ລາວສ້າງຕັ້ງສະມາຄົມຢາງພາລາເພື່ອຄ້ຳປະກັນດ້ານລາຄາ

          ທ່ານ ວິໄລວັນ ພົມເຂ ອະດີດລັດຖະມົນຕີກະຊວງກະສິກໍາ ແລະ ປ່າໄມ້, ປະທານຄະນະຂົນຂວາຍສ້າງຕັ້ງສະມາຄົມຢາງພາລາ ພ້ອມຄະນະ ໄດ້ນໍາກຸ່ມບໍລິສັດພັດທະນາກະສິກໍາແຂວງຢຸນນານ ສປ ຈີນ ລົງຢ້ຽມຢາມໂຄງການປູກໄມ້ອຸດສາຫະກໍາຢາງພາລາເປັນສິນຄ້າ ຢູ່ບ້ານສົມສະໜຸກ ເມືອງຫີນເຫີບ ແຂວງວຽງຈັນ ໃນວັນທີ 16 ກໍລະກົດນີ້ ເພື່ອເກັບກໍາຂໍ້ມູນ ແລະ ກະກຽມເງື່ອນໄຂຕ່າງໆ ເພື່ອຂໍອະນຸມັດສ້າງຕັ້ງສະມາຄົມຢາງພາລາລາວຢ່າງເປັນທາງການ ພ້ອມທັງຊຸກຍູ້ໃຫ້ຜູ້ປະກອບການຢາງພາລາທົ່ວປະເທດໄດ້ຮັບສິດ ແລະ ຜົນປະໂຫຍດ.

          ທ່ານ ໄມພົມ ມະລີ ຫົວໜ້າໂຄງການປູກໄມ້ອຸດສາຫະກໍາຢາງພາລາເປັນສິນຄ້າ ໄດ້ລາຍງານວ່າ: ໂຄງການປູກຢາງພາລາເປັນສິນຄ້າເປັນໂຄງຕົວແບບທີ່ບໍ່ນໍາໃຊ້ເຄມີ ໄດ້ເລີ່ມປະຕິບັດມາແຕ່ປີ 2006

ໂດຍເບື້ອງຕົ້ນມີເນື້ອທີ່ 100 ເຮັກຕາ, ຈາກນັ້ນໄດ້ຂະຫຍາຍເນື້ອທີ່ອອກ ໂດຍປະຊາຊົນເປັນແຮງງານ ແລະ ດິນ ໃນຮູບແບບ 2+3 ມາຮອດປີ 2009 ໄດ້ຂະຫຍາຍເປັນ 374 ເຮັກຕາ, ພ້ອມຍັງໄດ້ສະໜັບສະໜູນໃຫ້ປະຊາຊົນຢູ່ເຂດໃກ້ຄຽງ ແລະ ເຂດອື່ນໆສົນໃຈປູກ 2.000 ກວ່າເຮັກຕາ ແລະ ໄດ້ເລີ່ມກີດຢາງມາແຕ່ປີ 2013 ເປັນຕົ້ນມາ ສະເລ່ຍ 20 ໂຕນຕໍ່ເດືອນ. ນອກນີ້ຍັງໄດ້ຮັບຊື້ຢາງຈາກສະມາຊິກ ແລະ ສວນຢາງອື່ນໆໃນລາຄາຄໍ້າປະກັນ 4.000 ກີບຕໍ່ກິໂລ ສ່ວນການຂາຍແມ່ນມີ 2 ຮູບແບບ ຄືຂາຍຢູ່ກັບທີ່ (ຢາງດິບ) ແມ່ນ 5.500 ກີບ ຕໍ່ກິໂລ, ແຕ່ຖ້າຜ່ານການອັດແໜ້ນຈາກໂຮງງານຈະຂາຍ 7.500 ກີບຕໍ່ກິໂລ ສາມາດສ້າງລາຍຮັບໄດ້ບໍ່ຫຼຸດ 50 ລ້ານກີບຕໍ່ເດືອນ, ສ່ວນປະຊາຊົນທີ່ມາຮັບກີດຢາງໃຫ້ໂຄງການແມ່ນມີລາຍຮັບແຕ່ 17-38 ລ້ານກີບຕໍ່ປີ ມີ 30 ຄອບຄົວ ປັດຈຸບັນຢາງພາລາທີ່ເປັນຕົວແບບສາມາດກີດຢາງໄດ້ແມ່ນ 30% ແລະ ຍັງ 200 ເຮັກຕາ ເທົ່າກັບ 70% ຂອງຕົ້ນຢາງທັງໝົດແມ່ນຍັງບໍ່ໄດ້ກີດ ຍ້ອນຂາດແຮງງານ ເຊິ່ງມີຄວາມຕ້ອງການເຖິງ 100-150 ຄອບຄົວ ແລະ ຖ້າກີດໄດ້ໝົດຈະໄດ້ປະມານ 45 ໂຕນຕໍ່ເດືອນ.

          ສັງລວມແລ້ວການປູກຢາງພາລາໂຄງການນີ້ ແມ່ນມີຜົນດີເພາະຢາງພາລາສາມາດກີດຢາງໄດ້ເຖິງ 9 ເດືອນຕໍ່ປີ ເຊິ່ງຈະຊ່ວຍໃຫ້ປະຊາຊົນມີລາຍຮັບຢ່າງຕໍ່ເນື່ອງ ເຮັດໃຫ້ເຂົາເຈົ້າມີວຽກເຮັດງານທໍາ ແລະ ຫັນຈາກການຖ່າງປ່າເຮັດໄຮ່ໄດ້ຢ່າງສິ້ນເຊີງ. ນອກຈາກການປູກຢາງພາລາແລ້ວຍັງໄດ້ລ້ຽງປາ, ລ້ຽງສັດນ້ອຍ, ໝາກໄມ້ຊະນິດອື່ນໆຕື່ມອີກ ເພື່ອແກ້ໄຂຊີວິດການເປັນຢູ່ໃຫ້ສະມາຊິກ. ພ້ອມນີ້ຍັງໄດ້ຮ່ວມມືກັບນັກທຸລະກິດຈີນປູກໄມ້ກ້ຽງໃຫຍ່ 70.000 ຕົ້ນ ຢູ່ເມືອງກາສີ ໃນເນື້ອໃນ 150 ກວ່າເຮັກຕາ ປັດຈຸບັນປູກໄດ້ 2 ປີ ແລະ ກຽມກ້າວສູ່ການສ້າງຕັ້ງໂຮງງານຜະລິດເພື່ອສົ່ງອອກ. ນອກນີ້ຍັງໄດ້ກ້າ ແລະ ສະໜອງເບ້ຍໃຫ້ປະຊາຊົນອ້ອມຂ້າງໄປປູກ ແລ້ວນໍາຜົນຜະລິດມາຂາຍໃຫ້ກຸ່ມດ້ວຍລາຄາເໝາະສົມ. ໂອກາດນີ້ຂ້າພະເຈົ້າກໍຂໍຮຽກຮ້ອງໃຫ້ຂັ້ນເທິງຊ່ວຍດ້ານຕະຫຼາດ ຄໍ້າປະກັນດ້ານລາຄາ ແລະ ໂຮງງານແປຮູບ ເພື່ອສ້າງມູນຄ່າເພີ່ມໃຫ້ຢາງພາລາລາວສູງຂຶ້ນ. ສໍາລັບແຜນການຕໍ່ໜ້າພວກເຮົາຈະສຸມໃສ່ປົກປັກຮັກສາພືດຕ່າງໆທີ່ປູກໄປແລ້ວໃຫ້ໄດ້ຮັບຜົນດີ. ນອກນີ້ກໍຈະຊອກແຮງງານກີດຢາງໃຫ້ພຽງພໍ ແລະ ພ້ອມນີ້ຍັງມີແຜນລ້ຽງງົວ ແລະ ສັດອື່ນໆອີກ.   

          ຜ່ານການລົງຢ້ຽມຢາມຄັ້ງນີ້, ທ່ານ ວິໄລວັນ ພົມເຂ ກໍໄດ້ສະແດງຄວາມຊົມເຊີຍຕໍ່ໂຄງການປູກໄມ້ອຸດສາຫະກໍາຢາງພາລາເປັນສິນຄ້າທີ່ສາມາດສ້າງຄວາມເຂັ້ມແຂງດ້ວຍຕົນເອງ ພ້ອມທັງສາມາດສ້າງວຽກເຮັດງານທໍາແລະ ສ້າງລາຍຮັບໃຫ້ປະຊາຊົນຕາມນະໂຍບາຍຂອງພັກ ແລະ ລັດຖະບານ ແລະ ທ່ານຍັງໄດ້ຮຽກຮ້ອງໃຫ້ຜູ້ປະກອບການຢາງພາລາທົ່ວປະເທດຈົ່ງມີຄວາມເຊື່ອໝັ້ນພາຍຫຼັງການສ້າງຕັ້ງສະມາຄົມຂຶ້ນແລ້ວຈະສາມາດຄໍ້າປະກັນລາຄາຢາງພາລາທີ່ເໝາະສົມ ສໍາລັບກຸ່ມບໍລິສັດພັດທະນາກະສິກໍາແຂວງຢຸນນານ ສປ.ຈີນ ກໍໃຫ້ຄວາມສົນໃຈຕໍ່ໂຄງການປູກໄມ້ອຸດສາຫະກໍາດັ່ງກ່າວ ພ້ອມທັງຈະນໍາເອົາຂໍ້ມູນທີ່ໄດ້ຮັບໄປສຶກສາເພີ່ມຕື່ມ ເພື່ອຈະກ້າວໄປເຖິງການຮ່ວມມືກັບໂຄງການດັ່ງກ່າວໃນການເກັບຊື້ ກໍຄືການສ້າງຕັ້ງໂຮງງານປຸງແຕ່ງຢາງພາລາເພື່ອສົ່ງອອກໃນຕໍ່ໜ້າ.