ພະແນກອຸດສາຫະກຳ ແລະ ການຄ້າແຂວງຈຳປາສັກເອົາໃຈໃສ່ຄວບຄຸມລາຄາສິນຄ້າ

         ທ່ານ ວິຊຸນ ແກ້ວຄຳຜຸຍ ຫົວໜ້າຂະແໜງການຄ້າພາຍໃນ ພະແນກອຸດສາຫະກຳ ແລະ ການ ຄ້າແຂວງຈຳປາສັກ ໃຫ້ຮູ້ວ່າ: ປະຈຸບັນເຈົ້າໜ້າທີ່ການຄ້າຂອງພວກເຮົາ ໄດ້ເອົາໃຈໃສ່ກວດກາຕິດຕາມ ແລະ ຄວບຄຸມລາຄາສິນຄ້າເປັນຕົ້ນ ບັນດາສິນຄ້າທີ່ ນອນໃນ 4 ໝວດຄື: ໝວດສິນຄ້າສະບຽງອາຫານ, ໝວດນ້ຳມັນເຊື້ອໄຟ ແລະ ອາຍແກັສ, ໝວດເຄື່ອງກໍ່ ສ້າງ, ໝວດເຄື່ອງຮັບໃຊ້ການຜະລິດກະສິກຳ ຢ່າງ ເປັນປົກກະຕິຕໍ່ເນື່ອງ ເພື່ອປ້ອງກັນການສວຍໂອກາດຂຶ້ນລາຄາສິນຄ້າ ເຊິ່ງຈະສົ່ງຜົນກະທົບໂດຍກົງຕໍ່ຜູ້ຊົມໃຊ້ ແລະ ບໍລິໂພກ, ແຕ່ເຖິງຢ່າງໃດກໍ່ດີໃນໄລຍະນີ້ ບັນຍາກາດການຊື້-ຂາຍສິນຄ້າ ໃນທ້ອງຕະຫຼາດ ຄຶກຄັກສົມຄວນ ໂດຍສະເພາະແມ່ນການຫ້າງຫາ ກະກຽມສະຫຼອງ ໃນງານບຸນ ປີໃໝ່ຂອງຊາວຈີນ ແລະ ຫວຽດນາມ ເຊິ່ງເຮັດໃຫ້ຄວາມຕ້ອງ ການຂອງລູກຄ້າເພີ່ມສູງຂຶ້ນ, ແຕ່ທາງກົງກັນຂ້າມການຕອບສະໜອງຄວາມຕ້ອງການ ຂອງຜູ້ຊົມ ໃຊ້ຜັດບໍ່ພຽງພໍ ເປັນເຫດເຮັດໃຫ້ ມີການສວຍ ໂອກາດຂຶ້ນລາຄາ ສິນຄ້າບາງປະເພດເປັນຕົ້ນແມ່ນ ຊີ້ນງົວ,ຄວາຍ ປະເພດ 1 ຂາຍໃນ ປັດຈຸບັນແມ່ນ ກິໂລລະ 65.000 ກີບ ແລະ ປະເພດ 2 ກິໂລລະ 60.000 ກີບ,ທຽບໃສ່ເພດານ ທີ່ ກຳນົດເພີ່ມຂຶ້ນກິໂລລະ 10.000 ກີບ ແລະ 15.000 ກີບຕາມລຳ ດັບ, ສ່ວນຊີ້ນໝູປະເພດ 1 ມີລາ ຄາ 40.000 ກີບຕໍ່ກິໂລ ແລະ ປະເພດ 2 ກິໂລລະ 35.000 ກີບທຽບ ໃສ່ເພດານທີ່ກຳນົດເພີ່ມຂຶ້ນກິໂລລະ 5.000 ກີບ ແລະ 3.000 ກີບຕາມ ລຳດັບ.

             ທ່ານ ວິຊຸນ ແກ້ວຄຳຜຸຍ ກ່າວຕ່ືມວ່າ: ຕໍ່ບັນຫານີ້ ທາງເຈົ້າໜ້າທີ່ພວກເຮົາກໍຈະໄດ້ຊອກຫາວິທີແກ້ໄຂ ແລະ ນຳໃຊ້ ມາດຕະການຕໍ່ຜູ້ລະເມີດ, ພ້ອມນີ້ ກໍຮຽກຮ້ອງໃຫ້ຜູ້ຊົມໃຊ້ ແລະ ຜູ້ບໍລິໂພກກໍ່ຕ້ອງເປັນເຈົ້າການ ແລະ ມີສະຕິລະວັງຕົວໃນ ການຊື້ສິນຄ້າທຸກຄັ້ງໂດຍການກວດກາເບິ່ງຈຳນວນສິນຄ້າທີ່ສັ່ງຊື້, ສິນຄ້າມີຄຸນນະພາບຫຼືບໍ?, ຖືກເອົາປຽບຈາກແມ່ ຄ້າ ແລະ ບັນຫາ ອື່ນໆກໍ່ສາມາດແຈ້ງຫາເຈົ້າ ໜ້າທີ່ການຄ້າແຂວງຈຳປາສັກໄດ້.