ຍົກລະດັບວິຊາສະເພາະໃຫ້ຜູ້ຊ່ວຍພິພາກສາໃນທົ່ວປະເທດ

  ຊຸດຝຶກອົບຮົມຍົກລະດັບວິຊາສະເພາະຜູ້ຊ່ວຍຜູ້ພິພາກສາໃນທົ່ວປະເທດໄດ້ຈັດຂຶ້ນໃນວັນທີ 22 ມີນານີ້, ທີ່ສະຖາບັນຄົ້ນຄວ້າສານປະຊາຊົນສູງສຸດ, ໂດຍການເປັນປະທານຂອງທ່ານ ຄໍາພັນ ສິດທິດໍາພາ ປະທານສານດັ່ງກ່າວ, ມີບັນດາພະນັກງານຜູ້ຊ່ວຍຜູ້ພິພາກສາຈາກສານປະຊາຊົນເຂດ, ແຂວງ, ນະຄອນຫລວງເຂົ້າຮ່ວມເປັນຈໍານວນຫລາຍ.

   ຊຸດອົບຮົມເທື່ອນີ້, ແມ່ນສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກໃນການບຸກທະລຸການພັດທະນາຊັບພະຍາກອນມະນຸດ, ກໍຄືການປະຕິບັດ 6 ແຜນງານ 18 ໂຄງການພັດທະນາລະບົບສານ, ໂດຍສະເພາະແມ່ນການສຸມໃສ່ຍົກລະດັບທາງດ້ານຄວາມຮູ້ຄວາມສາມາດຂອງພະນັກງານສານປະຊາຊົນໃນການປະຕິບັດໜ້າທີ່ມີຄວາມວ່ອງໄວ, ມີຈັນຍາບັນ-ຈັນຍາທໍາ, ຖືກຕ້ອງ ແລະ ເປັນທໍາ ເພື່ອສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ກໍຄືແນວທາງການສ້າງໃຫ້ເປັນລັດແຫ່ງກົດໝາຍເຂັ້ມແຂງຂຶ້ນເທື່ອລະກ້າວ.