ຜົນກອງປະຊຸມສຸດຍອດອາຊຽນກັບຄູ່່ຮ່ວມເຈລະຈາ ແລະ ອາຊີຕາເວັນອອກ

            ໃນວັນທີ 8 ກັນຍານີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເປັນປະທານກອງປະຊຸມສຸດຍອດອາຊຽນກັບຄູ່ເຈລະຈາ ຄື: ກອງປະຊຸມສຸດຍອດອາຊຽນ-ອິນເດຍຄັ້ງທີ 14, ກອງປະຊຸມສຸດຍອດອາຊຽນ-ສະຫະລັດອາເມລິກາ ຄັ້ງທີ 4 ແລະ ກອງປະຊຸມສຸດຍອດອາຊີຕາເວັນອອກຄັ້ງທີ 11. ຊຶ່ງບັນດາຜູ້ນຳອາຊຽນ ແລະ ຄູ່ເຈລະຈາ ໄດ້ທົບທວນຄືນໝາກຜົນຂອງການຮ່ວມມືດ້ານຕ່າງໆໃນໄລຍະຜ່ານ, ພ້ອມທັງໄດ້ກໍານົດທິດທາງແຜນການສຳລັບການຮ່ວມມືໃນອະນາຄົດ, ຊຶ່ງຜົນຂອງແຕ່ລະກອງປະຊຸມມີດ່ັງລຸ່ມນີ້: ກອງປະຊຸມສຸດຍອດອາຊຽນ-ອິນເດຍ ຄັ້ງທີ 14 ໄດ້ຕີລາຄາສູງຕໍ່ການຮ່ວມມືອາຊຽນ-ອິນເດຍ ຕະຫລອດ ໄລຍະ 24 ປີ ທີ່ຜ່ານມາ ເປັນຕົ້ນແມ່ນ ດ້ານການເຊື່ອມຈອດ, ການຄ້າ, ການລົງທຶນ, ໄອຊີທີ, ວິທະຍາສາດ-ເຕັກໂນໂລຊີ ຕະຫລອດເຖິງ ການໄປມາຫາສູ່ ລະ ຫວ່າງປະຊາຊົນ, ຜູ້ນຳຂອງອາຊຽນ ໄດ້ຕີລາສູງຕໍ່ຄວາມໝາຍໝັ້ນຂອງອິນເດຍ ເພື່ອຮັດແໜ້ນການຮ່ວມມືກັບອາຊຽນ ຜ່ານນະໂຍບາຍຫັນສູ່ຕາເວັນອອກ. ກອງປະຊຸມເຫັນວ່າ ອາຊຽນ ແລະ ອິນເດຍ ຍັງມີທ່າແຮງທີ່ຈະຮ່ວມມືກັນ ແນໃສ່ເພີ່ມທະວີ

ມູນຄ່າການຄ້າ ແລະ ການລົງທຶນໃຫ້ຫລາຍຂຶ້ນ. ກອງປະຊຸມ ໄດ້ເນັ້ນເຖິງຄວາມສຳຄັນ ໃນການຮັດແໜ້ນການເຊື່ອມຈອດ ດ້ານພື້ນຖານໂຄງລ່າງ ແລະ ຂໍ້ມູນຂ່າວສານ ລະຫວ່າງ ອາຊຽນ ແລະ ອິນເດຍ ລວມທັງການນຳໃຊ້ກອງທຶນ ສິນເຊື່ອມູນຄ່າ 1 ຕື້ໂດລາສະຫະລັດ ທີ່ ອິນເດຍ ໄດ້ປະກາດໃນປີຜ່ານມາ ເພື່ອຈັດຕັ້ງປະຕິບັດໂຄງການເຊື່ອມຈອດຕ່າງໆ. ນອກຈາກນັ້ນ, ບັນດາຜູ້ນຳ ໄດ້ເຫັນດີຈະຈັດກິດຈະກຳ ສະເຫລີມສະຫລອງ ການພົວພັນອາຊຽນ-ອິນເດຍ ຄົບຮອບ 25 ປີ ໃນປີ 2017.

          ກອງປະຊຸມສຸດຍອດອາຊຽນ-ສະຫະລັດອາເມລິກາ ຄັ້ງທີ 4 ໄດ້ຕີລາຄາສູງ ຕໍ່ການຮ່ວມມືໃນ ພາກພື້ນອາຊີ-ປາຊີຟິກ ລວມທັງອາຊຽນ ໂດຍຜ່ານນະໂຍບາຍຜູກພັນ ກັບອາຊີຂອງ ສະຫະລັດອາເມລິກາ ຜູ້ນໍາອາຊຽນ ແລະ ສະຫະລັດ ໄດ້ສະແດງຄວາມຍິນດີ ຕໍ່ຄວາມຄືບໜ້າຂອງ ການຮ່ວມມື ລະຫວ່າງອາຊຽນ ແລະ ສະຫະລັດ ໂດຍສະເພາະພາຍຫລັງທ່ີສອງຝ່າຍ ໄດ້ເຫັນດີຍົກລະດັບການພົວພັນຂຶ້ນເປັນຄູ່ຮ່ວມຍຸດທະສາດ ໃນປີຜ່ານມາ, ໃນນັ້ນໄດ້ຕີລາຄາ ສູງຕໍ່ຜົນສຳເລັດຂອງການຈັດກອງປະຊຸມສຸດຍອດສະໄໝພິເສດ ອາຊຽນ-ສະຫະລັດອາເມລິກາ ໃນຕົ້ນປີນີ້ ຢູ່ ຊັນນີແລນ, ສະຫະລັດອາເມລິກາ. ກອງປະຊຸມເຫັນດີໃຫ້ເຈົ້າໜ້າທີ່ກ່ຽວຂ້ອງ ຂອງສອງຝ່າຍ ສືບຕໍ່ເຮັດວຽກຮ່ວມກັນຢ່າງໃກ້ຊິດ ເພື່ອຈັດຕັ້ງຜັນຂະຫຍາຍແຜນປະຕິບັດງານ 5 ປີ (2016-2020) ແລະ ບັນດາຂໍ້ລິເລີ່ມຂອງສະຫະລັດອາເມລິກາ ເພື່ອສົ່ງເສີມການຮ່ວມມືດ້ານເສດຖະກິດ, ການຄ້າ ແລະ ພະລັງງານ. ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ຕີລາຄາສູງຕໍ່ການ ເດີນທາງມາເຂົ້າຮ່ວມກອງປະຊຸມ ກໍຄືການມາຢ້ຽມຢາມ ສປປ ລາວ ຂອງປະທານາທິບໍດີ ບາຣັກ ໂອບາມາ, ເຊິ່ງຖືເປັນຄັ້ງທຳອິດໃນປະຫວັດສາດທີ່ຜູ້ນຳສະຫະລັດໄດ້ມາຢ້ຽມຢາມ ສປປ ລາວ ຢ່າງເປັນທາງການ.

          ໃນກອງປະຊຸມສຸດຍອດອາຊີຕາເວັນອອກ ຄັ້ງທີ 11 ບັນດາຜູ້ນຳອາຊຽນ ແລະ 8 ປະເທດຄູ່ ເຈລະຈາ ຄື: ສປ ຈີນ, ຍີ່ປຸ່ນ, ສ. ເກົາຫລີ, ອິນເດຍ, ອົດສະຕຣາລີ, ນິວຊີແລນ, ສະຫະລັດອາເມ ລິກາ ແລະ ສະຫະພັນຣັດເຊຍ ໄດ້ຕີລາຄາຄືນການຮ່ວມມືໃນໄລຍະຜ່ານມາ ໂດຍສະເພາະແມ່ນການຈັດ ຕັ້ງ ປະຕິບັດ 6 ຂົງເຂດບູລິມະສິດ ຂອງ ອີເອເອສ ຄື: ການເງິນ, ການສຶກສາ, ພະລັງງານ ແລະ ສິ່ງແວດ ລ້ອມ, ວຽກງານສາທາລະນະສຸກ ແລະ ພະຍາດລະບາດ, ການຄຸ້ມຄອງໄພພິບັດ ແລະ ການເຊື່ອມຈອດ ອາຊຽນ ກໍຄືການຈັດຕັ້ງຜັນຂະຫຍາຍບັນດາຂໍ້ຕົກລົງ ແລະ ຖະແຫລງການຕ່າງໆ ໂດຍສະເພາະແມ່ນ ຖະແຫລງການກົວລາລຳເປີ ຄົບຮອບ 10 ປີ ແຫ່ງການສ້າງຕັ້ງ ອີເອເອສ ໃນການເປັນເວທີສຳລັັບຜູ້ນຳ ເພື່ອປຶກສາຫາລືບັນຫາຍຸດທະສາດ, ການເມືອງ ແລະ ເສດຖະກິດ ທີ່ມີຜົນປະ ໂຫຍດ ແລະ ມີຄວາມ ຫ່ວງໄຍຮ່ວມກັນ, ພ້້ອມທັງໄດ້ຢ້ຳຄືນຄວາມໝາຍໝັ້ນ ທີ່ຈະເສີມຂະຫຍາຍກົນໄກດັ່ງກ່າວນີ້ ໃຫ້ມີຄວາມ ເຂັ້ມແຂງຍິ່ງໆຂຶ້ນ ໃນຕໍ່ໜ້າ ແນ່ໃສ່ປະກອບສ່ວນເຂົ້າໃນຈຸດປະສົງລວມ ແຫ່ງການປົກປັກ ຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກທາງດ້ານເສດຖະກິດ ໃນພາກພື້ນອາຊີ ຕາເວັນອອກ ແລະ ໃນໂລກໂດຍລວມ. ອັນສຳຄັນບັນດາຜູ້ນຳ ອີເອເອສ ໄດ້ຮັບຮອງເອົາ ເອກະສານ ສຳຄັນຈຳນວນໜຶ່ງ ເຊັ່ນ: ຖະແຫລງການວຽງຈັນວ່າດ້ວຍ ການສົ່ງເສີມ ການຮ່ວມ ເພື່ອພັດທະນາ ພື້ນຖານໂຄງລ່າງ ຢູ່ອາຊີຕາເວັນອອກ ທີ່ສະເໜີໂດຍ ສປປ ລາວ; ຖະແຫລງການວ່າດ້ວຍ ການຊ່ວຍເຫລືອຊາວອົບພະຍົບ ໃນເວລາສຸກເສີນ ແລະ ການຄ້າມະນຸດ ແລະ ຖະແຫລງການ ວ່າດ້ວຍ ການບໍ່ແຜ່ຜາຍອາວຸດ.