ພິທີວາງສີລາລຶກໂຄງການຂະຫຍາຍອາຄານຜູ້ໂດຍສານສະໜາມບິນສາກົນວັດໄຕ
ໄດ້ມີຂຶ້ນໃນວັນທີ 28 ທັນວານີ້, ຢູ່ສະໜາມບິນດັ່ງກ່າວ ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ດຣ.
ບຸນຈັນ ສິນທະວົງ ລັດຖະມົນຕີວ່າການກະຊວງ ໂຍທາທິການ ແລະ ຂົນສົ່ງ, ມີທ່ານ ເກະອິຊິ ອິຊິ
ລັດຖະມົນຕີວ່າການກະຊວງທີ່ດິນພື້ນຖານໂຄງລ່າງຂົນສົ່ງ ແລະ ທ່ອງທ່ຽວ ປະເທດຍີ່ປຸ່ນ.
ທ່ານລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ໄດ້ກ່າວໃນພິທີວ່າ: ລັດຖະບານ ສປປ ລາວ ໄດ້ສຸມທຶນຮອນຂອງຕົນເຂົ້າໃສ່ການພັດທະນາຂະແໜງການບິນພົນລະເຮືອນ ເປັນຕົ້ນ ການລົງທຶນພັດທະນາພື້ນຖານໂຄງລ່າງ ແລະ ສິ່ງອຳນວຍຄວາມສະດວກຕ່າງໆເຊັ່ນ: ເຮືອບິນ, ສະໜາມບິນ, ລະບົບ
ການຈະລາຈອນທາງອາກາດ, ການຮັບປະກັນດ້ານຄວາມປອດໄພການບິນ ລວມເຖິງການພັດທະນາບຸກຄະລາກອນຮັບໃຊ້ໃນວຽກງານດັ່ງກ່າວ ແລະ ກໍໄດ້ຮັບການຮ່ວມມືຊ່ວຍເຫລືອຈາກຫລາຍປະເທດເພື່ອນມິດ ແລະ ສາກົນຄື:
ໃນໄລຍະຜ່ານມາ,
ລັດຖະບານຍີ່ປຸ່ນ ກໍໄດ້ໃຫ້ການຊ່ວຍເຫລືອທາງດ້ານງົບປະມານ ເປັນຈຳນວນບໍ່ໜ້ອຍເຊັ່ນ:
ໂຄງການກໍ່ສ້າງຫໍບັນຊາການບິນ ແລະ ສູນດັບເພີງໃນປີ
1996, ໂຄງການກໍ່ສ້າງອາຄານຜູ້ໂດຍສານສາກົນ ໃນປີ
1999 ແລະ ໂຄງການຂະຫຍາຍລານຈອດຂອງສະໜາມບິນສາກົນວັດໄຕ
ແລະ ກໍ່ສ້າງອາຄານກຽດຕິຍົດ ໃນປີ
2012, ມາຮອດປີ 2015 ລັດຖະບານຍີ່ປຸ່ນ ໄດ້ໃຫ້ການຊ່ວຍເຫລືອໂຄງການຂະຫຍາຍອາຄານຜູ້ໂດຍສານສະໜາມບິນສາກົນວັດໄຕ
ໃນມູນຄ່າ 7.530 ລ້ານກວ່າເຢັນ (ສະກຸນເງິນຍີ່ປຸ່ນ) ຫລື ປະມານ 61 ລ້ານໂດລາສະຫະລັດ, ເຊິ່ງຈະໃຊ້ເວລາກໍ່ສ້າງ 32 ເດືອນ, ປັດຈຸບັນ ເນື່ອງຈາກວ່າຈຳ ນວນຜູ້ໂດຍສານຂອງສະໜາມບິນສາກົນວັດໄຕ
ເພີ່ມຂຶ້ນຢ່າງຕໍ່ເນື່ອງ ຈາກ 520.000 ຄົນ ໃນປີ
2011 ມາເປັນ 1 ລ້ານກວ່າຄົນ ໃນປີ
2015, ເຊິ່ງເຫັນວ່າມີການເພີ່ມຂຶ້ນເທົ່າຕົວ ແລະ ຄາດວ່າ ໃນປີ
2028 ຈະມີຜູ້ໂດຍສານປະມານ 2,8 ລ້ານຄົນ. ເນື່ອງຈາກການຂະຫຍາຍຕົວທາງດ້ານເສດຖະກິດ-ສັງຄົມ ແລະ ການເຂົ້າເປັນປະຊາຄົມເສດຖະກິດອາຊຽນ, ພ້ອມນີ້ ໃນປີ
2016 ສປປ ລາວ
ຍັງຈະເປັນເຈົ້າພາບຈັດກອງປະຊຸມສຸດຍອດອາຊຽນນຳອີກ.
ທ່ານລັດຖະມົນຕີວ່າການ ກ່າວວ່າ: ພາຍຫລັງການກໍ່ສ້າງສະໜາມບິນສາກົນວັດໄຕແຫ່ງນີ້ສຳເລັດ ຈະສາມາດອຳນວຍຄວາມສະດວກໃຫ້ການດຳເນີນວຽກງານການບິນໃຫ້ນັບມື້ຫລາຍຂຶ້ນກວ່າເກົ່າ, ພ້ອມທັງເປັນການພັດທະນາເສດຖະກິດ-ສັງຄົມຂອງລາວໃຫ້ນັບມື້ເຂັ້ມແຂງຂຶ້ນເລື້ອຍໆ, ໂດຍສະເພາະ ທາງດ້ານການຄ້າ, ການທ່ອງທ່ຽວ ແລະ
ການລົງທຶນຈາກຕ່າງປະເທດ. ນອກຈາກນີ້ ການບໍລິການດ້ານການບິນ ຖືເປັນເສັ້ນທາງຄົມມະນາຄົມທີ່ສຳຄັນແກ່ການພັດທະນາປະເທດ ແລະ ການຕິດຕໍ່ເຊື່ອມໂຍງສາກົນ.
No comments:
Post a Comment