ລາວເລັ່ງສະກັດກັ້ນພະຍາດໄຂ້ຍຸງລາຍ

          ເມື່ອມໍ່ໆມານີ້, ນາຍົກລັດຖະມົນຕີແຫ່ງ ສປປ ລາວ, ໄດ້ອອກຄໍາສັ່ງໃຫ້ກະຊວງສາທາລະນະສຸກສົມທົບກັບຂະແໜງການກ່ຽວຂ້ອງອື່ນໆ, ລວມເຖິງທ້ອງຖິ່ນຕ່າງໆໃນທົ່ວປະເທດໄດ້ເພີ່ມທະວີວຽກງານປ້ອງກັນ ແລະ ສະກັດກັ້ນການລະບາດຂອງພະຍາດໄຂ້ຍຸງລາຍ ຫລື ໄຂ້ເລືອດອອກຢ່າງແຂງແຮງຕັ້ງໜ້າກວ່າເກົ່າ, ພາຍຫລັງເຫັນວ່າຊ່ວງໄລຍະນີ້ສະພາບອາກາດມີການປ່ຽນແປງໄປໃນລັກສະນະເອື້ອອໍານວຍໃຫ້ແກ່ການຂະຫຍາຍຕົວຂອງຍຸງລາຍ,ຊຶ່ງເປັນຕົວນໍາເຊື້ອຂອງພະຍາດດັ່ງກ່າວ, ຂະນະດຽວກັນການເຄື່ອນຍ້າຍຂອງປະຊາກອນຢູ່ພາຍໃນ ແລະ ພາກພື້ນໄດ້ມີທ່າອ່ຽງເພີ່ມຂຶ້ນອັນເປັນໂອກາດໃຫ້ເຊື້ອຈຸລະໂລກມີການເຄື່ອນຍ້າຍ, ເຊິ່ງອາດເປັນສາເຫດເຮັດໃຫ້ເກີດການລະບາດຂອງພະຍາດໄຂ້ເລືອດອອກຫລາຍຂຶ້ນ.

           ຄໍາສັ່ງດັ່ງກ່າວລະບຸວ່າ: ໃຫ້ກະຊວງສາທາລະນະສຸກ, ສຶກສາທິການ ແລະ ກິລາ, ຖະ

ແຫລງຂ່າວ, ວັດທະນະທໍາ ແລະ ທ່ອງທ່ຽວ, ໂຍທາທິການ ແລະ ຂົນສົ່ງ ຊີ້ນໍາບັນດາຂະແໜງການຮັບພິຊອບຕົນຢ່າງໃກ້ຊິດ ເປັນຕົ້ນແມ່ນບັນດາກົມ, ສູນ, ໂຮງໝໍ, ສະຖາບັນການສຶກສາທັງພາກລັດ ແລະ ເອກະຊົນ ໄດ້ສົມທົບກັບນະຄອນຫລວງ ແລະ ທ້ອງຖິ່ນເພື່ອສ້າງແຜນການກຽມຄວາມພ້ອມແຕ່ຫົວທີໃຫ້ແກ່ໜ່ວຍງານລະບາດວິທະຍາ ແລະ ປຸກລະດົມໂຄສະນາໃຫ້ຄວາມຮູ້ແກ່ຊຸມຊົນຢ່າງຖືກວິທີເພື່ອປ້ອງກັນ ແລະ ສະກັດກັ້ນການລະບາດຂອງພະຍາດດັ່ງກ່າວໃຫ້ມີຜົນ, ອໍານວຍຄວາມສະ

ດວກໃຫ້ແກ່ອົງການຈັດຕັ້ງຕ່າງໆເຂົ້າຮ່ວມຂະບວນການດັ່ງກ່າວດ້ວຍຄວາມຮັບພິຊອບສູງ. ຈັດຕັ້ງໃຫ້ມີອາສາສະໝັກຂັ້ນບ້ານ ແລະ ປຸກລະດົມນັກຮຽນ-ນັກສຶກສາທຸກພາກສ່ວນເຂົ້າຮ່ວມຂະບວນການທໍາລາຍແຫລ່ງເພາະພັນຂອງໜອນນໍ້າຢ່າງເປັນປົກກະຕິ, ພ້ອມຮັບປະກັນໃຫ້ປະຊາຊົນມີການປ່ຽນແປງພຶດຕິກໍາໂດຍປະຕິບັດຄໍາຂວັນ 5 ປ ຄື: ປິດຝາພາຊະນະນໍ້າໃຊ້ໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງມາໄຂ່ໃສ່. ປ່ຽນນໍ້າໃນພາຊະນະ ເຊັ່ນ: ເຕົ້າດອກໄມ້, ນໍ້າຮອງຕີນຕູ້, ຖ້ານຮອງຈອກ. ປ່ອຍປາຫາງນົກຍຸງເພື່ອກິນໜອນຍຸງລາຍ. ປັບປຸງໂດຍການອານາໄມສິ່ງແວດລ້ອມບໍລິເວນອ້ອມເຮືອນບໍ່ໃຫ້ມີກະໂປະ, ກະປ໋ອງ, ຢາງຕີນລົດທີ່ມີນໍ້າຂັງ ແລະ ປະຕິບັດໃຫ້ເປັນນິໄສປະຈໍາປົກກະຕິ. ນອກນີ້ຕ້ອງຈັດກອງປະຊຸມສະຫລຸບຖອດຖອນບົດຮຽນການຈັດຕັ້ງປະຕິບັດວຽກງານປ້ອງກັນ ແລະ ຄວບຄຸມພະຍາດໄຂ້ຍຸງຢ່າງໜ້ອຍ 3 ເດືອນຄັ້ງໜຶ່ງສໍາລັບຂັ້ນແຂວງ, ເດືອນລະເທື່ອສໍາລັບເມືອງ ແລະ ອາທິດລະເທື່ອຢູ່ຂັ້ນບ້ານໃຫ້ມີຜົນ.