ອາທິດຜ່ານມາ, ເຈົ້າໜ້າທີ່ສາມາດມ້າງກຸ່ມແກ໊ງມົ້ວສຸມຢາເສບຕິດໄດ້ຫລາຍລາຍ

       ກອງບັນຊາການ ປກສ ນະ ຄອນຫລວງວຽງຈັນ ລາຍງານໃຫ້ຮູ້ວ່າ:ອາທິດຜ່ານມາ,ເຈົ້າໜ້າ ທີ່ພະແນກປາບປາມຢາເສບຕິດນະຄອນຫລວງວຽງຈັນ ສົມທົບກັບເຈົ້າໜ້າທີ່ ປກສ ເມືອງຈັນທະບູລີ ໄດ້ມ້າງກຸ່ມແກ໊ງຄ້າຂາຍ ແລະ ມົ້ວສຸມຢາເສບຕິດຢູ່ບ້ານໂພນຕ້ອງສະຫວາດ ເມືອງຈັນທະບູລີ ນະຄອນຫລວງວຽງຈັນ ໂດຍສາມາດຈັບກຸມຜູ້ກະທຳຜິດໄດ້ 4 ຄົນ (ຍິງ 2 ຄົນ) ຄືນາງ ອຳມອນ ອາຍຸ 35 ປີ ຫວ່າງວຽກ, ນາງ ເຂັມພອນ ອາຍຸ 45 ປີ ຫວ່າງວຽກ, ທ້າວ ເຂັມໄຊ ອາຍຸ 36 ປີ ຫວ່າງວຽກ ແລະ ທ້າວ ໄຊປະເສີດ ອາຍຸ 21 ປີ ຫວ່າງວຽກ ພ້ອມຂອງກາງຢາບ້ານຈຳນວນ 47 ເມັດ ໂດຍການເຂົ້າມ້າງກຸ່ມແກ໊ງມົ້ວສຸມຢາເສບຕິດດັ່ງກ່າວມີຂຶ້ນໃນວັນທີ 16 ມັງກອນນີ້.

    ເຈົ້າໜ້າທີ່ໃຫ້ຮູ້ຕື່ມວ່າ: ໃນວັນທີ 21 ມັງກອນ, ເຈົ້າໜ້າທີ່ກອງບັນຊາການປ້ອງກັນເຄື່ອນທີ່ ໄດ້ກັກຜູ້ຕ້ອງຫາ 2 ຄົນ ຄືທ້າວ ຮອງທອງ ສຸລິທາ ອາຍຸ 23 ປີ ອາຊີບນັກສຶກສາ ຢູ່ບ້ານສົມສະໜຸກ ເມືອງຫາດຊາຍຟອງ ນະ ຄອນ ຫລວງວຽງຈັນ ແລະ ທ້າວ ບຸນທະວີ ວົງດາລາ ອາຍຸ 26 ປີ ອາຊີບນັກສຶກສາ ຢູ່ບ້ານໜອງທາເໜືອ ເມືອງຈັນທະບູລີ ນະຄອນ ຫລວງວຽງຈັນ ພ້ອມຂອງກາງຢາບ້າ 5 ເມັດ ໂດຍຜູ້ຕ້ອງຫາທັງໝົດເຈົ້າໜ້າທີ່ຈະສົ່ງສຳນວນຄະດີໃຫ້ໄອຍະການ ເພື່ອດຳເນີນຄະດີຕາມລະບຽບກົດໝາຍບ້ານເມືອງ.