ລາວແຕ່ງຕັ້ງຮອງລັດຖະມົນຕີກະຊວງປ້ອງກັນປະເທດເພີ່ມອີກ 3 ທ່ານ

 

ຂ່າວ-ພາບ: ຫນັງສືພິມ ປກສ

          ພິທີປະກາດແຕ່ງຕັ້ງທ່ານພົນຕີ ອ່ອນສີ ແສນສຸກ, ພົນຕີ ພູວົງ ວົງພົມ ແລະ ພົນຕີ ແອສະໄໝ ເລືອງວັນໄຊ ເປັນຮອງລັດຖະ ມົນຕີກະຊວງປ້ອງກັນປະເທດ, ໄດ້ຈັດຂຶ້ນໃນວັນທີ 14 ກັນຍານີ້, ຢູ່ກະ ຊວງປ້ອງກັນປະເທດ, ໂດຍການເຂົ້າຮ່ວມຂອງທ່ານພົນໂທ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ລັດຖະ ມົນຕີກະຊວງປ້ອງກັນປະເທດ, ມີບັນດາຄະນະນໍາກະຊວງດັ່ງກ່າວເຂົ້າຮ່ວມເປັນຈໍານວນຫລາຍ ເພື່ອປະຕິບັດຕາມມະຕິຕົກລົງຂອງກົມການເມືອງສູນກາງພັກ ແລະ ດໍາລັດຂອງນາຍົກລັດຖະມົນຕີແຫ່ງ ສປປ ລາວ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ວຽກງານຢູ່ກະຊວງດັ່ງກ່າວໃຫ້ຮັບປະກັນການເຄື່ອນໄຫວຕາມພາລະບົດບາດທີ່ພັກ-ລັດຖະບານ

ມອບໝາຍໃຫ້ສໍາເລັດຜົນເປັນຢ່າງດີ, ໂດຍສະເພາະການປັບປຸງກໍ່ສ້າງກອງທັບປະຊາຊົນລາວໃຫ້ເປັນກອງທັບທີ່ມີແບບແຜນທັນສະໄໝ ເພື່ອປະຕິບັດ ໜ້າທີ່ປົກປັກຮັກສາປະເທດຊາດໄວ້ໃຫ້ໝັ້ນຄົງ.
            ໃນໂອກາດນີ້, ທ່ານລັດຖະມົນຕີລັດຖະມົນຕີກະຊວງປ້ອງກັນປະເທດໄດ້ໂອ້ລົມຊີ້ນໍາຕໍ່ພິທີວ່າ: ຂໍໃຫ້ບັນດາທ່ານທີ່ໄດ້ຮັບການແຕ່ງຕັ້ງເປັນຮອງລັດຖະມົນຕີກະຊວງປ້ອງກັນປະເທດໃໝ່ໃນເທື່ອນີ້, ຈົ່ງສືບຕໍ່ເພີ່ມທະວີເອົາໃຈໃສ່ວຽກງານການເມືອງແນວຄິດໃຫ້ແກ່ສະມາຊິກພັກ ແລະ ພະ ນັກງານນັກຮົບໃນກໍາລັງໃຫ້ມີຄວາມໜັກແໜ້ນ ເພື່ອຜັນຂະຫຍາຍແນວທາງນະໂຍບາຍຂອງພັກ ກໍຄືການສ້າງກໍາລັງຕິດພັນກັບການກໍ່ສ້າງຮາກຖານການເມືອງ, ການພັດທະນາເສດຖະກິດ-ສັງຄົມ ໂດຍສະເພາະແມ່ນຢູ່ເຂດຫລໍ່ແຫລມ, ຫ່າງໄກສອກຫລີກ, ພ້ອມທັງເອົາໃຈໃສ່ປັບປຸງແບບແຜນວິທີເຮັດວຽກໃຫ້ມີຍຸດທະສາດບົນພື້ນຖານການປະຕິບັດຫລັກການລວມສູນປະຊາທິປະໄຕ, ເຮັດວຽກເປັນໝູ່ຄະນະບຸກຄົນຮັບພິຊອບ, ສ້າງແບບແຜນຊີວິດປອດໃສຂາວສະອາດ ແລະ ມີລະບຽບວິໄນເຂັ້ມງວດ, ທັງມີຄວາມສາມາດໃນການປ້ອງກັນຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມແນວຊາຍແດນ.