ຜູ້ຕິດເຊື້ອໄຂ້ເລືອດອອກເພີ່ມເປັນ 3.200 ຄົນແລ້ວ

          ໜ່ວຍເຝົ້າລະວັງພະຍາດລະບາດ, ກະຊວງສາທາລະນະສຸກໃຫ້ຮູ້ວ່າ: ສະພາບການລະບາດຂອງພະຍາດໄຂ້ເລືອດອອກຢູ່ທົ່ວປະເທດເຮົາຍັງມີທ່າອ່ຽງເພີ່ມຂື້ນເລື້ອຍໆຄື: ນັບແຕ່ເດືອນມັງກອນມາຮອດປັດຈຸບັນທົ່ວປະເທດມີຜູ້ຕິດເຊື້ອໄຂ້ພະຍາດດັ່ງກ່າວຫຼາຍກວ່າ 3200 ກໍລະນີ, ເພີ່ມຂື້ນຈາກອາທິດຜ່ານມາເຖິງ 400 ກວ່າກໍລະນີ ແລະ ມີຜູ້ເສຍຊີວິດແລ້ວ 9 ຄົນ, ໃນນັ້ນຮ້າຍແຮງກວ່າຫມູ່ຍັງແມ່ນຢູ່ແຂວງຈຳປາສັກຊຶ່ງມີຜູ້ຕິດເຊື້ອເພີ່ມເປັນ 1100 ກວ່າກໍລະນີ ແລະ ເສຍຊີວິດແລ້ວ 7 ຄົນ, ບໍລິຄຳໄຊ 470 ກໍລະນີ, ເສຍຊີວິດ 1 ຄົນ, ຄຳມ່ວນ 460 ກວ່າກໍລະນີ, ສະຫວັນນະເຂດ 280 ກວ່າກໍລະ ນີນະຄອນຫຼວງວຽງຈັນ 260   ກວ່າກໍລະນີ, ສາລະວັນ 160 ກວ່າກໍລະນີ້, ເສຍຊີວິດ 1 ຄົນ, ເຊກອງ 99 ກໍລະນີ, ອັດຕະປື 102 ກໍລະນີ, ຫຼວງພະບາງ 93 ກໍລະນີ, ອຸດົມໄຊ 74 ກໍລະນີ, ຫຼວງນ້ຳທາ 24 ກໍ ລະນີ, ແຂວງວຽງຈັນ 50 ກໍລະນີ, ໄຊຍະບູລີ 13 ກໍລະນີ, ສ່ວນແຂວງອື່ນໆກໍມີຜູ້ຕິດເຊື້ອຈຳນວນໜຶ່ງ, ຕໍ່ສະພາບການດັ່ງກ່າວທ່ານ ສີສະຫວາດ ຮອງຫົວໜ້າກົມຄວບຄຸມພະຍາດຕິດຕໍ່ກະ ຊວງສາທາລະນະສຸກໃຫ້ເຫດຜົນວ່າ: ປັດຈຸບັນເຖິງພາກສ່ວນກ່ຽວຂ້ອງຈະເອົາ ໃຈໃສ່ໃນການຄວບຄຸມການລະບາດຂອງພະຍາດດັ່ງກ່າວຢ່າງໃກ້ຊິດ,ໂດຍ

ສະເພາະແມ່ນເຂດທີ່ມີຄວາມສ່ຽງສູງທີ່ຈະເກີດການລະບາດຂອງພະຍາດັ່ງກ່າວ,ແຕ່ກໍຍັງເຮັດໄດ້ໜ້ອຍ,ຊຶ່ງອາດເປັນຍ້ອນປະຊາຊົນຈຳນວນໜຶ່ງຍັງບໍ່ທັນເອົາໃຈໃສ່ປ້ອງກັນ ແລະ ສະກັດກັ້ນພະຍາດດັ່ງກ່າວຢ່າງຈິງຈັງ,ເຂົາເຈົ້າບໍ່ສົນໃຈກັບການເຮັດອະນາໄມສິ່ງແວດລ້ອມອອ້ມແອ້ມເຮືອນຊານຂອງຕົນ,ບວກກັບຢາມຝົນຊຶ່ງເປັນເງື່ອນໄຂສະ ດວກໃຫ້ຍຸງລາຍແຜ່ພັນໄດ້ງ່າຍ ແລະ ຖ້າຫາກທຸກຄົນບໍ່ພ້ອມພຽງກັນປະຕິບັດວຽກງານປ້ອງກັນພະຍາດດັ່ງກ່າວ, ຍິ່ງຈະເພີ່ມຄວາມຍຸ້ງຍາກໃນການຄວບຄຸມ, ສະນັ້ນຈຶ່ງສະເໜີໃຫ້ບັນດາແຂວງເພີ່ມທະວີການເຝົ້າລະວັງ ແລະ ຕອບໂຕ້ກັບພະຍາດດັ່ງກ່າວຢ່າງແຂງແຮງ, ຖ້າຫາກມີລັກຊະນະເກີດຂື້ນ ແບບເປັນກຸ່ມພ້ອມກັນເປັນຈຳນວນຫຼາຍຄົນ, ໃຫ້ອຳນາດການປົກຄອງທ້ອງຖິ່ນລາຍງານໃຫ້ພາກ ສ່ວນກວງຂ້ອງຂອງສາທາລະນະສຸກຊາບໂດຍດ່ວນ, ເພື່ອສາມາຕ້ອບໂຕ້ໄດ້ທັນເວລາ, ພ້ອມກັນນັ້ນກໍໃຫ້ປະຊາຊົນເອົາໃຈໃສ່ທຳລາຍແຫຼ່ງເພາະພັນຂອງຍຸງລາຍໃຫ້ມີປະສິດທິຜົນ, ດ້ວຍການປະຕິບັດຕາມຫຼັກການ 5 ປ ທີ່ກະຊວງສາທາລະນະສຸກວາງອອກຢ່າງເຂັ້ມງວດຄື: 1 ປິດຝາພາຊະນະທີ່ມີນ້ຳພາຍໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂໃສ່, 2 ປ່ຽນນ້ຳ ແລະ ຜັດຖູພາຊະນະເຊັ່ນ: ເຕົ້າດອກໄມ້, ນ້ຳຮອງຕີນຕູ້ເຢັນ, ຖ່ານຮອງຈອກນ້ຳ,  3 ປ່ອຍປາຫາງນົກຍຸງເພື່ອກິນໜອນນ້ຳຍຸງລາຍ,  4 ປັບປຸງບໍ່ໃຫ້ມີນ້ຳຄ້າງ, ນ້ຳຂັງໃນກະໂປະກະປ໋ອງ, ຮາງລິນ ແລະ ຢ່າງຕີນລົດເກົ່າ,   5 ປະຕິບັດເປັນປະຈຳທຸກໆອາທິດ ແລະ ຖ້າຫາກເປັນໄຂ້ໃຫ້ໄປປິ່ນປົ່ວຢູ່ໂຮງໝໍ ຫຼື ສຸກສາລາໃກ້ບ້ານ,ພ້ອມທັງເຮັດທຸກວິທີ່ເພື່ອປ້ອງກັນຕົນເອງ ແລະ ຄົນທີ່ທ່ານຮັກຢ່າງມີປະສິດທິຜົນ.