ຢາກແກ້ໄຂບັນຫາອຸປະຕິເຫດ ຕ້ອງແກ້ໄຂ 13 ບັນຫາຕົ້ນຕໍ

      ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ດຳ​ເນີນ​ກອງ​ປະຊຸມສຶກສາຄົ້ນ ຄວ້າ ​ເພື່ອ​ຊອກ​ຫາ​ຕົ້ນ​ເຫດ​ທີ່​ພາ​ໃຫ້​ມີ​ສະພາບ​ອຸປະຕິ​ເຫດ​ບົນ​ທ້ອງ​ຖະໜົນ​ເພີ່ມ​ຂຶ້ນ ​ແລະ ກອງ​ປະຊຸມ​ໄດ້​ສະ ຫລຸບຜົນ​ອອກ​ມາ​ວ່າ:ມີ 13 ບັນຫາ​ຕົ້ນຕໍ ​ເຊິ່ງພວກ​ເຮົາ​ຈະ​ຕ້ອງ​ສຸມ​ໃສ່​ແກ້​ໄຂ ຈຶ່ງ​ຈະ​ເຮັດ​ໃຫ້​ສະພາບ​ອຸປະຕິ​ເຫດ​ດັ່ງກ່າວ​ຫລຸດຜ່ອນ​ລົງ​ໄດ້​ຄື

    1. ​ຕ້ອງ​ເພີ່ມ​ທະວີ​ສຶກສາ​ອົບຮົມ​ສະຕິ​ເຄົາລົບ ​ແລະ ປະຕິບັດ​ລະ ບຽບ​ກົດໝາຍ​ໃນ​ສັງຄົມ​ໃຫ້​ໜັກ​ແໜ້ນ​ກວ່າ​ເກົ່າ ​ໂດຍ​ສະ​ເພາະ​ການ​ປະຕິບັດ​ລະບຽບ​ຈະລາຈອນ ບໍ່​ຈອດ​ລົດ​ຊະຊາຍ.

   2. ​ແມ່ນ​ຕ້ອງ​​ແກ້​ໄຂ​ສະພາບ​ນຳ​ໃຊ້​ເສັ້ນທາງ ​ເພື່ອຜົນ​ປະ​ໂຫຍ​ດ​ເຊັ່ນ: ຂາຍ​ເຄື່ອງ ຫລື ນຳ​ໃຊ້​ແຄມ​ທາງ​ເຂົ້າ​ໃນ​ການ​ປະກອບ​ການ​ໃດ​ໜຶ່ງ,ການ​ວາງ​ວັດ​ສະ​ດຸ​ກໍ່ສ້າງ, ກອງ​ດິນ, ກອງ​ຊາຍ, ​ເອົາ​ເສັ້ນ ທາງ​ເປັນ​ບ່ອນ​ຝາກ​ລົດ ​ແລະ ນຳ​ໃຊ້​ເຂົ້າ​ໃນ​​ບຸນ​ສິນ​ກິນ​ທານ​ອື່ນໆ.

    3. ຄວນ​ຈຳກັດ​ການ​ອະນຸຍາດ​ໃຫ້​ລົດ​ບັນທຸກ​ສິນຄ້າ, ລົດ​ພວງ, ລົດ​ແກ່​ດິນ-​ແກ່​ຊາຍ​ຕ່າງໆ​ແລ່ນ​ເຂົ້າຕົວ​ເມືອງ​ໃນ​ເວລາ​ເຂົ້າ ການ-​ເລີກ​ການ.

      4. ຕ້ອງ​ແກ້​ໄຂ​ພາຫະນະ​ທີ່​ບໍ່​ຮັບປະກັນ​ດ້ານ​ເຕັກນິກ​ແລ່ນ​ໃນ​ທ້ອງ​ຖະໜົນ.

      5. ຕ້ອງ​ເອົາ​ໃຈ​ໃສ່​ການ​ຕິດ​ປ້າຍ ​ແລະ ​ເຄື່ອງໝາຍ​ການ​ຈະ ລາ​ຈອນ​​ໃຫ້​ສອດຄ່ອງ ​ແລະ ຖືກ ຕ້ອງ​ກັບ​ສະພາບ​ຄວາມ​ເປັນ​ຈິງ ​ໂດຍ​ສະ​ເພາະ​ປ້າຍ​ເຕືອນ​ການ​ສັນຈອນ ​ແລະ ປ້າຍ​ຫ້າມ​ຕ່າງໆ ນັບ​ທັງ​ລະບົບ​ໄຟ​ອຳນາດ​ກໍ​ຕ້ອງ​ໃຫ້​ຮັບປະກັນ.

    6. ຈະ​ຕ້ອງ​ແກ້​ໄຂ​ສະພາບ​ທີ່​ສຳ ນັກງານ, ອົງການ, ​ໂຮງ​ຈັກ-​ໂຮງ ງານ ຫລື ສະຖານ​ທີ່​ບໍລິການ​ຕ່າງໆ​ທີ່​ເຂົ້າການ-​ເລີກ​ການ​ໃນ​ເວລາ​ດຽວ​ກັນ.

     7. ຕ້ອງ​ເອົາ​ໃຈ​ໃສ່​ບູລະນະ​ປົວ​ແປງ​ເສັ້ນທາງ​ຄົມມະນາຄົມ​ໃຫ້​ຮັບປະກັນ. 8. ຈະ​ຕ້ອງ​ໄດ້​ກຳນົດ​ຈຸດ​ຈອດ​ລົດ​ຢູ່​ແຕ່​ລະ​ບ່ອນ​ໃຫ້​ຮັບ ປະກັນ ​ແລະ ບໍ່​ສົ່ງ​ຜົນ​ກະທົບ​ຕໍ່​ສະພາບ​ການ​ຈະລາຈອນ​ໃນ​ຕົວ​ເມືອງ.

      9. ຈະ​ຕ້ອງ​ໄດ້​ເລັ່ງປັບປຸງ​ໄຟ ອຳນາດ​ໃຫ້​ຮັບປະກັນ ພ້ອມ​ຂອດ​ຄຸ້ມ​ຄອງ​ບັນຊາ​ຂອງ​ເຈົ້າໜ້າ​ທີ່​ໃຫ້​ດີກ​ວ່າ​ເກົ່າ.

     10. ຈະ​ຕ້ອງ​ໄດ້​ເພີ່ມ​ມາດ​ຕະ ການ​ບັງຄັບ​ໃຊ້​ລະ ບຽບ​ກົດໝາຍ​ໃຫ້​ເຂັ້ມງວດ.

       11. ຈະ​ຕ້ອງ​ໄດ້​ເອົາ​ໃຈ​ໃສ່ ​ແລະ ​ໃຫ້​ເບິ່ງ​ຄືນ​ການຈັດ​ວາງ​ຜັງ​ເມືອງ​ໃຫ້​ສອດຄ່ອງ​ກັບ​ການ​ຂະ ຫຍາຍຕົວ​​ເສດຖະກິດ-ສັງຄົມ​ຂອງ​ຊາດ.

     12. ຕ້ອງ​ເພີ່ມ​ຈຳນວນ​ເຈົ້າໜ້າ ​ທີ່​ຮັກສາ​ຄວາມ​ສະຫງົບ ກໍ​ຄື​ເຈົ້າ ໜ້າ​ທີ່​ຈະລາຈອນ​ໃຫ້​ພຽງພໍ ​ແລະ ມີ​ຄຸນ​ນະພາ​ບ ​ແລະ 13. ​ແມ່ນ​ຈະ​ຕ້ອງ​ໄດ້​ເພີ່ມ​ທະວີ​ກົນ​ໄກ​ປະສານ​ງານ​ລະຫວ່າງ​ພາກສ່ວນ​ກ່ຽວ ຂ້ອງ​ຕ່າງໆ​ໃຫ້​ກົມກຽວ ​ແລະ ດີ​ຂຶ້ນ.

     ຕາມ​ຂໍ້​ມູນ​ຂອງ​ກະຊວງ​ໂຍທາ​ທິການ ​ແລະ ຂົນ​ສົ່ງ ​ໃຫ້​ຮູ້​ວ່າ: ​ໄລ່​ມາ​ຮອດ​ປີ 2012 ທົ່ວ​ປະ​ເທດ​ມີ​ພາ ຫະນະ​ທີ່​ໄດ້​ຂຶ້ນທະບຽນ​ນຳ​ໃຊ້​ທັງ​ໝົດ 1.288.700 ຄົນ ​ເພີ່ມ​ຂຶ້ນຈາກ​ປີ 2011 19,15%, ​ໃນ​ນັ້ນ ລົດຈັກ​ກວມ​ເອົາ 79% ຂອງ​ຈຳນວນ​ພາ ຫະນະ​ດັ່ງກ່າວ ​ແລະ ຖ້າ​ທຽບ​ໃສ່​ໄລຍະ​ເສັ້ນທາງ​ຂອງ​ທົ່ວ​ປະ​ເທດ​ຍາວ 21.200 ກວ່າ​ກິ​ໂລ​ແມັດ ນັ້ນ​ແມ່ນ​ສະ​ເລ່ຍ​ແລ້ວ​ກິ​ໂລ​ແມັດ​ໜຶ່ງ​ຈະ​ມີ​ພາຫະນະ​ນຳ​ໃຊ້​ຢູ່ 60 ກວ່າ​ຄັນ. ສະ​ເພາະ​ຢູ່​ນະຄອນຫລວງ​ວຽງ​ຈັນ​ມີ​ຈຳນວນ​ພາຫະນະ​ທັງ​ໝົດ 535.500 ກວ່າ​ຄົນ ​ແລະ ຖ້າ​ທຽບ​ໃສ່​ໄລຍະ​ທາງ​ໃນ​ເທສະ​ບານ​ຂອງ​ນະຄອນຫລວງ​ຍາວ​ປະ ມານ 500 ກວ່າ​ກິ​ໂລ​ແມັດ ​ແມ່ນ​ກິ​ໂລ​ແມັດ​ໜຶ່ງ​ຈະ​ມີ​ພາຫະນະ​ຫລາຍ​ກວ່າ 1.000 ຄັນ. ດັ່ງນັ້ນ ຈຶ່ງ​ເຫັນ​ວ່າ​ບາງ​ຈຸດ​ອາດ​​ເກີດ​ສະພາບ​ລົດ​ແອ​ອັດ ​ແລະ ຕິດ​ຂັດ​ໃນ​ໂມງ​ເຂົ້າ ການ-​ເລີກ​ການ ​ແລະ ​ໃນ​ຂະນະ​ດຽວ​ກັນນັ້ນ,ຜູ້​ຂັບ​ຂີ່​ມີ​ໃບ​ອະນຸ ຍາດ​ຂັບ​ຂີ່​ກວມ​ເອົາ​ພຽງ 40% ​ແລະ ສິ່ງ​ນີ້​ໄດ້​ກາຍ​ເປັນ​ປັດ​ໄຈ​ເຮັດ​ໃຫ້ການ​ສັນຈອນ​ແອ​ອັດ ​ແລະ ​ເກີດ​ອຸປະຕິ​ເຫດ​ຫລາຍ​ຂຶ້ນ ​ເຊິ່ງມັນ​ຮຽກຮ້ອງ​ໃຫ້​ທຸກ​ຊັ້ນຄົນ​ໃນ​ທົ່ວ​ສັງຄົມ​ຈົ່ງ​ຮ່ວມ​ແຮງ​ຮ່ວມ​ໃຈ​ກັນ​ໃນ​ການ​​ແກ້​ໄຂ​ສະພາບ​ຫຍໍ້​ທໍ້​ດັ່ງກ່າວ.