ຮອງລັດຖະມົນຕີກະຊວງກະສິກຳ ແລະ ປ່າໄມ້ລົງຊຸກຍູ້ການຜະລິດລະດູຝົນຢູ່ແຂວງອັດຕະປື

          ວັນທີ 29 ມິຖຸນານີ້, ທ່ານ ຄຳບຸນນັດ ໄຊຍະນົນ ຮອງລັດລັດຖະມົນຕີກະຊວງກະສິກຳ ແລະ ປ່າໄມ້, ທັງເປັນຜູ້ຊີ້ນຳວຽກງານສົ່ງເສີມກະສິກຳ ແລະ ສະຫະກອນ, ໄດ້ລົງເຄື່ອນໄຫວຊຸກຍູ້ການຜະລິດລະດູຝົນຂອງປະຊາຊົນແຂວງອັດຕະປື, ເພື່ອເຮັດແນວໃດໃຫ້ແຂວງ ດັ່ງກ່າວສາມາດຄ້ຳປະກັນສະບຽງອາຫານ ແລະ ຜະລິດເປັນສິນຄ້າໃຫ້ໄດ້ຫຼາຍກວ່າເກົ່າ ແລະ ໃນໂອກາດນີ້ຫົວໜ້າພະແນກກະສິກຳ ແລະ ປ່າໄມ້ແຂວງດັ່ງກ່າວກໍໄດ້ລາຍງານສະພາບການຜະລິດລະດູຝົນຂອງກະສິກອນໃນ ແຂວງຂອງຕົນໃຫ້ທ່ານຮອງລັດຖະມົນຕີ ຊາບວ່າ: ສຳລັບການຜະລິດລະດູຝົນນີ້,ແຂວງອັດຕະປືມີແຜນປູກເຂົ້າໃຫ້ໄດ້ຫຼາຍ

ກວ່າ  24.078 ເຮັກຕາ, ຂະນະທີ່ປັດຈຸບັນກະສິກອນສາມາດປັກດຳໄດ້ແລ້ວຫຼາຍກວ່າ 7 % ຂອງເນື້ອທີ່ຄາດໝາຍດັ່ງກ່າວ, ສຳລັບການຜະລິດເປັນສິນຄ້າພົ້ນເດັ່ນແມ່ນຂະບວນການປູກໝາກໂມ, ໝາກແຕງ, ຖົ່ວ ແລະ ພືດອຸດສາຫະກຳອື່ນໆເຊັ່ນ:  ສາລີ, ມັນຕົ້ນ ແລະ ອ້ອຍ ແລະ ປັດຈຸບັນເຂົາເຈົ້າກໍພວມສຸມໃສ່ກະກຽມໃຫ້ແກ່ວັນອະນຸລັກສັດນ້ຳ-ສັດປ່າແຫ່ງຊາດ 13 ກໍລະກົດນີ້,ຄາດວ່າຈະປ່ອຍປາໃຫ້ໄດ້ 205.000 ໂຕ. ໃນໂອກາດນີ້ທ່ານຮອງ ລັດຖະມົນຕີໄດ້ແນະນຳໃຫ້ກະສິ ກຳແຂວງເປັນເຈົ້າການຫັນລົງຮາກຖານເພື່ອຊ່ວຍກະຕຸກ ຊຸກຍູ້ ແລະ ແນະນຳເຕັກນິກຕ່າງໆກ່ຽວກັບການປູກເຂົ້າໃຫ້ແກ່ຊາວກະສິກອນ, ເພື່ອຮັບປະກັນທາງດ້ານປະລິມານ ແລະ ຄຸນນະພາບ, ພ້ອມດຽວກັນນີ້ກໍໄດ້ຮ່ວມຫາລືກັບອຳນາດ ການປົກຄອງແຂວງກ່ຽວກັບການກະກຽມສ້າງຕັ້ງກຸ່ມການຜະລິດກະສິກຳ , ການປັບປຸງສູນ ແລະ ສະຖານີເຕັກນິກກະສິກຳຕ່າງໆພາຍໃນແຂວງເພື່ອຍົກສູງສະມັດຕະພາບການຜະລິດກະສິກຳຂອງທ້ອງຖິ່ນໃຫ້ດີຂຶ້ນກວ່າເກົ່າ.