laophatthananewspaper: 888 ຕົວເລກທີ່ບໍ່ເພິ່ງປາຖະໜາ

ເຈົ້າໜ້າທີ່ຕຳຫລວດຈະລາ ຈອນ ກະຊວງປ້ອງກັນຄວາມສະຫງົບ ເປີດເຜີຍວ່າ: ປີ 2012 ຜ່ານມາ ຢູ່ທົ່ວປະເທດເຮົາມີອຸ ປະຕິເຫດເກີດຂຶ້ນຫລາຍເຖິງ 6.146 ເທື່ອ ໂດຍສະເລ່ຍມື້ໜຶ່ງເກີດຂຶ້ນຫລາຍກວ່າ 16 ເທື່ອ ແລະ ສິ່ງທີ່ໜ້າເສົ້າກວ່າໝູ່ແມ່ນຍອດຜູ້ເສຍຊີວິດຈາກອຸປະຕິເຫດດັ່ງກ່າວໄດ້ທະວີຂຶ້ນເຖິງ 888 ຄົນ ອັນເປັນຕົວເລກທີ່ບໍ່ເພິ່ງປາຖະ ໜາຂອງປີດັ່ງກ່າວ ແລະ ສົ່ງຜົນໃຫ້ມີຜູ້ໄດ້ຮັບບາດເຈັບນັບຫລາຍພັນຄົນ, ໃນນັ້ນ ມີຜູ້ໄດ້ຮັບບາດເຈັບສາຫັດ 1.200 ກວ່າຄົນ, ເປັນຜົນໃຫ້ພາຫະນະເປ່ເພເກືອບ 6.000 ຄັນ, ໃນນັ້ນ ໃຊ້ການບໍ່ໄດ້ມີ 300 ກວ່າຄັນ.

ຜູ້ລາຍງານຂ່າວໃຫ້ຮູ້ອີກວ່າ: ສາເຫດທີ່ພາໃຫ້ເກີດອຸປະຕິເຫດແມ່ນມາຈາກ 3 ປັດໄຈຫລັກ ຄືໜຶ່ງແມ່ນເກີດຈາກສະພາບແວດລ້ອມດິນຟ້າອາກາດ, ຖະໜົນຫົນ ທາງບໍ່ໄດ້ຄຸນນະພາບເປັນບວກເປັນຂຸມ, ບໍ່ມີລະບົບໄຟເຍືອງທາງ ຫລື ປ້າຍເຕືອນຕ່າງໆ; ສອງແມ່ນເກີດຈາກເຕັກນິກພາຫະນະບໍ່ໄດ້ຄຸນນະພາບເກົ່າແກ່ຊຸດໂຊມ, ນຳມາດັດແປງເຕັກນິກຜິດຈາກສະ ພາບເດີມໃນເວລາຂັບຂີ່ຈຶ່ງບໍ່ຮັບ ປະກັນ, ສ່ວນປັດໄຈທີ່ສາມແມ່ນເກີດມາຈາກຜູ້

ຂັບຂີ່ບໍ່ໃສ່ໃຈລະ ບຽບຈະລາຈອນ ແລະ ລ່ວງລະເມີດ ເຊິ່ງສະແດງອອກໃຫ້ເຫັນຈາກຕົວເລກອຸປະຕິເຫດໃນປີ 2012 ຜ່ານມາ ຈາກການເມົາແລ້ວຂັບມີເກືອບ 2.000 ຄົນ, ອາຍຸບໍ່ເຖິງກະສຽນແຕ່ຂັບຂີ່ມີ 752 ຄົນ, ບໍ່ໄດ້ຜ່ານການສອບເສັງໃບຂັບຂີ່ (ບໍ່ມີໃບຂັບຂີ່) ຫລາຍກວ່າ 5.300 ຄົນ, ໃນນັ້ນ ສ່ວນໃຫຍ່ແມ່ນກຳມະກອນມີຫລາຍກວ່າ 3.600 ຄົນ, ຖັດລົງມາແມ່ນນັກ ຮຽນ-ນັກສຶກສາມີ 2.800 ກວ່າຄົນ.

ເຈົ້າໜ້າທີ່ຈະລາຈອນ ໃຫ້ຮູ້ອີກວ່າ: ອຸປະຕິເຫດທີ່ເກີດຂຶ້ນໃນປີ 2012 ນອກຈາກເຮັດໃຫ້ມີຜູ້ເສຍຊີວິດເປັນຈຳນວນຫລາຍແລ້ວ ຍັງສົ່ງຜົນໃຫ້ເສດຖະກິດເສຍຫາຍຫລາຍກວ່າ 60 ຕື້ກີບ, ໃນນັ້ນ ຢູ່ນະຄອນຫລວງວຽງຈັນແມ່ນມີຜູ້ເສຍຊີວິດຫລາຍກວ່າໝູ່ ມີປະມານ 200 ກວ່າຄົນ, ສະ ຫວັນນະເຂດ 116 ຄົນ, ຈຳປາສັກ 50 ຄົນ. ຄຽງຄູ່ກັນນັ້ນ ແມ່ນແຂວງຜົ້ງສາລີເປັນແຂວງທີ່ມີຜູ້ເສຍຊີວິດຈາກອຸປະຕິເຫດເກີດຂຶ້ນໜ້ອຍກວ່າໝູ່ພຽງ 7 ຄົນ.

ຂ່າວລາຍງານໃຫ້ຮູ້ວ່າ: ຄ່ຳ ຄືນວັນທີ 20 ມັງກອນນີ້, ເຈົ້າໜ້າທີ່ຈະລາຈອນແຂວງຊຽງຂວາງ ໄດ້ຮັບແຈ້ງວ່າ ເກີດອຸປະຕິເຫດໃນ ເຂດບ້ານນາໂອ ເມືອງແປກ ແຂວງຊຽງຂວາງ ແລະ ມີຜູ້ເສຍຊີວິດ ຈຶ່ງໄດ້ຮີບຮ້ອນລົງໄປ ບ່ອນ ເກີດເຫດທັນທີ ແລະ ເຫັນຜູ້ເສຍ ຊີວິດຫ່າງຈາກທາງຢາງປະມານ 2 ແມັດ ແຕ່ບໍ່ພົບລົດຄູ່ກໍລະນີເຫັນ ພຽງເສດຊິ້ນສ່ວນບາງອັນຂອງ ລົດທີ່ກໍ່ເຫດຕົກເຮັ່ຍ, ແຕ່ຍ້ອນ ຄວາມມືດ ເຈົ້າໜ້າທີ່ບໍ່ສາມາດ ສັນລະສູດໄດ້ຈິ່ງ ມອບໃຫ້ການຈັດ ຕັ້ງບ້ານ ພ້ອມຍາດພີ່ນ້ອງຜູ້ຕາຍ ຮັກສາຊາກສົບໄວ້ ຈົນຮອດວັນທີ 21 ເຈົ້າໜ້າທີ່ໄດ້ລົງສັນ ນະສູດຄະ ດີອຸປະຕິເຫດດັ່ງກ່າວຕື່ມ ຈຶ່ງຮູ້ວ່າ ລົດຄັນກໍ່ເຫດແມ່ນລົດກະບະວີໂກ ສີດຳ ໝາຍເລກທະບຽນ ກຳແພງ ນະຄອນ ກກ 1995 ເປັນລົດຂອງ ທ້າວ ພຸດທະວົງ ຢູ່ເມືອງຄູນ ແຂວງຊຽງຂວາງ ໄດ້ໃຫ້ ທ້າວ ເກື່ອງ ຄົນຫວຽດນາມ ເຮັດວຽກ ຢູ່ໂຮງເລື່ອຍແຫ່ງໜຶ່ງ ຢູ່ເມືອງຄູນ ເຊົ່າ, ເຈົ້າໜ້າທີ່ຈິ່ງໄດ້ນຳຈັບຕົວ ຜູ້ກະທຳຜິດ ຊື່ ທ້າວເກື່ອງ ພ້ອມ ໝູ່ທີ່ນັງມານຳໃນມື້ເກີດເຫດ ແລະ ໃຫ້ຜູ້ກ່ຽວບອກບ່ອນຊຸກເຊື່ອງລົດ ຄັນກໍເຫດ ເຊິ່ງປະໄວ້ທີ່ ຮ້ານກິນ ດື່ມ ນາງເຮືອງ ບ້ານໂພນສະ ຫວ່າງ ເມືອງແປກ ພ້ອມໄດ້ກັກ ຕົວ ນາງເຮືອງ ຜູ້ຮ່ວມກະທຳຜິດ ຄັ້ງນີ້. ຜ່ານການສືບສວນສອບ ສວນ ພວກກ່ຽວຮັບສາລະພາບ ວ່າ: ພວກຕົນໄດ້ເຊົ່າລົດເພື່ອໄປ ເຮັດວຽກຢູ່ສັນຫຼວງ ແລ້ວ ກັບມາ ໂຮງເລື່ອຍ ຫລັງຈາກນັ້ນ ກໍພາ ກັນດື່ມກິນຈົນຮອດ 21 ໂມງ , ທ້າວ ເກື່ອງ ພ້ອມໝູ່ 4 ຄົນໄດ້ພາ ກັນອອກໄປຮ້ານຄາລາໂອເກະ ແຫ່ງໜຶ່ງ ແຕ່ພໍມາຮອດຈຸດເກີດ ເຫດ ໄດ້ຈຶ່ງໄດ້ຕຳລົດຖີບທີ່ມີ 2 ຄົນຊ້ອນກັນ ແລະ ຫຼົບໜີຄະດີໄປ ໄດ້ 1 ກິໂລແມັດ ຈິ່ງຈອດເພື່ອງັດ ເອົາລົດຖີບອອກຈາກຫົວລົດໄປ ຖີ້ມໄວ້ ແຕ່ລົດວີໂກໝໍ້ ນ້ຳຮົ່ວບໍ່ ສາມາດຕິດຈັກໄດ້ຈິ່ງໄດ້ໂທລະ ສັບຫາ ທ້າວ ບິ່ງ ເອົາລົດຮຸນໄດ ມາແກ່ຕິດຈັກ ແລ້ວບອກທ້າວບິ່ງ ໄປເກັບສິ້ນສ່ວນຕົກເຮັ່ຍບ່ອນ ເກີດເຫດ ໄປຖິ້ມແລ້ວ ທ້າວເກື່ອງ ໄດ້ນຳເອົາລົດໄປເຊື່ອງທີ່ຮ້ານກິນດື່ມນາງ ເຮືອງ. ເຈົ້າໜ້າທີ່ສາ ມາດນຳຕົວ ທ້າວເກື່ອງ, ທ້າວ ກວຽດ ແລະ ນາງເຮືອງ ໄປກັກ ຕົວໄວ້, ສ່ວນຄູ່ຮ່ວມທາງ ມີທ້າວ ຕັ້ງ, ທ້າວຢາງ ແລະ ນາງສາງ ຍັງບໍ່ທັນນຳຕົວໄດ້. ສ່ວນການ ແກ້ໄຂຄະດີນັ້ນເຈົ້າໜ້າທີ່ຈາລະ ຈອນແຂວງ ຍັງພວມສຳເນົາຄະ ດີສົ່ງໄອຍະການ ປະຊາຊົນແຂວງ ແລະ ດຳເນີນການຊອກນຳຕົວ ອີກ 3 ຄົນ ທີ່ຍັງຫຼົບໜີຢູ່. ສ່ວນຜູ້ ຕາຍຄື ທ້າວ ເຢ້ັງຢ່າງ ອາຍຸ 17 ປີ ແລະ ທ້າວ ເນັ່ງມົວ ອາຍຸ 14 ປີ ຢູ່ບ້ານນາໂອ ເມືອງແປກ ໄດ້ ມອບໃຫ້ຍາດພີ່ນ້ອງນຳໄປປະຕິ ບັດ ຕາມປະເພນີເຜົ່າມົ້ງ ແລະ ມາໃນວັນທີ 23 ມັງກອນນີ້,ໄດ້ ເກີດອຸປະຕິເຫດ ສະຫຍອງຂວັນ ຂຶ້ນອີກ ຢູ່ໃກ້ກັບໂຮງຮຽນ ແຮກ ມານໄມເນີ ແຂວງຊຽງຂວາງ ເສັ້ນທາງ 1D,ລົດກະບະໝາຍ ເລກທະບຽນ ກທ ຊຂ 0033 ຂັບ ຂີ່ໂດຍທ້າວ ອ່ອນສີ ອາຍຸ 45 ປີ ໄດ້ຕຳກັບລົດຈັກ ຢ່າງແຮງເຮັດ ໃຫ້ທ້າວ ລອຍ ອາຍຸ 19 ປີຜູ້ຂັບຂີ່ ລົດຈັກ ແລະ ທ້າວ ຈູຍ ຜູ້ຊ້ອນ ທ້າຍທັງສອງ ຢູ່ບ້ານໂພນທອງ ເມືອງແປກເສຍຊີວິດຄາທີ່ ສ່ວນສາເຫດນັ້ນ ເຈົ້າໜ້າທີ່ຍັງດຳເນີນຄະດີຕໍ່ໄປ.

ຕໍ່ສະພາບດັ່ງກ່າວນີ້ ມັນເປັນສະຕິເຕືອນໃຫ້ພວກເຮົາຈະຕ້ອງໄດ້ເພີ່ມທະວີສະກັດກັ້ນອຸປະຕິເຫດທ້ອງຖະ ໜົນໃຫ້ຫລຸດໜ້ອຍລົງ ໂດຍພາກສ່ວນຕ່າງໆຕ້ອງມີສ່ວນຮ່ວມເຊັ່ນ: ສະຖາບັນຄອບຄົວ, ໂຮງຮຽນ ແລະ ສັງຄົມຈະຕ້ອງໄດ້ຮ່ວມແຮງຮ່ວມໃຈກັນຫລາຍຂຶ້ນ.