ລາວເລັ່ງພັດທະນາສີມືແຮງງານໃຫ້ທຽບເທົ່າສາກົນ

ໂຮງງານຜະລິດເກີບຢູ່ບ້ານອີໄລ ເມືອງນາຊາຍທອງ

          ການສ້າງຄວາມເຂັ້ມແຂງໃຫ້ຜູ້ໃຊ້ແຮງງານ ແລະ ຜູ້ສະໜອງການພັດທະນາສີມືແຮງງານ ໃນ ສປປ ລາວ ໃນໄລຍະຜ່ານມາ ຍັງບໍ່ທັນສາມາດປະຕິບັດໄດ້ດີເທົ່າທີ່ຄວນ, ເຖິງວ່າລັດຖະບານ ກໍໄດ້ເອົາໃຈໃສ່ ແລະ ໃຫ້ຄວາມສຳຄັນໃນວຽກງານດັ່ງກ່າວເປັນພິເສດຄື: ເມື່ອບໍ່ດົນມານີ້, ກະຊວງແຮງງານ ແລະ ສະຫວັດດີການສັງຄົມ ຮ່ວມກັບອົງການຈັດຕັ້ງສາກົນ, ໄດ້ພ້ອມກັນຈັດກອງປະຊຸມສ້າງຄວາມເຂັ້ມແຂງໃຫ້ຜູ້ໃຊ້ແຮງງານ ແລະ ຜູ້ ສະໜອງການພັດທະນາສີມືແຮງງານກ່ຽວກັບຄວາມສຳຄັນຂອງມາດຕະຖານສີມືແຮງງານ ແລະ ການເຊື່ອມໂຍງອາຊຽນ, ເພື່ອປຶກສາຫາລືແຜນການສະເພາະໜ້າຂອງການຮັບຮູ້ ສີມືແຮງງານເຊິ່ງກັນ ແລະ ກັນໃນອາຊຽນ, ເລັ່ງພັດທະນາສີມືແຮງງານລາວໃຫ້ທຽບເທົ່າກັບສາກົນ.

          ທ່ານຫົວໜ້າກົມພັດທະນາສີມືແຮງງານ ແລະ ຈັດຫາງານ ໃຫ້ຮູ້ວ່າ: ການຮັບຮູ້ສີມືແຮງງານເຊິ່ງກັນ ແລະ ກັນໃນບັນດາປະເທດອາຊຽນກາຍເປັນຂະບວນການໜຶ່ງເພື່ອ ຊ່ວຍໃຫ້ການເຄື່ອນຍ້າຍຢ່າງເສລີຂອງແຮງງານທີ່ມີສີມືເຂົ້າສູ່ລະບົບ, ມີຄວາມສະເໝີພາບ ແລະ ເຮັດໃຫ້ບັນດາປະເທດສະມາ ຊິກອາຊຽນຕ່າງຝ່າຍຕ່າງໄດ້ຮັບຜົນປະໂຫຍດ, ພ້ອມທັງເຮັດໃຫ້ແຮງງານເຄື່ອນຍ້າຍ ແລະ ແຮງງານທ້ອງຖິ່ນ ໄດ້ຮັບຄ່າຕອບແທນໃນການເຮັດວຽກ ແລະ ສະຫວັດດີການຕ່າງໆເປັນເອກະພາບກັນ, ໂດຍຫລີກລ້ຽງຈາກການເອົາລັດເອົາປຽບຂອງຝ່າຍໃດຝ່າຍໜຶ່ງ. ຄຽງຄູ່ກັນນີ້ມີຫຼາຍສິ່ງທ້າທາຍ ແລະ ຫຼາຍຂັ້ນຕອນໃນການຈັດຕັ້ງປະຕິບັດເປັນຕົ້ນມາດຕະຖານ ສີມືແຮງງານແຫ່ງຊາດຂອງແຕ່ລະປະເທດມີຄວາມແຕກຕ່າງກັນຫລາຍເຊັ່ນ: ລະດັບສີມື, ເງື່ອນໄຂ, ມາດຕະຖານຄວາມສາມາດ ແລະ ອື່ນໆ, ເຊິ່ງໂຄງການຮັບຮູ້ສີມືແຮງງານອາຊຽນໄດ້ສຳເລັດແຜນກິດຈະກຳໃນໄລຍະທີ 1ແລ້ວ, ຊຶ່ງມັນໄດ້ກາຍເປັນບາດກ້າວພື້ນຖານໃນການສ້າງເງື່ອນໄຂອັນຈໍາເປັນໃນການຮັບ ຮູ້ສີມືແຮງງານເຊິ່ງກັນ ແລະ ກັນຂອງອາຊຽນ, ດັ່ງນັ້ນ ໃນຕໍ່ໜ້າພວກເຮົາຈະໄດ້ມີການເນັ້ນໜັກໃສ່ການຜັນຂະຫຍາຍມາດຕະຖານດັ່ງກ່າວນີ້ໃຫ້ເຂົ້າສູ່ຫຼັກສູດພັດທະນາສີມືແຮງງານ ແລະ ການຮັບປະກັນຄຸນນະພາບການພັດທະນາສີມືແຮງງານເປັນຕົ້ນ.