ປະທານພີເອັສຊີ້ແຈງຕື່ມກ່ຽວກັບທຸລະກິດຕົນ

            ທ່ານນາງ ສຸກນາລີ ເທບສີເມືອງ ປະທານບໍລິສັດ ພີເອັສ ສົ່ງເສີມກະສິກໍາ ແລະ ອຸດສະຫະກໍາ ຄົບວົງຈອນຂາອອກ-ຂາເຂົ້າ ຈໍາກັດ, ໄດ້ອອກມາຊີ້ແຈງເພີ່ມເຕີມຕໍ່ສື່ມວນຊົນກ່ຽວກັບເນື້ອແທ້ການດໍາເນີນທຸລະກິດຂອງຕົນ, ຫລັງຈາກກ່ອນໜ້ານີ້ທະນາຄານແຫ່ງ ສປປ ລາວ ໄດ້ມີແຈ້ງການໃຫ້ບໍລິສັດຕົນຢຸດຕິການລະດົມທຶນຈາກມວນຊົນໃນຮູບແບບຂາຍຮຸ້ນກູ້, ເງິນຝາກໃຫ້ດອກເບ້ຍສູງ. ຕໍ່ບັນຫາດັ່ງກ່າວທ່ານປະທານບໍລິສັດໄດ້ຊີ້ແຈງວ່າ: ໃນໄລຍະຜ່ານມາ, ບໍລິສັດພວກເຮົາແມ່ນດໍາເນີນທຸລະກິດຖືກຕ້ອງສອດຄ່ອງກັບລະບຽບກົດໝາຍວ່າດ້ວຍວິສາຫະກິດແຫ່ງ ສ ປປ ລາວ ແລະ ຢືນຢັນບໍ່ໄດ້ເຄື່ອນໄຫວ

ທຸລະກິດຄືຮູບແບບດັ່ງທີ່ກ່າວມານັ້ນ, ແຕ່ນະໂຍບາຍ ແລະ ວັດຖຸປະສົງຕົ້ນຕໍໃນການດໍາເນີນທຸລະກິດຂອງບໍລິສັດແມ່ນຜະລິດສີນຄ້າກະສິກໍາ ແລະ ອຸດສະຫະກໍາໃຫ້ໄດ້ມາດຕະຖານ, ຂະຫຍາຍຕົວແທນຈໍາໜ່າຍໃຫ້ກວ້າງຂວາງກວມພື້ນທີ່ທົ່ວປະເທດ ແລະ ສ້າງກົນໄກຕະຫລາດຄືນກໍາໄລໃຫ້ສັງຄົມ ແລະ ລູກຄ້າ, ຊຶ່ງມາຮອດປັດຈຸບັນບໍລິສັດມີລູກຄ້າທັງໝົດ 3 ກຸ່ມຄື: ກຸ່ມຕົວແທນຈໍາໜ່າຍ, ກຸ່ມຜູ້ບໍລິໂພກທົ່ວໄປ ແລະ ກຸ່ມພະນັກງານຂາຍອິດສະຫລະ ລວມແລ້ວມີປະມານທັງໝົດສອງແສນກວ່າຄົນ ໂດຍການນໍາໃຊ້ສີນຄ້າປະເພດອາຫານການກິນ, ເຄື່ອງອຸປະໂພກ-ບໍລິໂພກ ທີ່ຈໍາເປັນໃນຊີວິດປະຈໍາວັນມາເປັນທ່າແຮງໃນການຮັບປະກັນຄວາມໝັ້ນຄົງຂອງທຸລະກິດ, ເຖິງວ່າບໍລິສັດມີການເຄື່ອນໄຫວຄ້າຍຄືກັບເຄື່ອຂາຍການຕະຫລາດ, ແຕ່ເປັນລະບົບທີ່ມີກົນລະຍຸດຄືນກໍາໄລໃຫ້ສັງຄົມ ແລະ ລູກຄ້າ, ໝາຍວ່າຊ່ວຍໃຫ້ທຸກຄົນມີສ່ວນຮ່ວມ ແລະ ສ່ວນຮັບ.

             ທ່ານປະທານບໍລິສັດກ່າວວ່າ: ບໍລິສັດໄດ້ຮັບອະນຸຍາດຂຶ້ນທະບຽນວິສາຫະກິດໃນວັນທີ 31 ພຶດສະພາ 2012 ແລະ ໄດ້ປ່ຽນແປງເນື້ອໃນວິສາຫະກິດໃໝ່ໃນເດືອນກັນຍາ 2014 ໂດຍມີທຶນຈົດທະບຽນ 900 ລ້ານກີບ ແລະ ເປັນການລົງທຶນພາຍໃນ 100% ເພື່ອດໍາເນີນທຸລະກິດ 3 ປະເພດໃຫຍ່ຄື: ສົ່ງເສີມການປູກຝັງ ແລະ ລ້ຽງສັດ, ຜະລິດນໍ້າດື່ມລາວ ແລະ ນໍາເຂົ້າ-ສົ່ງອອກສີນຄ້າອຸປະໂພກບໍລິໂພກ ແລະ ປັດຈຸບັນບໍລິສັດພວມກະກຽມສະເໜີເພີ່ມທຶນຈົດທະບຽນຈາກ 900 ລ້ານກີບຂຶ້ນເປັນ 50 ຕື້ກີບ ແລະ ຈະເພີ່ມກິດຈະການການຜະລິດ ພາຍໃນບໍລິສັດຄື: ການປູກພືດໃຫ້ໝາກ, ໃບ, ກ້ານ, ເກັບຊື້ຢາງພາລາ, ລ້ຽງແບ້, ເປັດ, ປາກະຊັງ, ສ້າງຕັ້ງໂຮງງານນໍ້າອັດລົມ, ນໍ້າໝາກໄມ້, ໂຮງເຂົ້າ

ປຸ້ນ, ເຂົ້າປຽກ, ເຂົ້າຊອຍ, ເສັ້ນເຝີ, ເສັ້ນໝີ່, ລູູກຊີ້ນ, ໂຮງສີເຂົ້າ, ຫັດຖະກໍາແຜ່ນແພ-ຈັກສານ, ເຄື່ອງເຟີນີເຈີ, ກໍ່ສ້າງ-ຊົນລະປະທານ, ການທ່ອງທ່ຽວ, ໂຮງແຮມ, ຮ້ານອາຫານ, ອະສັງຫາລິມະຊັບ, ນໍາເຂົ້າປະເພດອາຫານທະເລ, ກົນຈັກໜັກ-ເບົາ, ພາຫະນະ, ເຄື່ອງໄຟຟ້າ ແລະ ອື່ນໆ.

             ທ່ານນາງ ສຸກນາລີ ກ່າວວ່າ: ຫລັງຈາກມີແຈ້ງການຂອງທະນາຄານແຫ່ງ ສ ປປ ລາວ ອອກມາຄືດັ່ງກ່າວ, ບໍລິສັດພວກເຮົາກໍສະແດງຄວາມຂອບໃຈເປັນຢ່າງຍິງ, ຊຶ່ງມັນສະແດງເຖິງຄວາມເປັນຫວ່ງເປັນໄຍຕໍ່ຜູ້ປະກອບການ ກໍຄືປະຊາຊົນ, ເນື່ອງຈາກວ່າປັດຈຸບັນມີຫລາຍບໍລິສັດທີ່ເຂົ້າມາລົງທຶນຢູ່ປະເທດເຮົາໄດ້ສວຍໂອກາດເຄື່ອນໄຫວບໍ່ສອດຄ່ອງຕາມລະບຽບຫລັກການ, ມີ

ການຕົວະຍົວະຫລອກລວງປະຊາຊົນດ້ວຍການແອບອ້າງວ່າໃຫ້ດອກເບ້ຍສູງ, ຊຶ່ງການກະທໍາອັນບໍ່ດີດັ່ງກ່າວໄດ້ເຮັດໃຫ້ບໍລິສັດພວກເຮົາມີຜົນກະທົບໄປນໍາ.  

             ແນວໃດກໍຕາມ, ພາຍຫລັງເກີດມີບັນຫາຄືດັ່ງກ່າວບໍລິສັດກໍໄດ້ປະສານໄປຫາຫລາຍພາກ ສ່ວນນັບທັງພາກລັດ ແລະ ເອກະຊົນ ກໍຄືລູກຄ້າເພື່ອອະທິບາຍຊີ້ແຈງໃຫ້ເຂົ້າໃຈວ່າບໍລິສັດບໍ່ໄດ້ມີການລະດົມທຶນລະດົມທຶນ ຫລື ລະດົມໃຫ້ລູກຄ້າເຂົ້າຮ່ວມທຶນນໍາບໍລິສັດ, ເພາະບໍ່ແມ່ນສີນເຊື່ອຄືທະນາ ຄານ ຫລື ສະຖາບັນການເງິນທີ່ມີດອກເບ້ຍຕໍ່ເດືອນຕໍ່ປີ, ພ້ອມທັງມີຄວາມຍີນດີຕ້ອນຮັບ ແລະ ເຊື້ອເຊີນທຸກຂະແໜງການທັງພາກລັດ ແລະ ເອກະຊົນ ລົງມາຢ້ຽມ ແລະ ກວດກາ, ປຶກສາຫາລືຖອດຖອນບົດຮຽນເຊິ່ງກັນ ແລະ ກັນ ເພື່ອໃຫ້ເຂົ້າໃຈເຖິງວັດຖຸປະສົງຂອງບໍລິສັດ ແລະ ມາຮອດປັດຈຸບັນລູກຄ້າຂອງພວກເຮົາກໍບໍ່ໄດ້ມີຄວາມວິຕົກກັງວົນຕໍ່ກະແສຂ່າວໃນດ້ານລົບຕ່າງໆທີ່ມີຕໍ່ບໍລິສັດແຕ່ຢ່າງ ໃດ ແລະ ຢືນຢັນວ່າຍັງບໍ່ມີລູກຄົນໃດໄດ້ມາຂໍຖອນເງິນຂອງຕົນອອກໄປຈາກບໍລິສັດເລີຍ ຍ້ອນເຂົາ ເຈົ້າເຂົ້າໃຈວ່າບໍ່ໄດ້ມາຮ່ວມຮຸ້ນ ຫລື ຮ່ວມທຶນ ແຕ່ເຂົ້າມາເພື່ອຮ່ວມ ກຸ່ມພະລັງກິນ ແລະ ພະລັງຊື້ ໝາຍຄວາມວ່າບໍລິສັດພວກເຮົາໄດ້ມີລະບົບກົນໄກທີ່ຄືນກໍາໄລໃຫ້ສັງຄົມ ແລະ ຄືນກໍາໄລໃຫ້ຜູ້ບໍລິໂພກທົ່ວໄປ, ໂດຍມີການສ້າງຊອບແວໂປຼແກມທີ່ທັນສະໄໝ ເວົ້າອີກຢ່າງໜຶ່ງກໍແມ່ນເປັນທຸລະກິດທາງ

ດ້ານນະວັດຕະກໍາ.

            ທ່ານປະທານອະທິບາຍຕື່ມວ່າ: ຕາມປົກກະຕິແລ້ວທຸລະກິດທົ່ວໄປຈະມີແຕ່ຜູ້ຜະລິດ ແລະ ຜູ້ຈໍາໜ່າຍເທົ່ານັ້ນທີ່ໄດ້ກໍາໄລ, ສ່ວນຜູ້ບໍລິໂພກຈະບໍ່ໄດ້ກໍາໄລຈາກການບໍລິໂພກສີນຄ້ານັ້ນເລີຍ, ສະ ນັ້ນບໍລິສັດພີເອັສ ຈຶ່ງເປີດໂອກາດໃຫ້ຜູ້ບໍລິໂພກສີນຄ້າສະໝັກເປັນສະມາຊິກຂອງບໍລິສັດໃນມູນຄ່າ 150.000 ກີບ ແລ້ວຈະໄດ້ລະຫັດລູກຄ້າ, ຫລັງຈາກໄດ້ລະຫັດແລ້ວໃຫ້ລູກຄ້າທຸກຄົນກອບປີ້

ເລກບັນຊີທະນາຄານໃຫ້ບໍລິສັດ ເພາະວ່າເມື່ອເວລາໄປຊື້ສີນຄ້າຈາກສາຂາຕົວແທນຈໍາໜ່າຍຂອງບໍລິສັດພີເອັສແລ້ວ ກໍຈະໄດ້ກໍາໄລເປັນເປີເຊັນຄືນໃຫ້ຈໍານວນ 5,4% ຂອງມູນຄ່າສີນຄ້າທີ່ຊື້.

            ທ່ານນາງ ສຸກນາລີ ກ່າວວ່າ: ພວກເຮົາຈະສືບດໍາເນີນກິດຈະການໃຫ້ຖືກຕ້ອງສອດຄ່ອງກັບລະບຽບກົດໝາຍ ແລະ ການອະນຸຍາດຕ່າງໆທີ່ໄດ້ຮັບ, ແຕ່ຖ້າຍັງມີບຸກຄົນໃດ ຫລື ພາກສ່ວນໃດໄປໂຄສະນາລະດົມທຶນ ຫລື ໃຫ້ຮ່ວມທຶນໂດຍອ້າງວ່າຈະໄດ້ຮັບຜົນຕອບແທນດອກເບ້ຍ 6% ຖືວ່າບໍລິສັດບໍ່ຮັບຮູ້ຕໍ່ການເຄື່ອນໄຫວດັ່ງກ່າວ.