງປະຊຸມຖອດຖອນບົດຮຽນວຽການຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ

ກອງປະຊຸມເຜີຍແຜ່ ແລະ ຖອດຖອນບົດຮຽນການຈັດຕັ້ງປະຕິບັດວຽກງານວ່າດ້ວຍການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ( AML/CFT ) ເຊິ່ງໄດ້ຈັດຂຶ້ນລະຫວ່າງວັນທີ 16-17 ມີນາ 2016 ທີ່ນະຄອນຫຼວງວຽງຈັນ ໂດຍການໃຫ້ກຽດເປັນປະທານຂອງທ່ານນາງ ແພງສີ ແພງເມືອງ ຮັກສາການຫົວໜ້າສໍານັກງານຂໍ້ມູນຕ້ານການຟອກເງິນ ແລະ ມີຄະນະນໍາ-ຕົວແທນຈາກບັນດາທະນາຄານທຸລະກິດ ແລະ ສະຖາບັນການເງິນເຂົ້າຮ່ວມ.

ກອງປະຊຸມໄດ້ເລັ່ງໃສ່ຖອດຖອນບົດຮຽນການຈັດຕັ້ງປະຕິບັດວຽກງານການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍລະຫວ່າງທະນາຄານທຸລະກິດ ແລະ ສະຖາບັນການເງິນ, ກົດໝາຍວ່າດ້ວຍການຕ້ານການຟອກເງິນ ແລະ ການສະໜອງໃຫ້ແກ່ການກໍ່ການຮ້າຍ, ຂໍ້ຕົກລົງວ່າດ້ວຍ

ມາດຕະການທາງບໍລິ ຫານຕໍ່ຜູ້ທີ່ລະເມີດກົດໝາຍວ່າດ້ວຍການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ; ຂໍ້ຕົກລົງວ່າດ້ວຍການລາຍງານທຸລະກໍາເງິນສົດທີ່ມີມູນຄ່າເກີນກໍານົດ; ຂໍ້ຕົກລົງວ່າດ້ວຍການຊອກຮູ້ລູກຄ້າ ແລະ ເພີ່ມທະວີການເອົາໃຈໃສ່ລູກຄ້າ; ຄໍາແນະນໍາວ່າດ້ວຍການລາຍງານທຸລະກໍາທີ່ໜ້າສົງໃສວ່າເປັນການຟອກເງິນ ຫຼື ສະໜອງທຶນໃຫ້ແກ່ການກໍ່ການຮ້າຍ; ຄໍາແນະນໍາວ່າດ້ວຍຕົວຊີ້ບອກຂອງທຸລະກໍາທີ່ສົງໃສວ່າເປັນການຟອກເງິນ ຫຼື ສະໜອງທຶນໃຫ້ແກ່ການກໍ່ການຮ້າຍ; ຂັ້ນຕອນ ແລະ ວິທີການລາຍງານ (STR/CTR) ທີ່ນໍາສະເໜີໂດຍທ່ານ ດຣ. ເວີນສະຫວັນ ສີວິໄຊ ຮອງຫົວໜ້າສໍານັກງານຂໍ້ມູນຕ້ານການຟອກເງິນ.

ຄືດັ່ງທີ່ຮູ້ແລ້ວວ່າ: ກົດໝາຍວ່າດ້ວຍການຕ້ານການຟອກເງິນ ແລະ ການສະໜອງທຶນໃຫ້ແກ່ ທະນາຄານທຸລະກິດ ແລະ ສະຖາບັນການເງິນໄດ້ເອົາໃຈໃສ່ຢ່າງຈິງຈັງໃນການຕ້ານ ແລະ ສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍໂດຍສະເພາະບັນດາທະນາຄານທຸລະກິດໄດ້ມີນະໂຍບາຍກ່ຽວກັບວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ມີລະບຽບຄູ່ມືກ່ຽວກັບການຊອກຮູ້ລູກຄ້າ, ການເພີ່ມທະວີເອົາໃຈໃສ່ລູກຄ້າ, ມີການແຕ່ງຕັ້ງເຈົ້າໜ້າທີ່ທີ່ມີໜ້າທີ່ລາຍງານ, ມີການທົບທວນລູກຄ້າ, ມີການປະເມີນຄວາມສ່ຽງຂອງຕົນ, ມີການກວດກາພາຍໃນ, ມີການລາຍງານທຸລະກໍາທີ່ສົງໃສວ່າເປັນການຟອກເງິນ ແລະ ມີລະບົບ IT ກ່ຽວກັບການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍທີ່ສອດຄ່ອງກັບມາດຕະຖານສາກົນ ແລະ ສະພາບແວດລ້ອມຂອງປະເທດເຮົາ. ນອກຈາກນັ້ນ ບັນດາພາກສ່ວນທີ່ກ່ຽວຂ້ອງກໍໄດ້ເອົາໃຈໃສ່ເປັນຢ່າງດີໃນການປະສານງານ ແລະ ຮ່ວມມືກັບສໍານັກງານຂໍ້ມູນຕ້ານການຟອກເງິນໃນການຈັດຕັ້ງປະຕິບັດກົດໝາຍ ແລະ ນິຕິກໍາລຸ່ມກົດໝາຍວ່າດ້ວຍການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ.

ຈາກການເອົາໃຈໃສ່ໃນການຈັດຕັ້ງປະຕິບັດວຽກງານການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍເປັນຢ່າງດີ ຈຶ່ງເຮັດໃຫ້ ສປປ ລາວ ໄດ້ຫຼຸດພົ້ນອອກຈາກບັນຊີສີເທົາເຂັ້ມມາເປັນບັນຊີສີເທົາ.

                                                   # ຂ່າວ-ພາບ: ຣັດສະໝີ ດວງສັດຈະ