ຕະຫຼາດນັດ WIG BAZAAR 2016 ຈະຈັດຂື້ນທີ່ຄະນະວິສາວະກຳສາດ,ມະຫາວິທະຍາໄລແຫ່ງຊາດ ໂສກປ່າຫຼວງ

     ວັນທີ 25 ຕຸລານີ້, ຜູ້ຕາງໜ້າໂຄງການ WIG (ໂຄງການສະດົມທຶນຊ່ວຍເຫຼືອສັງຄົມໂດຍບໍ່ຫວັງຜົນກຳໄລ ) ປະຈຳລາວໄດ້ຖະແຫຼ່ງຕໍ່ສື່ມວນຊົນຢູ່ທີ່ສະມາຄົມນັກຂ່າວແຫ່ງ ສປປ ລາວ ວ່າ: ໂຄງການຂອງຕົນຈະຈັດຕະຫຼາດນັດ WIG BAZAAR 2016 ຂຶ້ນໃນວັນທີ 19 ພະຈິກທີ່ຈະມາເຖິງນີ້, ຢູ່ຄະນະວິສາວະກຳສາດ, ມະຫາວິທະຍາໄລແຫ່ງຊາດ, ໂສກປ່າຫຼວງ, ນະຄອນຫຼວງວຽງຈັນ, ໂດຍຈະມີກິດຈະກຳຕ່າງໆເຊັ່ນ: ການວາງສະແດງ ແລະ ຂາຍສິນຄ້າ, ການສະແດງສີລະປະດົນຕີ, ຫຼິ້ນເກມ ແລະ ອື່ນໆອີກຫຼາຍຢ່າງ, ພິເສດປີນີ້ຈະມີສະຖານທູດ, ອົງການຈັດຕັ້ງສາກົນ ແລະ ບັນດາບໍລິສັດຫ້າງຮ້ານທັງພາຍໃນ ແລະ ຕ່າງປະເທດເຂົ້າຮ່ວມວາງສະແດງ ແລະ ຂາຍສິນຄ້າຫຼາຍກວ່າ 160 ຮ້ານ, ດັ່ງນັ້ນ ຈຶ່ງຂໍເຊີນຊວນໃຫ້ທົ່ວສັງຄົມເຂົ້າຮ່ວມງານດັ່ງກ່າວ, ສຳລັບລາຍໄດ້ທັງໝົດແມ່ນຈະມອບໃຫ້ການກຸສົນເພື່ອນຳໄປຊ່ວຍເຫຼືອສັງຄົມຕໍ່ໄປ.

          ຜູ້ຕາງໜ້າໂຄງການ WIG  ກ່າວວ່າ: ສຳລັບງານຕະຫຼາດນັດ WIG BAZAAR 2016 ນີ້ແມ່ນເປັນປີທີ່ 26 ແລ້ວທີ່ໂຄງການຂອງຕົນໄດ້ຈັດຂື້ນ ແລະ ເຫັນວ່າງານຕະຫຼາດນັດດັ່ງກ່າວໃນຊຸມປີຜ່ານມາແມ່ນໄດ້ຮັບຄວາມສົນໃຈຈາກສັງຄົມເປັນຢ່າງດີ, ຊຶ່ງສະແດງອອກໃນປີ 2015 ຜ່ານມາມີຜູ້ເຂົ້າຮ່ວມຫຼາຍກວ່າ 10 ພັນຄົນ, ໂຄງການ  WIG ແມ່ນເຮັດວຽກແບບສະໝັກໃຈຂອງທຸກຄົນທຸກສັນຊາດໃນນະຄອນຫຼວງວຽງຈັນຊຶ່ງເປັນຜູ້ລິເລີ່ມ ແລະ ສະໜັບສະໜູນກິດຈະກຳຕ່າງໆເພື່ອຊ່ວຍເຫຼືອສັງຄົມ, ໂດຍສະເພາະແມ່ນດ້ານການສຶກສາ ແລະ ສຸຂະພາບ, ໄດ້ຮັບການສ້າງຕັ້ງຂຶ້ນໃນປີ 1990 ປັດຈຸບັນມີສະມາຊິກຫຼາຍກວ່າ 130 ກຸ່ມ.