ຄຳສັ່ງນາຍົກ 15/ນຍ ຊ່ວຍຍູ້ແຜນງານຄ້າໄມ້ກັບສາກົນດີຂຶ້ນ

             ຄະນະຊີ້ນຳລະດັບຊາດກ່ຽວກັບການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ, ການຄ້າໄມ້ ແລະ ການເປັນຄູ່ຮ່ວມສັນຍາການຄ້າແບບສະໝັກໃຈ FLEGT/VPA ໄດ້ປຶກສາຫາລືແຜນງານດັ່ງ ກ່າວໃນການຈັດຕັ້ງປະຕິບັດຄຳສັ່ງເລກທີ 15/ນຍ ຂອງນາຍົກລັດຖະມົນຕີແຫ່ງ ສປປ ລາວ ວ່າດ້ວຍການຄຸ້ມຄອງປ່າໄມ້ ແລະ ທຸລະກິດໄມ້ ເພື່ອສົ່ງເສີມການຄຸ້ມຄອງຊັບພະຍາກອນປ່າໄມ້ ແລະ ການຄ້າໄມ້ທີ່ຖືກຕ້ອງຕາມລະບຽບກົດໝາຍກັບສະຫະພາບເອີຣົບ, ອາຊຽນ, ຈີນ, ເກົາຫລີ, ຍີ່ປຸ່ນ, ອາເມລິກາ ແລະ ອື່ນໆ.

            ທ່ານຫົວໜ້າກົມປ່າໄມ້ ມີຄຳເຫັນວ່າ: ຄຳສັ່ງເລກທີ 15/ນຍ ແມ່ນນິຕິກຳສຳຄັນ ເພື່ອເພີ່ມທະວີການຈັດຕັ້ງປະຕິບັດວຽກງານຄຸ້ມຄອງປ່າໄມ້, ທຸລະກິດໄມ້ທຸກຮູບແບບໃຫ້ຖືກຕ້ອງຕາມລະບຽບກົດໝາຍ ແລະ ມີຜົນສັກສິດ, ທັງເປັນການສະກັດກັ້ນປາກົດການຫຍໍ້ທໍ້ຕ່າງໆໃນຂົງເຂດປ່າໄມ້ໃຫ້ໝົດໄປເທື່ອລະກ້າວ. ສະນັ້ນ ແຜນງານ FLEGT ຈະສົ່ງເສີມການຈັດຕັ້ງປະຕິບັດຄຳສັ່ງດັ່ງກ່າວຢ່າງເຕັມສ່ວນ ເພື່ອແກ້ໄຂບັນຫາການທຳລາຍປ່າໄມ້ ເພາະວ່າເນື້ອໃນສຳຄັນຂອງແຜນ

ງານດັ່ງກ່າວແມ່ນການໃຫ້ນິຍາມຄວາມຖືກຕ້ອງທາງດ້ານກົດໝາຍຂອງໄມ້, ແຫລ່ງທີ່ມາຂອງໄມ້ ແລະ ວິທີການຕິດ ຕາມການເຄື່ອນຍ້າຍຂອງຕ່ອງໂສ້ການສະໜອງໄມ້ ແລະ ນິຍາມດັ່ງກ່າວຈະເປັນອົງປະກອບສຳຄັນໃນຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ (VPA) ເຊິ່ງແມ່ນສັນຍາການຄ້າລະຫວ່າງສະຫະພາບເອີຣົບ ແລະ ບັນດາປະເທດທີ່ສົ່ງອອກໄມ້ທີ່ຖືກກົດໝາຍ ແລະ ຈະນຳໄປສະເໜີໃນການເຈລະຈາຄັ້ງທຳອິດລະຫວ່າງລັດຖະບານລາວ ແລະ ສະຫະພາບເອີຣົບໃນທ້າຍປີ 2016 ນີ້.

               ທ່ານປະທານສະມາຄົມອຸດສາຫະກຳປຸງແຕ່ງໄມ້ລາວ ກ່າວວ່າ: ຄຳສັ່ງ 15/ນຍ ຂອງນາຍົກລັດຖະ ມົນຕີ ຊ່ວຍເສີມສ້າງຄວາມອາດສາມາດໃນການແຂ່ງຂັນຂອງອຸດສາຫະກຳປຸງແຕ່ງໄມ້ຂອງລາວ ໂດຍສະເພາະແມ່ນການປັບປຸງການສະໜອງວັດຖຸດິບແບບຍືນຍົງ, ພັດທະນາຄຸນນະພາບຂອງຜະລິດຕະພັນໄມ້ ແລະ ສີໄມ້ລາຍມືຂອງກຳມະກອນນາຍຊ່າງລາວໃນຂະແໜງປຸງແຕ່ງໄມ້ ທັງເປັນການສົ່ງເສີມການແຂ່ງຂັນຂອງຜະລິດຕະພັນໄມ້ລາວໃນຕະຫລາດສາກົນ.

               ກອງປະຊຸມດັ່ງກ່າວຈັດຂຶ້ນເມື່ອວັນທີ 12 ກໍລະກົດນີ້ ທີ່ແຂວງຫລວງພະບາງ, ມີຮອງລັດຖະມົນຕີກະຊວງກະສິກຳ-ປ່າໄມ້, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງຍຸຕິທຳ ພ້ອມຮອງເຈົ້າແຂວງອັດຕະປື, ຄຳມ່ວນ ແລະ ໄຊຍະບູລີ ແລະ ພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫລາຍ.