ພາກສ່ວນກ່ຽວຂ້ອງຄວນກວດກາຄືນລົດບັນທຸກດິນ-ຫີນ-ຊາຍ

             ປັດຈຸບັນ ນະຄອນຫລວງພວມເລັ່ງອະນາໄມປະດັບປະດາຕົວເມືອງ ເພື່ອເປັນເຈົ້າພາບຈັດກອງປະຊຸມສຸດຍອດອາຊຽນ ແລະ ກອງປະຊຸມສຳຄັນປິ່ນອ້ອມອື່ນໆໃຫ້ປະສົບຜົນສຳເລັດຈົບງາມ, ແຕ່ໃນຂະນະນັ້ນ ພັດບໍ່ສາມາດຄວບຄຸມລົດແກ່ດິນ ແລະ ຫີນ-ຊາຍຕ່າງໆເຂົ້າມາເຂດໂຄງການກໍ່ສ້າງຕ່າງໆໃນຕົວເມືອງ ອັນໄດ້ສົ່ງຜົນໃຫ້ຫລາຍເສັ້ນທາງເກີດຄວາມເປື້ອນເປິະ ດັ່ງໃນຕອນບ່າຍຂອງວັນທີ 18 ກໍລະກົດນີ້ ນັກຂ່າວຂອງພວກເຮົາໄດ້ສັງເກດເຫັນລົດບັນທຸກດິນ, ຫີນ, ຊາຍຈຳນວນໜຶ່ງທີ່ຂາດການປົກປິດທີ່ດີແລ່ນເຂົ້າ-ອອກໂຄງການກໍ່ສ້າງເຂດຕະຫລາດເຊົ້າ ເຮັດໃຫ້ດິນ-ຫີນ-ຊາຍຕົກ ເຮ່ຍໄປທົ່ວເສັ້ນທາງ ແລະ ບໍ່ພຽງແຕ່ເທົ່ານັ້ນ ຂີ້ດິນ, ຂີ້ຕົມທີ່ຕິດຕີນລົດດັ່ງກ່າວກໍສົ່ງຜົນໃຫ້ເສັ້ນທາງເປື້ອນເປິະຕື່ມ ສ້າງຄວາມບໍ່ສະດວກໃຫ້ການສັນຈອນໃນຫລາຍເສັ້ນທາງ ສົ່ງຜົນຕໍ່ສະພາບແວດລ້ອມຂອງຕົວເມືອງ, ເຖິງວ່າຜ່ານມາພາກສ່ວນກ່ຽວຂ້ອງ ກໍຄືອົງການບໍລິຫານ ແລະ ພັດທະນາຕົວເມືອງວຽງຈັນ (ອພບ) ໄດ້ອອກມາດຕະການຄວບຄຸມໂຄງການກໍ່ສ້າງ ແລະ ລົດບັນທຸກເຫລົ່ານັ້ນ, ແຕ່ການລະເມີດລະບຽບຂອງຜູ້ປະກອບການດັ່ງກ່າວຍັງມີຢູ່ຫລາຍ

ແລະ ຖ້າປະປ່ອຍໄປແບບນີ້ກໍຈະສົ່ງຜົນໃຫ້ການຈັດຕັ້ງປະຕິບັດ ສ.ສະອາດ ບໍ່ໄດ້ຜົນ, ພ້ອມເຮັດໃຫ້ພາບພົດອັນຈົບງາມຂອງນະຄອນ ຫລວງສູນເສຍ ແລະ ຈະບໍ່ເປັນທີ່ດຶງດູດໃຈຂອງແຂກບ້ານແຂກເມືອງຜູ້ມາເຮັດວຽກ ແລະ ທ່ຽວຊົມ. ດັ່ງນັ້ນ ຈຶ່ງສະເໜີໃຫ້ພາກສ່ວນກ່ຽວຂ້ອງຄວນມີມາດຕະການເຂັ້ມງວດຕື່ມຕໍ່ຜູ້ປະຕິບັດໂຄງການກໍ່ສ້າງໃນຕົວເມືອງ ແລະ ລົດບັນທຸກດິນ-ຫີນ-ຊາຍທີ່ແລ່ນເຂົ້າ-ອອກຕາມຕົວເມືອງ ແລະ ຄຽງຄູ່ກັນນັ້ນ ກໍຈະຕ້ອງໄດ້ເພີ່ມທະວີການອະນາໄມເສັ້ນທາງ ແລະ ລ້າງທາງໃຫ້ເປັນປະຈຳ, ບໍ່ແມ່ນວ່າຮອດມື້ບຸນມີງານຈຶ່ງຟ້າວຟັ່ງຮີບຮ້ອນເຮັດພໍແລ້ວຕີນແລ້ວມື.