ມອບ-ຮັບສູນທົດລອງກະສິກຳ ແບບປະສົມປະສານຂອງມະຫາ ວິທະຍາລຈຳປາສັກ

   ພິທີມອບ-ຮັບສູນທົດລອງກະສິກຳແບບປະສົມປະສານ ຂອງມະຫາວິ ທະຍາໄລຈຳປາສັກໄດ້ຈັດຂຶ້ນໃນທ້າຍເດືອນມັງກອນຜ່ານມາ, ກ່າວມອບ ໂດຍທ່ານ ຈຸນລະພົງ ໂນນໄຊສີ ຜູ້ຊ່ວຍລັດຖະມົນຕີກະຊວງການຕ່າງປະ ເທດ ແຫ່ງຣາຊະອານາຈັກໄທ, ກ່າວຮັບໂດຍທ່ານ ດຣ. ສີຄຳຕາດ ມີຕາ ໄລ ອະທິການບໍດີມະຫາວິທະຍາ ໄລຈຳປາສັກ, ທ່ານ ຮຈ. ດຣ. ກອງສີ ແສງ ມະນີ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາ, ອະທິ ການບໍດີມະຫາວິທະຍາໄລແຂວງອຸບົນຣາຊະທານີຕະຫລອດຮອດຄະນະບໍດີ, ຄູ-ອາຈານ ແລະ ນັກສຶກສາມະ ຫາວິທະຍາໄລຈຳປາສັກເຂົ້າ ຮ່ວມ.

    ສູນທົດລອງກະສິກຳແບບປະສົມປະສານຂອງມະຫາວິທະຍາໄລຈຳປາສັກພາຍໃຕ້ການຮ່ວມມືລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງຣາຊະອານາຈັກໄທ ເຊິ່ງຕັ້ງຢູ່ບ້ານໜອງສິມເມືອງບາຈຽງຈະເລີນສຸກ ແຂວງຈຳ ປາສັກ ຈະເປັນບ່ອນເຝິກອົບຮົມຄວາມຮູ້ວິຊາການໃຫ້ແກ່ກະສິກອນ ແລະ ເປັນບ່ອນລົງເຝິກຫັດຄົ້ນ ຄວ້າທົດລອງເຮັດຕົວຈິງຂອງນັກ ສຶກສາດ້ານການປູກຝັງໂດຍສະເພາະຕົ້ນໄມ້ໃຫ້ໝາກ, ພືດຜັກ, ເຫັດ ແລະ ການຜະລິດແນວພັນພືດ.

    ສູນດັ່ງກ່າວເລີ່ມລົງມືກໍ່ສ້າງແຕ່ກາງເດືອນກຸມພາ ແລະ ສຳເລັດກາງເດືອນຕຸລາ 2012 ມູນຄ່າການກໍ່ສ້າງທັງໝົດ 2,6 ຕື້ກວ່າ ກີບ (10 ລ້ານບາດ) ເຊິ່ງປະກອບມີຫໍພັກ 2 ຫລັງ (ຊາຍ-ຍິງ), ຫ້ອງການ, ສາລາຮັບໃຊ້ວຽກງານ ຕ່າງໆ, ຮ້ານຂາຍ ຜົນຜະລິດ, ໂຮງປູກເຫັດ, ໂຮງເປີດດອກເຫັດ ແລະ ໂຮງປະສົມກ້ອນເຊື້ອເຫັດ.

    ທ່ານ ດຣ. ເພັດສະໄໝ ວິຣະ ເພັດ ຄະນະບໍດີ ຄະນະກະເສດ ສາດ ແລະ ປ່າໄມ້ ມະຫາວິທະຍາ ໄລຈຳປາສັກ ກ່າວວ່າ: ຕໍ່ໜ້ານີ້ ພວກເຮົາຈະສືບຕໍ່ຮ່ວມມືກັບມະຫາວິທະຍາໄລແຂວງອຸບົນຣາຊະທານີ ໃນການຈັດຊຸດອົບຮົມ ເພື່ອຍົກລະດັບ ຄວາມຮູ້ຄວາມສາມາດໃຫ້ແກ່ພະນັກງານ, ບຸກຄະລາກອນຂອງມະຫາວິທະຍາໄລຈຳປາສັກ ໂດຍສະເພາະການປູກເຫັດ, ການປຸງແຕ່ງຜະລິດຕະພັນກະສິກຳ, ການຜະລິດແນວພັນພືດ ແລະ ການປ້ອງກັນພືດແບບປະສົມປະສານ.

    ນອກຈາກນັ້ນ ກໍຈະນຳໃຊ້ສູນແຫ່ງນີ້ເປັນບ່ອນທົດລອງ, ຜະລິດ, ຈັດເຝິກອົບຮົມເພື່ອສົ່ງເສີມວິຊາການໃຫ້ແກ່ກະສິ ກອນ ແລະ ຊາວສວນຕື່ມອີກ.