ເລຂາທິການໃຫຍ່ອົງການສະຫະປະຊາຊາດຢ້ຽມຢາມສະຖານທີ່ສຳຄັນຂອງລາວ

          ໃນໂອກາດທີ່ທ່ານ ບັນກີມູນ (Ban Ki Moon) ເລຂາທິການໃຫຍ່ອົງການ ສະຫະປະຊາຊາດ, ເດີນທາງມາຢ້ຽມຢາມ ແລະ ເຂົ້າຮ່ວມກອງ ປະຊຸມສຸດຍອດອາຊຽນຄັ້ງທີ 28 ແລະ 29 ທີ່ ສປປ ລາວ ເປັນເຈົ້າພາບ ແລະ ທ່ານໄດ້ໄປຢ້ຽມຢາມ “ໂຄງການບໍາບັດຜູ້ຕິດຢາເສບຕິດຂອງ ອົງການສະຫະປະຊາຊາດ ດ້ວຍຢາຫຼວງສົບທົບກັບຢາພື້ນເມືອງລາວ ແລະ ສຸຂະພາບຈິດບຳບັດ” ຢູ່ໂຮງໝໍເມືອງສີສັດຕະນາກ, ນະຄອນຫຼວງວຽງຈັນ.

          ເພື່ອແນໃສ່ການປິ່ນປົວຜູ້ປ່ວຍ ແລະ ການມີສ່ວນຮ່ວມຂອງກະຊວງສາທາລະນະສຸກ ໃນວຽກງານປິ່ນປົວຜູ້ປ່ວຍຈາກຢາເສບຕິດ, ໂດຍໄດ້ສ້າງໂຄງການ “ປິ່ນປົວເບິ່ງແຍງຜູ້ຊົມໃຊ້ ແລະ ຜູ້ຕິດຢາເສບຕິດຂັ້ນຊຸມຊົນ” ຂຶ້ນເພື່ອຮັບໃຊ້ສັງຄົມ, ເຊິ່ງໂຄງການດັ່ງກ່າວແມ່ນໄດ້ຮັບການສະໜັບສະໜູນຈາກອົງການ ສະຫະປະຊາຊາດ ແລະ ອົງການອະນາໄມໂລກ, ໂດຍເລີ່ມຈັດຕັ້ງປະຕິບັດມາແຕ່ໃນປີ 2015

ດ້ວຍງົບປະມານ 1 ຕື້ກວ່າກີບ. ປັດຈຸບັນ ໂຮງໝໍເມືອງສີສັດ ຕະນາກ ມີຄົນເຈັບທີ່ຕິດຢາເສບຕິດ 170 ຄົນ ແລະ ຄອບຄົວເຂົ້າມາປຶກສາບັນຫາສຸຂະ ພາບຈິດ ຫລາຍກວ່າ 388 ຄົນ, ໂຄງການດັ່ງກ່າວ ໄດ້ຊ່ວຍຫຼຸດຜ່ອນການລັງກຽດ ຂອງສັງຄົມຕໍ່ຄົນຕິດຢາເສບຕິດ, ການເຂົ້າຮັບການປິ່ນປົວຂອງຄົນເຈັບດ້ວຍຄວາມສະໝັກ ໃຈ, ທັງນີ້ກໍເພື່ອໃຫ້ປະຊາຊົນເຂົ້າເຖິງການປິ່ນປົວຂອງສາທາລະນະສຸກໂດຍບໍ່ຈຳແນກຄົນ ເຈັບ. ນອກຈາກນີ້, ທ່ານເລຂາທິການໃຫຍ່ອົງການ ສະຫະປະຊາຊາດ ຍັງໄດ້ໄປຢ້ຽມຢາມສູນຝຶກອົບຮົມເກັບກູ້ລະເບີດແຫ່ງຊາດ, ຢູ່ບ້ານອີ່ໄລ, ເມືອງນາຊາຍທອງ ນະຄອນ ຫລວງວຽງຈັນ ແລະ ຮັບຟັງລາຍງານສະພາບການຈັດຕັ້ງປະຕິບັດວຽກງານເກັບກູ້ລະເບີດບໍ່ທັນແຕກໃນໄລຍະຜ່ານມາ, ຊຶ່ງລັດຖະບານລາວໄດ້ເລີ່ມຈັດຕັ້ງປະຕິບັດແຕ່ປີ 1996 ເປັນຕົ້ນມາ, ໂດຍໄດ້ສ້າງແຜນຍຸດທະສາດ ເພື່ອແກ້ໄຂບັນຫາດັ່ງກ່າວແຕ່ປີ 2011-2020 ແລະ ໃນປີ 2010 ລັດຖະບານ ໄດ້ຮັບຮອງເອົາ MDG 9 ເປັນເປົ້າໝາຍສະເພາະຂອງ ສປປ ລາວ ໃນການແກ້ໄຂ ບັນຫາລະເບີດບໍ່ທັນແຕກ, ໂດຍໄດ້ກຳນົດໄວ້ໃນແຜນພັດທະນາເສດຖະກິດ-ສັງຄົມແຫ່ງຊາດ, ຈຶ່ງໄດ້ປະກາດໃຫ້ວຽກງານ ແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງເປັນເປົ້າໝາຍ ການພັດທະນາແບບຍືນຍົງ (SDG) ອັນດັບທີ 18 ແລະ ຮຽກຮ້ອງມາຍັງບັນດາປະເທດຜູ້ໃຫ້ທຶນຊ່ວຍເຫລືອ, ອົງການ ຈັດຕັ້ງສາກົນຕ່າງໆ, ໂດຍສະເພາະ ອົງການສະຫະປະຊາຊາດ ຈົ່ງສືບຕໍ່ໃຫ້ການສະໜັບ ສະໜູນວຽກງານແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໃຫ້ນັບມື້ໝົດໄປຈາກຜືນແຜ່ນດິນລາວ.