ພະນະທ່ານນາຍົກລັດຖະມົນຕີ ທອງລຸນ ສີສຸລິດ ເດີນທາງໄປຮ່ວມກອງປະຊຸມສຸດຍອດອາເຊັມທີ່ອຸລານບາຕໍ

               ໃນວັນທີ 14 ກໍລະກົດ 2016, ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິ ປະໄຕ ປະຊາຊົນລາວ ພ້ອມພັນລະຍາ ໄດ້ນຳພາຄະນະຜູ້ແທນ ສປປ ລາວ ເດີນທາງໄປເຂົ້າຮ່ວມກອງປະຊຸມສຸດຍອດອາເຊັມ ຄັ້ງທີ 11 ເຊິ່ງຈະຈັດຂຶ້ນໃນລະຫວ່າງວັນທີ 15-16 ກໍລະກົດ 2016 ທີ່ນະຄອນຫລວງອຸລານບາຕໍ ປະເທດມົງໂກລີ ໂດຍຈະມີບັນດາຄະນະຜູ້ແທນຈາກປະເທດສະມາຊິກອາເຊັມເຂົ້າຮ່ວມຈຳນວນ 53 ຄະນະ.

             ກອງປະຊຸມພາຍໃຕ້ການເປັນປະທານຂອງທ່ານ Tsakhiagiin Elbegdorj ປະທານາທິບໍດີ ແຫ່ງ ມົງໂກລີ ແລະ ຈະດຳເນີນໄປພາຍໃຕ້ຫົວຂໍ້ “20 ປີ ແຫ່ງອາເຊັມ: ການເປັນຄູ່ຮ່ວມມື ເພື່ອການເຊື່ອມຈອດ” (20 Years of ASEM: Partnership for the Future through Connecti vity) ເຊິ່ງບັນດາຜູ້ນຳອາເຊັມຈະໄດ້ປຶກສາຫາລື, ແລກປ່ຽນ

ທັດສະນະ ແລະ ທົບທວນຄືນກ່ຽວກັບຜົນສຳເລັດ 20 ປີ ຂອງການເຄື່ອນໄຫວອາເຊັມ, ທາງດ້ານການເມືອງ, ການຮ່ວມມືທາງດ້ານເສດ ຖະກິດ, ການຄ້າ, ການລົງທຶນ, ການເງິນ, ການແລກປ່ຽນດ້ານວັດທະນະທຳ-ສັງຄົມ ແລະ ບັນຫາອື່ນໆທີ່ກ່ຽວຂ້ອງກັບພາກພື້ນ ແລະ ສາກົນ.

               ໃນໂອກາດດັ່ງກ່າວນີ້, ພະນະທ່ານ ນາຍົກລັດຖະມົນຕີ ທອງລຸນ ສີສຸລິດ ນອກຈາກຈະໄດ້ຂຶ້ນປະກອບຄຳເຫັນຕໍ່ກອງປະຊຸມແລ້ວ ຍັງມີແຜນຈະພົບປະສອງຝ່າຍກັບບັນດາຜູ້ນຳປະເທດເພື່ອນມິດຕ່າງໆເຊັ່ນ: ປະທານາທິບໍດີ ສ.ເກົາຫລີ, ນາຍົກລັດຖະມົນຕີເຢຍລະມັນ, ນາຍົກລັດຖະມົນຕີລຸກຊຳບວກ, ນາຍົກລັດຖະມົນຕີເນເທີແລນ, ນາຍົກລັດຖະມົນຕີເອສະໂຕເນຍ ແລະ ນາຍົກລັດຖະມົນຕີຫວຽດນາມ ເພື່ອປຶກສາຫາລື ແລະ ຊຸກຍູ້ສົ່ງເສີມການພົວພັນຮ່ວມມືສອງຝ່າຍ ລະຫວ່າງ ສປປ ລາວ ແລະ ບັນດາປະເທດດັ່ງກ່າວ.