ຈົ່ງເອົາໃຈໃສ່ຕໍ່​ການ​ເກັບ​ກ່ຽວມ້ຽນ​ມັດ​ຜົນ​ຜະລິດ​ລະດູຝົນ ແລະ ກະກຽມ​ການ​ຜະລິດ​ລະດູ​ແລ້ງໃຫ້ດີ

          ໃນໄລຍະການຜະລິດລະດູຝົນຜ່ານມານີ້, ມີຫລາຍທ້ອງຖິ່ນໄດ້ຮັບຜົນກະທົບຈາກໄພທໍາມຊາດເຊັ່ນ: ໄພແຫ້ງແລ້ງໃນຊ່ວງຕົ້ນລະດູ, ເກີດມີນໍ້າຖ້ວມຊ່ວງການຈະເລີນເຕີບໂຕຂອງຕົ້ນເຂົ້າ ແລະ ເກີດມີສັດຕູພືດລະບາດໃນບາງແຂວງ, ແຕ່ຊາວກະສິກອນກໍສາມາດປົກປັກຮັກສາຜົນຜະລິດຂອງຕົນໄວ້ເປັນຢ່າງດີ ແລະ ມາຮອດປັດຈຸບັນນີ້, ຊາວກະສິກອນສາມາດເກັບກ່ຽວມ້ຽນມັດຜົນຜະລິດເຂົ້ານາປີໄດ້ແລ້ວຫຼາຍກວ່າ 50% ຂອງເນື້ອທີ່ປັກດຳ​ 770.133 ເຮັກຕາ ຊຶ່ງຄາດວ່າຈະສໍາເລັດໃນທ້າຍເດືອນພະຈິກ 2016 ນີ້. ເພື່ອ​ກະກຽມຄວາມພ້ອມເຂົ້າ​ສູ່​​ການ​ຜະລິດ​ລະດູ​ແລ້ງ 2017 ​ໃຫ້​ເປັນ​ຂະ​ບວນ ແລະ ທວງທັນ

ກັບລະດູການ ແລະ ລັດຖະມົນຕີກະຊວງກ່ຽວຂ້ອງດັ່ງກ່າວກໍໄດ້ອອກແຈ້ງການສະບັບເລກທີ 1166/ກປ ລົງວັນທີ 9 ພະ​ຈິກ 2016 ເຖິງ​ຫົວໜ້າ​ຫ້ອງການ, ກົມ, ​ສະ​ຖາ​ບັນ ແລະຄະນະພັດທະນາຊົນນະບົດ-ລຶບລ້າງຄວາມທຸກຍາກຂັ້ນສູນກາງ,​ຫົວໜ້າ​ພະ​ແນ​ກກະສິກຳ ແລະ ​ປ່າ​ໄມ້​ປະຈຳແຂວງ, ນະຄອນຫຼວງວຽງຈັນ ແລະ ທ້ອງຖິ່ນຕ່າງໆຈົ່ງເພີ່ມ​ທະວີ​ຄວາມ​ຮັບຜິດຊອບຕໍ່​ການ​ຜະ ລິດຂອງຕົນດັ່ງນີ້.

 1. ໃຫ້ພະ​ແນ​ກກະສິກຳ ​ແລະ​ ປ່າ​ໄມ້​ແຂວງ,​ນະຄອນຫຼວງ​​ວຽງຈັນ ສືບຕໍ່ຊຸກຍູ້ການເກັບກ່ຽວ ມ້ຽນມັດເຂົ້ານາປີ 2016 ໃຫ້ທ່ວງທັນກັບລະດູການ ໂດຍນໍາໃຊ້ກົນຈັກເຂົ້າຊ່ວຍໃນບ່ອນທີ່ມີເງື່ອນໄຂ ເພື່ອປະຢັດເວລາ ແລະຕົ້ນທຶນ, ສ່ວນບ່ອນທີ່ບໍ່ມີເງື່ອນໄຂ ກໍໃຫ້ລະດົມແຮງງານໃນທ້ອງຖິ່ນ ຕາມຄວາມ ເໝາະສົມ,  ພ້ອມດຽວກັນ ກໍໃຫ້ເກັບຮັກສາ, ມ້ຽນມັດໄວ້ບ່ອນທີ່ປອດໄພ, ບໍ່ໃຫ້ຖືກຝົນ ຫຼືໝອກ ຊຶ່ງຈະເຮັດໃຫ້ຄຸນນະພາບເຂົ້າຕົກຕໍ່າ;

2. ໃຫ້ເຈົ້າໜ້າທີ່ກ່ຽວຂ້ອງປະເມີນສະມັດ ຕະພາບການຜະລິດ (ໂຕນ/ເຮັກຕາ) ເພື່ອເປັນບ່ອນອີງໃຫ້ແກ່ການຖອດຖອນບົດຮຽນ ແລະສະເໜີ ຂັ້ນເທິງຍ້ອງຍໍ ຕາມ​ດຳລັດ​ຂອງ​ນາຍົກລັດຖະມົນຕີ ​ເລກທີ 121/ນຍ, ລົງ​ວັນ​ທີ 24 ກຸມພາ 2010;

3. ໃຫ້ສະຫຼຸບຖອດຖອນບົດຮຽນຂອງການຈັດຕັ້ງການຜະລິດສະດູຝົນ 2016 ຕາມ​ຄຳ​ສັ່ງ ​ເລກທີ 2108/ກປ, ລົງ​ວັນ​ທີ 27 ​ເມສາ 2016 ເພື່ອຮູ້ໄດ້ວ່າ: ອັນໃດ ເຮັດໄດ້ດີ ?, ອັນໃດ ​ຍັງ​ຄົງຄ້າງ ?  ເພື່ອຖອດ​ຖອນເປັນ​ບົດຮຽນ​ໃນ​ຕໍ່ໜ້າ.

4. ສໍາລັບການຜະລິດລະດູແລ້ງ 2017, ໃຫ້ ກົມປູກຝັງ, ກົມຊົນລະປະທານ, ກົມລ້ຽງສັດ ແລະ ການປະມົງ ແລະ ກົມສົ່ງເສີມກະສິກໍາ ແລະ ສະຫະກອນ ສົມທົບກັບ ພະແນກກະສິກຳ ​ແລະ​ ປ່າ​ໄມ້​ປະຈຳ​ແຂວງ ແລະ​ ນະຄອນຫຼວງວຽງຈັນ ຊຸກຍູ້ຊາວກະສິກອນ ກະກຽມຄວາມພ້ອມເຂົ້າສູ່ການຜະລິດແຕ່ ຫົວທີໂລດ ເພື່ອຮັບປະກັນໃຫ້ທ່ວງທັນກັບລະດູການ ໂດຍສຸມໃສ່ບາງວຽກສໍາຄັນ ດັ່ງນີ້: ດ້ານແນວພັນໃນໄລຍະຕົກກ້າອາດຈະເປັນຊ່ວງໄລຍະອາກາດໜາວ ແລະ ອາດຈະສົ່ງຜົນກະທົບຕໍ່ການແຕກໜໍ່ຂອງກ້າ, ສະນັ້ນ ໃຫ້ພະແນກກະສິກໍາ ແລະ ປ່າໄມ້ແນະນໍາໃຫ້ຕົກກ້າໃສ່ພາຖາດ ແລະ ພາຊະນະອື່ນໆຕາມເງື່ອນໄຂເພື່ອຫຼີກລ່ຽງຜົນກະທົບດັ່ງກ່າວ, ດ້ານປັດໄຈການຜະລິດເຊັ່ນ: ຝຸ່ນ, ຢາປາບສັດຕູພືດ,ອາຫານສັດ ແລະ ຢາປິ່ນປົວສັດໃຫ້ປະສານສົມທົບກັບພາກສ່ວນກ່ຽວຂ້ອງ ຕອບສະໜອງໃຫ້ທັນຕໍ່ຄວາມຕ້ອງການຂອງປະຊາຊົນ ໂດຍມີການ​ເຮັດ​ຂໍ້​ຜູກ​ພັນ​ສັນຍາ​ຮ່ວມ​ກັນ ເພື່ອ​ຫຼີກລ່ຽງບໍ່​ໃຫ້​ເກີດ​ຊ່ອງ​ຫວ່າງ​ ແລະ ​ສວຍ​ໂອກາດ​ເອົາ​ປຽບ​ດ້ານລາຄາຕໍ່ຜູ້​ຜະລິດ, ໃນບ່ອນທີ່ມີເງື່ອນໄຂ ໂດຍສະເພາະບ່ອນມີໜ່ວຍບໍລິການດ້ານກົນຈັກ ກໍໃຫ້ແນະນໍາເຂົາເຈົ້າ ນໍາໃຊ້ກົນຈັກກະສິກໍາເຂົ້າຊ່ວຍເປັນຕົ້ນຈັກຟາດເຂົ້າ, ລົດໄຖນາ, ຄາດນາ… ຕາມ​ທິດ​ຫັນ​ເປັນ​ອຸດສາຫະກຳ ​ແລະ​ ທັນ​ສະ​ໄໝ

5. ໃຫ້ກົມ​ປູກຝັງ ແລະ ກົມລ້ຽງສັດ ແລະ ການປະມົງ ເພີ່ມທະວີຄວາມເອົາໃຈໃສ່ໃນການກວດກາຄຸນນະພາບການນໍາເຂົ້າປັດໄຈການຜະລິດ (ຝຸ່ນ, ຢາປາບສັດຕູພືດ, ອາຫານສັດ ແລະ ຢາປິ່ນປົວສັດ) ພ້ອມດຽວກັນ ກໍໃຫ້ແນະນໍາການນໍາໃຊ້ຢ່າງຖືກວິທີ ລວມທັງການປ້ອງກັນຕົນເອງ ເພື່ອຫຼີກເວັ້ນຜົນກະທົບຕໍ່ສຸຂະພາບຂອງຄົນ, ສັດ ແລະ ສິ່ງແວດລ້ອມ.

6. ສໍາລັບການສະໜອງນໍ້າໃຫ້ແກ່ການຜະລິດ, ການສັກຢາປ້ອງກັນພະຍາດສັດ ແລະ ການເຝົ້າລະວັງສັດຕູພືດ ແມ່ນໃຫ້ປະຕິບັດຕາມ ຄໍາສັ່ງ ເລກທີ 3510/ກປ, ລົງວັນທີ 27 ຕຸລາ 2016 ວ່າດ້ວຍການອະນາໄມລະບົບຄອງເໝືອງຊົນລະປະທານ ແລະ ຄໍາສັ່ງ ເລກທີ 3511/ກປ, ລົງວັນທີ 27 ຕຸລາ 2016 ກ່ຽວກັບການສ້າງຂະບວນການສັກຢາກັນພະຍາດສັດ ແລະ ຄໍາແນະນໍາ ເລກທີ 3349/ກປ, ລົງວັນທີ 04 ຕຸລາ 2016 ກ່ຽວກັບການຈັດຕັ້ງຜັນຂະຫຍາຍ ຄໍາສັ່ງ ສະບັບເລກທີ 28/ນຍ, ລົງວັນທີ 16 ສິງຫາ 2016 ວ່າດ້ວຍການເພີ່ມທະວີຄວາມຮັບຜິດຊອບຕໍ່ການປ້ອງກັນ ແລະ ກໍາຈັດຕັກແຕນຝູງໄມ້ປ່ອງ ຢູ່ແຂວງ ພາກເໜືອ ສປປ ລາວ ໃຫ້ມີປະສິດທິຜົນ.