ລາວ-ອີຢູເພີ່ມທະວີການຮ່ວມມືປັບປຸງຄຸນນະພາບການສຶກສາຊັ້ນສູງ

        ວັນທີ 15 ພະຈິກນີ້, ສະຫະພາບເອີຣົບ ປະຈຳລາວ ຮ່ວມກັບ ມະຫາວິທະຍາໄລ ແຫ່ງຊາດ, ໄດ້ຈັດກອງປະຊຸມປຶກສາຫາລືການຮ່ວມມືພັດທະນາການສຶກສາຊັ້ນສູງຄັ້ງທີ 2, ໂດຍການເຂົ້າຮ່ວມຂອງທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ເລໂອ ຟາແບ໋ກ ເອກອັກຄະລັດຖະທູດ ສະຫະພາບເອີຣົບ ປະຈຳລາວ ແລະ ຜູ້ຮັກສາການອະທິການບໍດີ ມະຫາວິທະຍາໄລແຫ່ງຊາດ, ພ້ອມດ້ວຍ ຄູ-ອາຈານ ແລະ ນັກສຶກສາເຂົ້າຮ່ວມເປັນຈຳນວນຫລາຍ.

          ກອງປະຊຸມຕ່າງກໍໄດ້ປຶກສາຫາລື, ແລກປ່ຽນບົດຮຽນ ແລະ ປະກສົບການຕ່າງໆຊຶ່ງກັນ ແລະ

ກັນ, ເພື່ອຊອກຫາຊ່ອງທາງ ໃນການປັບປຸງຄຸນນະພາບການ ສຶກສາຊັ້ນສູງ ແລະ ໄດ້ຖືໂອກາດດັ່ງ ກ່າວນຳເອົາຄຳສະເໜີຂອງນັກສຶກສາມະຫາວິທະຍາໄລ ແຫ່ງຊາດ ກໍຄືນັກສຶກສາລາວໃນການໄປສຶກສາຕໍ່ ແລະ ຝຶກອົບຮົມໃນທະວີບເອີຣົບ. ໃນກອງປະຊຸມ ຍັງໄດ້ແລກປ່ຽນປະສົບການໃນການບໍລິຫານຄຸ້ມຄອງການສຶກສາຊັ້ນສູງ ແລະ ປຶກສາຫາລືບັນດາບູລິມະສິດດ້ານການສຶກສາຊັ້ນສູງໃນ ສປປ ລາວ, ການເຊື່ອມໂຍງເຂົ້າພາກພື້ນ ແລະ ສາກົນ, ໂດຍສະເພາະ ວຽກງານການສຶກສາຊັ້ນສູງ ແລະ ການຮ່ວມມືລະຫວ່າງມະຫາວິທະຍາໄລ ແລະ ສະຫະພາບເອີຣົບນຳອີກ.

          ທ່ານເອກອັກຄະລັດຖະທູດ ສະຫະພາບເອີຣົບ ປະຈໍາລາວ ກ່າວວ່າ: ກອງປະຊຸມດັ່ງກ່າວແມ່ນມີຄວາມສຳຄັນຫລາຍຕໍ່ການຍົກສູງການແລກປ່ຽນວຽກງານການສຶກສາ ແລະ ການຕິດຕໍ່ພົວພັນລະ ຫວ່າງລາວ-ສະຫະພາບເອີຣົບ, ເພື່ອແນໃສ່ເພີ່ມທະວີຄວາມເຂົ້າໃຈເຊິ່ງກັນ ແລະ ກັນສູງຂຶ້ນກວ່າເກົ່າ ແລະ ເຮັດວຽກຮ່ວມກັນຢ່າງໃກ້ຊິດ ແລະ ພ້ອມນີ້ ສະຫະພາບເອີຣົບຢືນຢັນຈະສືບຕໍ່ໃຫ້ທຶນການສຶກສາແກ່ ສປປ ລາວ ເພີ່ມຂຶ້ນເລື້ອຍໆ.