ລາວ-ສະຫະລັດອາເມລິກາຕົກລົງເຫັນດີເພີ່ມທະວີການຮ່ວມມືສອງຝ່າຍ

            ໃນໂອກາດຢ້ຽມຢາມສາທາລະນະລັດ ປະຊາທິປະໄຕ ປະຊາຊົນລາວ ຄັ້ງປະຫວັດສາດຂອງທ່ານປະທານາທິບໍດີສະຫະລັດອາເມລິກາ ບາຣັກ ໂອບາມາ ແຕ່ລະຫວ່າງວັນທີ 6-8 ກັນຍານີ້ ແລະ ໄດ້ພົບປະຢ່າງເປັນທາງການກັບທ່ານປະທານປະເທດ ບຸນຍັງ ວໍລະຈິດ ໃນວັນທີ 6 ກັນຍານັ້ນ, ສອງຝ່າຍໄດ້ຕົກລົງເຫັນດີເພີ່ມທະວີການເປັນຄູ່ຮ່ວມມືແບບກວມລວມລະຫວ່າງສອງປະເທດ ເພື່ອເສີມຂະ ຫຍາຍການພົວພັນສອງຝ່າຍບົນພື້ນຖານການເຄົາລົບເຊິ່ງກັນ ແລະ ກັນ, ມີຜົນປະໂຫຍດ, ທັງຮໍາບາດແຜທີ່ມີໃນອະດິດເພື່ອສ້າງພື້ນຖານໃຫ້ແກ່ການຮ່ວມມືທີ່ດີໃນອະນາຄົດ ຊຶ່ງໃນຖະແຫລງການຮ່ວມລະຫວ່າງ ສປປ ລາວ ແລະ ສະຫະລັດອາເມລິກາ ໃນໂອກາດຢ້ຽມຢາມຄັ້ງນີ້ ໄດ້ລະບຸວ່າ: ສອງຝ່າຍມີຄວາມມຸ່ງໝັ້ນທີ່ຈະເພີ່ມທະວີການແລກປ່ຽນຢ້ຽມຢາມໃນລະດັບສູງ ແລະ ລະດັບຕ່າງໆ ເພື່ອເພີ່ມທະວີການປຶກສາຫາລືກົນໄການຮ່ວມມືນໍາກັນ, ສອງຝ່າຍໄດ້ຢືນຢັນການຮ່ວມມືທີ່ມີການຂະ ຫຍາຍຕົວໃນການແກ້ໄຂບັນຫາ

ລະເບີດຕົກຄ້າງຈາກສົງຄາມ ເພື່ອແນ່ໃສ່ເພີ່ມທະວີຄວາມເຊື່ອໝັ້ນຊຶ່ງກັນ ແລະ ກັນ, ໂດຍສະເພາະທ່ານ ບາຣັກ ໂອບາມາ ໄດ້ປະກາດເພີ່ມການຊ່ວຍເຫລືອລາວ ຈໍານວນ 90 ລ້ານໂດລາສະຫະລັດໃນໄລຍະ 3 ປີຕໍ່ໜ້າສໍາລັບວຽກງານເກັບກູ້ລະເບີດບໍ່ທັນແຕກໃນຂອບເຂດທົ່ວປະເທດ, ພ້ອມທັງຕີລາຄາສູງຕໍ່ການຮ່ວມມືຂອງລາວໃນວຽກງານຊອກຫາຜູ້ສູນຫາຍໃນປາງສົງຄາມໃນໄລຍະຜ່ານມາ, ລວມເຖິງການພິຈາລະນາການອະນຸມັດຂອງອາເມລິກາກ່ຽວກັບສິດທິພິເສດທາງດ້ານການຄ້າໃຫ້ແກ່ລາວ, ສ່ວນການຮ່ວມມືໃນດ້ານການສຶກສາ, ວັດທະນະທໍາ ແລະ ສາຍພົວພັນລະຫວ່າງປະຊາຊົນສອງປະເທດນັ້ນ, ທ່ານ ບາຣັກ ໂອບາມາ ໄດ້ປະກາດຂໍ້ລິເລີ່ມໂຄງການການສຶກສາຂັ້ນພື້ນຖານ ແລະ ສປປ ລາວ ຈະເປັນປະເທດໄດ້ຮັບທຶນການສຶກສາຈາກລັດຖະບານອາເມລິກາໃນໂຄງການດັ່ງກ່າວເພື່ອໃຫ້ເດັກຍິງໄດ້ເຂົ້າຮັບການສຶກສາ, ສ່ວນສະໜອງການຊ່ວຍເຫລືອມູນຄ່າ 27 ລ້ານໂດລາສະຫະລັດ ໃນໂຄງການອາຫານສໍາລັບໂຮງຮຽນໃນໄລຍະ 5 ປີຢູ່ລາວກໍເຫັນວ່າໄດ້ຮັບຜົນດີ. ສອງຝ່າຍສະແດງຄວາມຍີນດີຕໍ່ການສ້າງຕັ້ງສະຖາບັນໂພສະນາການລາວ-ອາເມລິກາ ຊຶ່ງເຫັນວ່າສອດຄ່ອງກັບຄວາມພະຍາຍາມຂອງລາວໃນການບັນລຸເປົ້າໝາຍຂອງການພັດທະນາແບບຍືນຍົງ ແລະ ເປັນການຮັບປະກັນໃຫ້ເດັກນ້ອຍລາວໄດ້ຮັບການສະໜອງທາງດ້ານໂພສະນາການທີ່ດີ, ໂດຍສະເພາະໂຄງການໃນສາມປີຕໍ່ໜ້າຂອງອົງການຢູເສດໃນມູນຄ່າ 6 ລ້ານໂດລາສະຫະລັດຈະຊຸກຍູ້ໃຫ້ແກ່ໂຄງການອະນາໄມຂອງຊຸມຊົນ ແລະ ສະບຽງອາຫານສໍາລັບແມ່ ແລະ ເດັກຢູ່ເມືອງເປົ້າໝາຍໃນລາວ, ນອກຈາກນີ້ສະຫະລັດອາເມລິກາຍັງຢືນຢັນທີ່ຈະສືບຕໍ່ສະໜອງການຊ່ວຍເຫລືອດ້ານການປິ່ນປົວທາງການແພດ ແລະ ການເບິ່ງແຍງອື່ນໆສໍາລັບຄົນພິການໂດຍບໍ່ຂຶ້ນກັບວ່າມີສາເຫດມາຈາກອັນໃດ, ນອກຈາກນີ້ຜູ້ນໍາທັງສອງປະເທດຍັງໄດ້ຢືນຢັນທີ່ຈະໃຫ້ມີການຊຸກຍູ້ສົ່ງເສີມການໄປມາຫາສູ່ລະຫວ່າງປະຊາຊົນສອງປະເທດ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນລະຫວ່າງລາວ ແລະ ອາເມລິກາໃຫ້ນັບມື້ແໜ້ນແຟ້ນຂຶ້ນ.