ສະພາຮັບຮອງເອົາການດັດແກ້ຕົວເລກມະຫາພາກໄລຍະ 4 ປີຂອງແຜນພັດທະນາເສດຖະກິດ-ສັງຄົມ

           ສະພາແຫ່ງຊາດໄດ້ຮັບຮອງເອົາການດັດແກ້ຕົວເລກມະຫາພາກແຜນໄລຍະ 4 ປີ (2017-2020) ຂອງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ 5 ປີຄັ້ງທີ VIII (2016-2020) ຕາມການສະເໜີຂອງລັດຖະບານ ຄື: (1) ຄາດໝາຍຫລຸດພົ້ນຈາກສະຖານະພາບປະເທດດ້ອຍພັດທະນາ: ແມ່ນສືບຕໍ່ສ້າງໂຄງປະກອບເສດຖະກິດກະສິກໍາ-ປ່າໄມ້ ຕິດພັນກັບຂະແໜງອຸດສະຫະກໍາ ແລະ ການບໍລິການ, ໂດຍຖືເອົາຂະແໜງກະສິກໍາເປັນພື້ນຖານໃນການຄໍ້າປະກັນສະບຽງອາຫານໃຫ້ໜັກແໜ້ນ, ຖືກເອົາການປົກປັກຮັກສາ ແລະ ພັດທະນາປ່າໄມ້ເປັນສໍາຄັນ ແລະ ເອົາຂະແໜງອຸດສະຫະກໍາ ແລະ ບໍລິການເປັນຂະແໜງຕົ້ນຕໍໃນການຊຸກຍູ້ການເຕີບໂຕຂອງເສດຖະກິດ, ສ້າງ

ວຽກເຮັດງານທໍາ ແລະ ຍົກສູງລາຍໄດ້ຂອງປະຊາຊົນ, ລວມຍອດຜະລິດຕະພັນພາຍໃນ (GDP) 600.611 ຕື້ກີບ, ຂະຫຍາຍຕົວສະເລ່ຍ 4 ປີເທົ່າກັບ 7,2% ໃນນັ້ນ, ປີ 2017-2018 ບໍ່ໃຫ້ຫລຸດ 7%, ປີ 2019 ບໍ່ໃຫ້ຫລຸດ 7,3% ແລະ ປີ 2020 ໃຫ້ຢູ່ໃນລະດັບ 7,5%, ໃນນີ້ຂະແໜງກະສິກໍາ-ປ່າໄມ້ໃຫ້ຂະຫຍາຍຕົວ 3,4% ກວມເອົາ 16,8%, ອຸດສະຫະກໍາຂະຫຍາຍຕົວ 9,3% ກວມປະມານ 39%, ບໍລິການຂະຫຍາຍຕົວ 8,1% ກວມເອົາ 35,4% ແລະ ພາສີອາກອນຜະລິດຕະພັນ ແລະ ການນໍາເຂົ້າຂະຫຍາຍຕົວ 5% ກວມປະມານ 8,8% ຂອງ GDP ໃນປີ 2020 ແລະ ຄາດຄະເນຄວາມຕ້ອງການທຶນພັດທະນາທັງໝົດ 173.329 ຕື້ກີບ ຫລືປະມານ 21 ຕື້ໂດລາສະຫະລັດ ກວມປະມານ 29% ຂອງ GDP ໃນນັ້ນທຶນຂອງລັດກວມປະມານ 12-15%, ທຶນກູ້ຢືມ ແລະ ຊ່ວຍເຫລືອລ້າປະມານ 15-24%, ການລົງທຶນຈາກພາກເອກະຊົນ ແລະ ຕ່າງປະເທດກວມປະມານ 40-49% ແລະ ທຶນຈາກລະບົບເງິນຕາກວມປະມານ 21-23% ຂອງການລົງທຶນທັງໝົດ.