ທ້າວ ກົບ ຈາກໂຮງຮຽນເພຍວັດ ຄອງຂັນ Pepsi Singing Contest 2016

ການແຂ່ງຂັນຮ້ອງເພງ ຊີງຂັນລັດຖະມົນຕີວ່າການ ກະຊວງສຶກສາທິການ ແລະ ກິລາ ຫຼື Pepsi Singing Contest 2016, ໄດ້ຈັດຂຶ້ນຢ່າງຄຶກຄື້ນມ່ວນຊື່ນໃນຕອນຄໍ່າ ວັນທີ 5 ເມສາ 2016 ນີ້ ຢູ່ທີ່ຫໍວັດທະນະທຳແຫ່ງຊາດ, ນະຄອນຫລວງ​ວຽງ​ຈັນ, ຊຶ່ງມີ ຜູ້ເຂົ້າຮອບຊິງຊະນະເລີດທັງໝົດ 12 ຄົນ ຈາກຜູ້ສະໝັກ 479 ຄົນ, ຜົນການແຂ່ງຂັນ ຜູ້ທີ່ໄດ້ຊະນະເລີດແມ່ນໝາຍເລກ P7 ທ້າວ ກົບ ຈາກໂຮງຮຽນ ເພຍວັດ ໄດ້ຮັບທຶນການ ສຶກສາ 15 ລ້ານກີບ, ຂັນລາງວັນ, ໃບກຽດຕິຄຸນ, ດື່ມແປັບຊີຟີ 1 ປີ ແລະ ສັງກັດເປັນ ນັກຮ້ອງໃນຄ້າຍເພງຂອງລາວ, ຮອງຊະນະເລີດໄດ້ແກ່ໝາຍເລກ P4 ນາງ ບີ່ບີ້ ຈາກ

ໂຮງຮຽນສິລະປະດົນຕີແຫ່ງຊາດ ໄດ້ຮັບທຶນການສຶກສາ 10 ລ້ານກີບ, ໃບກຽດຕິຄຸນ ແລະ ດື່ມແປັບຊີຟີ 1 ປີ ລາງວັນຮອງຊະ ນະເລີດອັນດັບສອງ ໄດ້ແກ່ໝາຍເລກ P8 ທ້າວ ຢູວິນ ຈາກວິທະຍາໄລລັດຕະນະ ໄດ້ຮັບທຶນການສຶກສາ 8 ລ້ານກີບ, ພ້ອມໃບກຽດ ຕິຄຸນ ແລະ ດື່ມແປັບຊີຟີ 1 ປີ. ນອກຈາກນີ້, ຍັງມີລາງວັນ ຂວັນໃຈມະຫາຊົນ ຫຼື Popular vote ໄດ້ແກ່ໝາຍເລກ P6 ນາງ ດາວ ຈາກໂຮງຮຽນ ວຽງຈັນພັດທະນາ ໄດ້ຮັບທຶນການສຶກສາ 5 ລ້ານກີບ ແລະ ລາງວັນທີມການສະແດງດີເດັ່ນມີ 3 ນ້ອງໄດ້ ແກ່ທີມຂອງຄູຝຶກ ໂຕ້ Xtreme ໄດ້ຮັບທຶນການສຶກສາ 5 ລ້ານກີບ.

​ເຂົ້າຮ່ວມງານແຂ່ງຂັນດັ່ງກ່າວທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ພ້ອມດ້ວຍມວນຊົນເຂົ້າຮ່ວມຊົມເຊຍເປັນຈຳນວນຫຼວງຫຼາຍ.