ເກີດເຫດຂົ່ມຂືນຜູ້ເຖົ້າ

     ປກສ ບ້ານສະພານທອງເໜືອ ເມືອງ ສີສັດຕະນາກ ນະຄອນຫຼວງວຽງຈັນ ໃຫ້ຮູ້ວ່າ: ໃນຕອນເຊົ້າຂອງວັນທີ 6 ມີນາ ນີ້ ໄດ້ເກີດເຫດໄວລຸ້ນ ຂົ່ມຂືນຜູ້ເຖົ້າອາຍຸປະ ມານ 60 ປີ ຢູ່ ເຂດສວນ 23 ສິງຫາ ບ້ານສະພານທອງເໜືອ ເມືອງ ສີສັດຕະນາກ ນະຄອນຫຼວງວຽງຈັນ ໂດຍຄົນຮ້າຍໄດ້ທຳຮ້າຍຮ່າງກາຍຜູ້ເສຍຫາຍກ່ອນຈະຂົ່ມຂືນ ແລະ ຫລົບໜີ.

         ປກສ ບ້ານ ສະພານທອງເໜືອ ກ່າວວ່າ: ຈາກຜູ້ເຫັນເຫດການໃນຈຸດເກີດເຫດເວົ້າວ່າ: ໃນເວລາ 4 ໂມງເຊົ້າ ໄດ້ ມີຜູ້ເຖົ້າມາຍ່າງອອກກຳລັງກາຍຢູ່ສະຖານທີ່ດັ່ງກ່າວ ຈາກນັ້ນກໍໄດ້ຍິນສຽງຮ້ອງຂໍຄວາມຊ່ວຍເຫຼືອ ຈຶ່ງໄດ້ແລ່ນອອກໄປເບິ່ງ ແລະ ພົບເຫັນ ຜູ້ເຄາະຮ້າຍນອນຢູ່ຕູບທີ່ເປັນບ່ອນຄົນຍາມສວນ ໂດຍເຫັນສະພາບໂສ້ງເສື້ອຂາດ ແລະ ມີຮອຍທຸບຕີ ແລະ ເຫັນຄົນຮ້າຍຂັບລົດລົບໜີໄປ.

          ປກສ ບ້ານ ກ່າວວ່າ: ຈາກການສອບສວນຜູ້ເສຍຫາຍເວົ້າວ່າ: ໄດ້ມາຍ່າງອອກກຳລັງກາຍທຸກໆວັນຢູ່ສະຖານ ທີ່ດັ່ງກ່າວ ແລະ ໃນມື້ເກີເຫດຄົນຮ້າຍຂີ່ລົດຈັກມາຈອດຢູ່ໃກ້ກັບສວນ 23 ສິງຫາ ແລະ ໄດ້ຈັບໂຕຜູ້ກ່ຽວເຂົ້າໄປໃນຕູບ ແລະ ໄດ້ທຳຮ້າຍຮ່າງກາຍກ່ອນທີ່ຈະຂົ່ມຂືນ ໃນຂະນະນັ້ນຕົນກໍໄດ້ຮ້ອງໃຫ້ຄົນມາຊ່ວຍເຫຼືອກ່ອນທີ່ໄວລຸ້ນນັ້ນຈະຫລົບໜີໄປ ແລະ ປັດຈຸບັນ ເຈົ້າໜ້າທີ່ກຳລັງສືບສວນນຳຈັບຫາຄົນຮ້າຍມາລົງໂທດຕາມລະບຽບກົດໝາຍໃຫ້ໄດ້.

       ຈາກເຫດການດັ່ງກ່າວ ທາງເຈົ້າໜ້າທີ່ຍັງຝາກເຕືອນໃຫ້ຜູ້ມັກອອກກຳລັງກາຍໃນຕອນເຊົ້າມືດ ໂດຍສະເພາະແມ່ນແມ່ ຍິງໃຫ້ມີສະຕິລະວັງຕົວຕື່ມຂື້ນເພື່ອຫຼີກເວັ້ນເຫດການຄືດັ່ງຂ້າງເທີງ ແລະ ບໍ່ໃຫ້ຕົກເປັນເຫຍື່ອຂອງພວກກຸ່ມຄົນບໍ່ດີ.