ລາວ-ກຳປູເຈຍ ຕົກລົງຮ່ວມໃນຂົງເຂດກາໝາຍການຄ້າ ແລະ ຖິ່ນກຳເນີດ

            ໃນວັນທີ 8 ກັນຍານີ້, ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີຂອງລາວ ແລະ ທ່ານ ສໍລະສັກ ປານ ລັດຖະມົນຕີກະຊວງການຄ້າແຫ່ງຣາຊະນະຈັກກຳປູເຈຍ, ໄດ້ລົງນາມໃນບົດບັນທຶກຄວາມເຂົ້າໃຈວ່າດ້ວຍການຮ່ວມມືໃນຂົງເຂດເຄື່ອງໝາຍການຄ້າ ແລະ ຖິ່ນກຳເນີດ. ການລົງນາມດັ່ງກ່າວມີຂຶ້ນລະຫວ່າງການດຳເນີນກອງປະຊຸມສຸດຍອດອາ ຊຽນ 2016, ທັງເປັນປີທີ່ບັນດາປະຊາຊາດອາຊຽນກ້າວສູ່ການຮ່ວມຕົວກັນ ກາຍເປັນປະຊາຄົມເສດຖະກິດອາຊຽນທ່າມກາງບັນດາປະຊາຊາດໃນທົ່ວໂລກ ກຳລັງຫັນເປົ້າໝາຍສະຫັດສະວັດໄປສູ່ການພັດທະນາແບບຍືນຍົງ.

            ການລົງນາມຄັ້ງນີ້ເປັນນິມິດໝາຍອັນດີໃຫ້ແກ່ການຮ່ວມມືລະຫວ່າງສອງປະເທດທາງດ້ານວຽກງານຊັບສິນທາງປັນຍາ, ໂດຍສະເພາະໃນຂົງເຂດວຽກງານ ເຄື່ອງໝາຍການຄ້າ ແລະ ຖິ່ນກຳເນີດ

ເຊິ່ງຈະກາຍເປັນບາດກ້າວໜຶ່ງທີ່ເປັນພື້ນຖານໃຫ້ແກ່ການຮ່ວມມືທາງດ້ານເສດຖະກິດລະ ຫວ່່າງສອງປະເທດ, ເພື່ອຮອງຮັບໃຫ້ແກ່ການເຊື່ອມໂຍງເສດຖະກິດຂອງປະຊາຄົມເສດຖະກິດອາຊຽນ ທັງເປັນການຕອບສະໜອງໃຫ້ແກ່ການຈັດຕັ້ງປະຕິບັດ ແລະ ບັນລຸເຖິງເປົ້າໝາຍຍຸດທະສາດການພັດທະນາເສດຖະກິດຂອງປະຊາຄົມເສດຖະກິດອາຊຽນ ກໍຄືເປົ້າໝາຍສະຫະວັດການພັດທະນາ. ລັດຖະບານລາວ ກໍຄື ລັດຖະບານ ກຳປູເຈຍ ເຫັນໄດ້ເຖິງຄວາມສຳຄັນຂອງວຽກງານຊັບສິນທາງປັນຍາ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ພາຍໃນປະເທດ ແລະ ການຄ້າໃນລະດັບພາກພື້ນ ກໍຄືລະດັບສາກົນ.

             ສຳລັບ ສປປ ລາວ ການພັດທະນາວຽກງານຊັບສິນທາງປັນຍາຍັງປະເຊີນກັບສິ່ງທ້າທາຍຫລາຍດ້ານ ແລະ ມີຄວາມຈຳເປັນຕ້ອງມີການແລກປ່ຽນບົດຮຽນ ແລະ ປະສົບການກັບບັນດາປະ ເທດພາກພື້ນ ແລະ ສາກົນ ເພື່ອນຳມາດັດປັບ ໝູນໃຊ້ເຂົ້າໃນການພັດທະນາວຽກງານຊັບສິນທາງປັນຍາໃຫ້ມີປະສິດທິຜົນ ແນ່ໃສ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງລາວຫລາຍຂຶ້ນກວ່າເກົ່າ, ສ້າງເງື່ອນໄຂທີ່ອໍານວຍໃຫ້ ສປປ ລາວ ສາມາດເຊື່ອມໂຍງກັບພາກພື້ນ ແລະ ສາກົນ.