ການເລືອກຕັ້ງຜູ້ແທນປະຊາຊົນໄດ້ຮັບຜົນສໍາເລັດຢ່າງຈົບງາມ

          ນັບແຕ່ເວລາ 7:00 ໂມງເຊົ້າ ຫາ 17:00 ໂມງແລງຂອງວັນອາທິດ ວັນທີ 20 ມີນາ 2016 ປະຊາຊົນລາວທຸກ ເຜົ່າທີ່ມີເງື່ອນໄຂຄົບຖ້ວນໃນທົ່ວປະເທດ ໄດ້ພ້ອມກັນໄປໃຊ້ສິດຂອງຕົນ ປ່ອນບັດເລືອກເອົາສະມາຊິກສະພາແຫ່ງຊາດ ( ສສຊ ) ຊຸດທີ VIII ແລະ ເລືອກເອົາສະມາຊິກສະພາປະຊາຊົນຂັ້ນແຂວງ-ນະຄອນຫຼວງວຽງຈັນ ( ສສຂ ) ເຂົ້າສະພາ ເພື່ອເຮັດໜ້າທີ່ເປັນຕົວແທນປົກປ້ອງສິດ ແລະ ຜົນປະໂຫຍດຂອງປະຊາຊົນ, ມາເຖິງຂະນະນີ້ ສາມາດຢັ້ງຢືນໄດ້ ວ່າ: ໃນທົ່ວປະເທດເລືອກໄດ້ ສສຊ ຊຸດທີ VIII ທັງໝົດ 149 ທ່ານ ແລະ ສສຂ 360 ທ່ານ ( ຕາມການກໍານົດຂອງອົງ ການທີ່ກ່ຽວຂ້ອງ), ສ່ວນຜົນການເລືອກຕັ້ງຢ່າງເປັນທາງການນັ້ນ ຍັງລໍຖ້າຄະນະກໍາມະການເລືອກຕັ້ງ ສສຊ ຊຸດທີ VIII ແລະ ສສຂ ປະກາດໃຫ້ຊາບໃນໄລຍະມໍ່ໆນີ້.

         ການເລືອກຕັ້ງໃນຄັ້ງນີ້ ຮັບປະກັນໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພໃນທົ່ວສັງ ຄົມ, ຜູ້ທີ່ມີສິດເລືອກຕັ້ງ ໄດ້ໃຊ້ສິດຂອງຕົນປ່ອນບັດດ້ວຍຄວາມສະໝັກໃຈ, ຮັບປະກັນການລົງຄະແນນສຽງຖືກຕ້ອງ ຕາມກົດໝາຍ ເຊິ່ງວັນດັ່ງກ່າວໄດ້ກາຍເປັນເຫດການທາງດ້ານການເມືອງທີ່ສໍາຄັນຍິ່ງໃນປະຫວັດສາດຂອງຊາດ ໂດຍສະເພາະໃນໄລຍະແຫ່ງການຈັດຕັ້ງປະຕິບັດ 2 ໜ້າທີ່ຍຸດທະສາດຂອງພັກ ແລະ ການຈັດຕັ້ງປະຕິບັດແນວທາງປ່ຽນແປງໃໝ່ຂອງພັກ ແລະ ການຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ X ຂອງພັກ, ທັງເປັນ ປາງບຸນໃຫຍ່ແຫ່ງມະຫາສາມັກຄີຂອງວົງຄະນະຍາດແຫ່ງຊາດລາວ ແລະ ຊາວລາວໃນທົ່ວປະເທດຢ່າງມີຄວາມເອກ ອ້າງທະນົງໃຈ, ມີກຽດສັກສີ, ມີຄວາມປິຕິຊົມຊື່ນ ແລະ ມີຄວາມຫວັງອັນແຮງກ້າໃນຖານະຂອງພົນລະເມືອງລາວທີ່ມີ ສິດສະເໝີພາບເທົ່າທຽມກັນໃນການໃຊ້ສິດໃຊ້ສຽງເລືອກເອົາຕົວແທນທີ່ຕົນມັກ, ເຊິ່ງໄດ້ຢັ້ງຢືນໃຫ້ເຫັນຢ່າງຈະແຈ້ງເຖິງສິດປະຊາທິປະໄຕຂອງພົນລະເມືອງລາວເຮົາຢ່າງແທ້ຈິງ.

           ມາເຖິງປະຈຸບັນນີ້ ບັນດາ ສສຊ ຊຸດທີ VIII ແລະ ສສຂ ທີ່ປະຊາຊົນລາວໃນທົ່ວປະເທດໄດ້ໃຫ້ການເລືອກຕັ້ງ ເຂົ້ານັ່ງໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງເຊິ່ງເປັນຕົວແທນໂດຍກົງຂອງປະຊາຊົນບັນດາເຜົ່າ, ແມ່ນໄດ້ກຽມຄວາມພ້ອມເຂົ້າປະຕິບັດໜ້າທີ່ພາຍຫຼັງ ທີ່ກໍາມະການເລືອກຕັ້ງປະກາດຜົນ ການເລືອກຕັ້ງຢ່າງເປັນທາງການ, ຈາກນັ້ນ ບັນດາຜູ້ແທນກໍຈະເຂົ້າເຮັດໜ້າທີ່ໃນກອງ ປະຊຸມສະໄໝສາມັນຄັ້ງປະຖົມ ມະລຶກຂອງສະພາແຫ່ງຊາດຊຸດທີ VIII ແລະ ສະພາປະຊາ ຊົນຂັ້ນແຂວງ ເພື່ອແບກຫາບ ພາລະໜ້າທີ່ ແລະ ຕັດສິນບັນ ຫາສໍາຄັນຂອງຊາດ, ຂອງທ້ອງຖິ່ນ ຮັບປະກັນລະບົບອໍານາດແຫ່ງລັດໃຫ້ມີຄວາມເຂັ້ມແຂງ, ສືບຕໍ່ເຮັດໃຫ້ການແບ່ງ ງານ, ແບ່ງຄວາມຮັບຜິດຊອບລະຫວ່າງອົງການອໍານາດລັດດ້ວຍກັນ ແລະ ລະຫວ່າງສູນກາງກັບທ້ອງຖິ່ນໃຫ້ລະອຽດ ຈະແຈ້ງ ເຮັດໃຫ້ການເຄື່ອນໄຫວຂອງອົງການອໍານາດລັດ ມີປະສິດທິພາບ, ມີຄວາມສັກ ສິດ ແລະ ຮັບປະກັນໃຫ້ອໍາ ນາດແຫ່ງລັດ ເປັນອໍານາດລັດທີ່ມາຈາກປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ.

          ຜົນສໍາເລັດໃນການເລືອກຕັ້ງ ສສຊ ຊຸດທີ VIII ແລະ ສສຂ ໃນຊຸດນີ້ ກ່ອນອື່ນໝົດແມ່ນຍ້ອນໄດ້ຮັບການຊີ້ນໍາ ນໍາພາ ແລະ ການເອົາໃຈໃສ່ຢ່າງໃກ້ຊິດຈາກສູນກາງພັກ, ໂດຍສະເພາະຈາກກົມການເມືອງສູນກາງພັກ, ຄະນະເລຂາທິ ການສູນກາງພັກ, ຈາກສະພາແຫ່ງຊາດ ແລະ ລັດຖະບານ, ການເອົາໃຈໃສ່ຂອງຄະນະພັກ-ອໍານາດການປົກຄອງ ແລະ ຂະແໜງການທຸກຂັ້ນ, ດ້ວຍການອຸທິດສະຕິປັນຍາ,ກໍາລັງເຫື່ອແຮງຂອງຄະນະກໍາມະການເລືອກຕັ້ງໃນທຸກລະດັບກ່ຽວ ການຈັດຕັ້ງປະຕິບັດໜ້າທີ່ ໂດຍໄດ້ມີການປະສານສົມທົບ-ຮ່ວມມືກັບທຸກຝ່າຍ ແລະ ດ້ວຍຄວາມສາມັກຄີເປັນຈິດໜຶ່ງ ໃຈດຽວກັນຂອງປະຊາຊົນລາວບັນດາເຜົ່າພາຍໃຕ້ການນໍາພາຂອງພັກ, ພິເສດ ແມ່ນກໍາລັງປ້ອງກັນ ຊາດ-ປ້ອງກັນຄວາມ ສະຫງົບ ໄດ້ເຮັດໜ້າທີ່ຮັບປະກັນໃຫ້ປະເທດຊາດສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະ ບຽບຮຽບຮ້ອຍ, ສະຫງົບ ແລະ ປອດໄພ ອັນໄດ້ສ້າງເງື່ອນໄຂ ແລະ ຮັບປະກັນການເລືອກຕັ້ງ ສສຊ ຊຸດທີ VIII ແລະ ສສຂ ດໍາເນີນໄປດ້ວຍບັນຍາກາດທີ່ດີ, ມີຜົນສໍາເລັດຢ່າງສະຫງ່າງາມ, ພ້ອມນັ້ນ ຍັງໄດ້ຮັບການສະໜັບສະໜູນທາງດ້ານ ວັດຖຸ ແລະແຮງໃຈອັນລໍ້າຄ່າ ແລະ ໃຫຍ່ຫຼວງຈາກປະຊາຊົນພາຍໃນປະເທດ ລວມເຖິງຊາວລາວຮັກຊາດທີ່ອາໃສຢູ່ປະ ເທດອື່ນ, ບັນດາປະເທດເພື່ອນມິດຍຸດທະສາດ ແລະ ບັນດາປະເທດທີ່ຮັກຫອມສັນຕິພາບໃນໂລກ.