ໄຂງານມະຫາກຳສີມືຫັດຖະກຳລາວປະຈຳປີ 2016

          ງານມະຫະກຳສີມືຫັດຖະກຳລາວປະຈຳປີ 2016, ໄດ້ໄຂຂື້ນຢ່າງເປັນທາງການໃນວັນທີ 26 ຕຸລານີ້, ທີ່ສູນການຄ້າລາວ-ໄອເຕັກ, ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດ, ຮອງລັດຖະ ມົນຕີກະຊວງອຸດສາຫະກຳ ແລະ ການຄ້າ, ຮອງປະທານສະພາການຄ້າ ແລະ ອຸດສາຫະກ ຳແຫ່ງຊາດລາວ, ພ້ອມດ້ວຍຜູ້ຕາງໜ້າກະຊວງ, ນັກທຸລະກິດ ແລະ ຊາວຊ່າງຫັດຖະກຳເຂົ້າຮ່ວມເປັນຈຳນວນຫຼາຍ.

          ທ່ານ ຫານ ຊະນະສີສານ ປະທານສະມາຄົມຫັດຖະກຳລາວ ກ່າວໃນພິທີວ່າ: ງານມະຫາກຳສີມືຫັດຖະກຳລາວຖືເປັນປະເພນີຂອງຊາວຊ່າງຫັດຖະກຳລາວ, ຊຶ່ງໄດ້ຈັດຂື້ນໃນທຸກໆປີ ແລະ ປີນີ້ເປັນປີທີ 15 ແລ້ວ, ເພື່ອສ້າງໂອກາດໃຫ້ຊາວຊ່າງຫັດຖະກຳໃນທົ່ວປະເທດໄດ້ມາພົບປະແລກປ່ຽນບົດຮຽນ ແລະ ປະສົບການຕ່າງໆນຳກັນ, ພ້ອມນຳເອົາຜະລິດຕະພັນຂອງຕົນມາວາງສະແດງ ແລະ ຂາຍ, ທັງເປັນການຊອກຫາລູກຄ້າຫຼືຜູ້ຮ່ວມທືນ, ຮ່ວມທຸລະກິດນຳກັນໃນອະນາຄົດ, ຊຶ່ງໃນງານຍັງມີກິດຈະກຳສຳມະນາໃຫ້ຄວາມຮູ້ແກ່ຊາວຊ່າງຫັດຖະກຳ ແລະ ຈະໄດ້ຊົມການສາທິດການຜະລິດເຄື່ອງຫັດຖະກຳ,ການປະກວດຜະລິດຕະພັນດີເດັ່ນ, ເພື່ອສົ່ງເສີມໃຫ້ເຄື່ອງຫັດຖະກຳຂອງລາວມີຄວາມຫຼາກຫຼາຍທັງປະລິມານ ແລະ ຄຸນນະພາບ. ພິເສດໃນງານຄັ້ງນີ້ມີບັນດາຫ້າງຮ້ານຫັດຖະກຳໃນທົ່ວປະເທດເຂົ້າຮ່ວມຫຼາຍກວ່າ 200 ຫົວໜ່ວຍ, ຊຶ່ງໄດ້ນຳເອົາຜະລິດຕະພັນ ຫັດຖະກຳທີ່ເປັນສີໄມ້ລາຍມືຂອງຄົນລາວເຊັ່ນ: ຜ້າໄໝ, ເຄື່ອງປັ້ນດິນເຜົາ, ເຄື່ອງຈັກສານ, ເຄື່ອງແກະສະຫຼັກ, ເຄື່ອງປະດັບ ແລະອື່ນໆ. ປີນີ້ສະມາຄົມຫັດຖະກຳ ລາວ ຍັງໄດ້ຈັດງານປະກວດຜະລິດຕະພັນຫັດຖະກຳດີເດັ່ນ ສິ່ງປະດິດ ໃໝ່ໆຈາກຂະແໜງ ຕ່ຳຜ້າພື້ນເມືອງ, ຈັກສານ, ເຄື່ອງປັ້ນດິນເຜົາ, ຜະລິດຕະພັນວັດທະນະທຳ ແລະ ຂະແໜງນຳ ໃຊ້ວັດຖຸເສດເຫລືອ ເພື່ອເປັນກຳລັງແຮງໃຈໃຫ້ຊາວຊ່າງຫັດຖະກຳລາວພວກເຮົາ, ໄດ້ພ້ອມກັນອານຸລັກ ແລະ ພັດທະນາພູມປັນຍາຂອງບັນພະບູລຸດໃຫ້ຍືນຍົງຕະຫລອດໄປ, ໂດຍງານຄັ້ງນີ້ຈະດຳເນີນໄປຮອດວັນທີ 1 ພະຈິກນີ້.