ຜູ້ເສຍຊີວິດຍ້ອນອຸປະຕິເຫດຕາມຖະຫນົນຍັງເພີ່ມຂຶ້ນ

    ເຈົ້າໜ້າທີ່ຈະລາຈອນນະຄອນຫລວງວຽງຈັນໃຫ້ຮູ້ວ່າ: ນັບແຕ່ວັນທີ 1622 ມັງກອນນີ້,ຢູ່ນະ ຄອນຫລວງວຽງຈັນມີອຸປະຕິເຫດເກີດຂຶ້ນ 35 ກໍລະນີ ໃນນີ້ ມີພາຫະນະເປ່ເພ 74 ຄັນ, ມີຜູ້ເສຍຊີວິດ 5 ຄົນ ແລະ ບາດເຈັບ 31 ຄົນ,ມີມູນຄ່າເສຍຫາຍຫລາຍກວ່າ 600 ລ້ານກີບ ເຊິ່ງຕົວເລກດັ່ງກ່າວສະແດງໃຫ້ເຫັນວ່າ: ມີຜູ້ເສຍຊີວິດຍ້ອນອຸປະຕິເຫດຕາມຖະໜົນຢູ່ນະຄອນຫລວງວຽງຈັນຍັງມີທ່າອ່ຽງເພີ່ມຂຶ້ນ.

    ສຳລັບອຸປະຕິເຫດທີ່ເຮັດໃຫ້ມີຜູ້ເສຍຊີວິດມີຄືໃນວັນທີ 15 ມັງ ກອນ ເວລາປະມານ 17:40 ໂມງ ລົດຈັກຕຳກັບລົດໃຫຍ່ຢູ່ເສັ້ນທາງທົ່ງປົ່ງ ເມືອງສີໂຄດຕະບອງ ເຮັດໃຫ້ຜູ້ຂັບຂີ່ລົດຈັກຊື່ທ້າວ ນິທອງ ອາຍຸ 47 ປີ ເສຍຊີວິດ ແລະ ໃນມື້ ດຽວກັນ ເວລາ 6:00 ໂມງ,ເກີດອຸປະຕິເຫດຢູ່ເສັ້ນທາງເລກທີ 13 ເໜືອ ລົດຈັກຕຳລົດບັນທຸກ ເຮັດໃຫ້ຜູ້ຂັບຂີ່ລົດຈັກຊື່ທ້າວ ຈັນສຸກ ອາຍຸ 30 ປີ ເສຍຊີວິດ, ໃນວັນທີ16 ມັງກອນ ເກີດອຸປະຕິເຫດລົດຈັກຕຳກັບລົດບັນທຸກຢູ່ເຂດບ້ານສະ ພັງມຶກ ເມືອງໄຊທານີ ເຮັດໃຫ້ຜູ້ຂັບຂີ່ລົດຈັກຊື່ທ້າວ ອານຸວອນ ອາຍຸ 34 ປີເສຍຊີວິດ ແລະ ໃນມື້ດຽວກັນເວລາປະມານ 8:00

ໂມງ,ເກີດອຸປະຕິເຫດລົດບັນທຸກຕ່ຳເດັກນ້ອຍ (ຊາຍ) ອາຍຸ 1 ປີ 3 ເດືອນ ເສຍຊີວິດຄາທີ່ ຢູ່ເຂດບ້ານອ່າງນ້ອຍ ເມືອງສັງທອງ ແລະ ໃນວັນທີ 18 ມັງກອນ ເວລາປະມານ 16:30 ໂມງ ເກີດອຸປະຕິເຫດຢູ່ຖະໜົນທ່າເດື່ອ ລົດໃຫຍ່ຕຳລົດບັນທຸກ ເຮັດໃຫ້ຜູ້ຂັບລົດໃຫຍ່ຊື່ທ້າວ ສົມດີ ສິດທະວົງ ອາຍຸ 29 ປີ ເສຍຊີວິດ. ສະນັ້ນ ເພື່ອເປັນການຫລຸດຜ່ອນບັນຫາການເກີດອຸປະຕິເຫດຕາມຖະໜົນ ແລະ ຮັບປະກັນຄວາມສູນເສຍທັງຊີວິດ ແລະ ຊັບສິນ, ຜູ້ຂັບຂີ່ຄວນມີສະຕິມັດລະວັງໃນການສັນຈອນໄປມາຕາມທ້ອງຖະໜົນ ສິ່ງສຳຄັນແມ່ນຕ້ອງເຄົາລົບລະບຽບການຂັບຂີ່ຢ່າງເຂັ້ມງວດ ເພື່ອຫລີກເວັ້ນ ການສູນເສຍຄືດັ່ງກ່າວ.