ວັນທີ
28 ທັນວານີ້, ສະພາການຄ້າ ແລະ ອຸດສາຫະກຳແຫ່ງຊາດໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານຂອງຕົນປະຈຳປີ
2015 ແລະ
ການພັດທະນາແຜນຍຸດທະສາດເພື່ອກຽມພ້ອມເຂົ້າສູ່ປະຊາຄົມເສດຖະກິດອາຊຽນຂຶ້ນທີ່ໂຮງແຮມລາວພລາຊາ ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ສີສະຫວາດ ທິຣະວົງ
ປະທານສະພາການຄ້າ ແລະ ອຸດສາ ຫະກຳແຫ່ງຊາດລາວ, ມີຕົວແທນສະພາການຄ້າ ແລະ ອຸດສາຫະກຳນະຄອນຫຼວງ ແລະ ແຂວງຕ່າງໆເຂົ້າຮ່ວມເປັນຈຳນວນຫຼາຍ.
ທ່ານປະທານກ່າວຕໍ່ທີ່ປະຊຸມວ່າ: ໄລຍະປີ 2009 ຄະນະບໍລິຫານງານສະພາການຄ້າ ແລະ ອຸດສາຫະກຳແຫ່ງຊາດຊຸດທີ
3 ໄດ້ຮັບຮອງແຜນຍຸດທະສາດຂອງຕົນເພື່ອສ້າງຄວາມເຂັ້ມແຂງໃຫ້ສະພາການຄ້າ
ແຕ່ລະຂັ້ນ, ລວມເຖິງສະມາຄົມ, ກຸ່ມທຸລະກິດຕ່າງໆ ແລະ
ມີຜົນສຳເລັດຫຼາຍດ້ານຄື: ການເຕົ້າໂຮມບັນດາບໍລິສັດທີ່ມີທືນຈົດທະບຽນຕັ້ງແຕ່ 50 ລ້ານກີບຂຶ້ນໄປເຂົ້າເປັນສະມາຊິກໄດ້ເຖິງ 3000 ບໍລິສັດ, ແຕ່ກໍມີຂໍ້ຄົງຄ້າງ ແລະ ສິ່ງທ້າທາຍຕ່າງ ແລະ ເພື່ອຮອງຮັບແຜນຍຸດທະສາດໄລຍະສັ້ນ ( 2016-2020) ແລະ
ໄລຍະຍາວເຖິງປີ 2030 ໃຫ້ສອດຄ່ອງກັບການເປັນສ່ວນໜຶ່ງຂອງປະຊາຄົມເສດຖະກິດອາຊຽນ AEC, ຊຶ່ງສະພາການຄ້າ ແລະ ອຸດສາຫະກຳແຫ່ງຊາດມີບົດບາດສຳຄັນໃນການສ້າງຄວາມຕື່ນຕົວໃຫ້ແກ່ບັນດາສະມາຊິກທຸລະກິດຂອງຕົນຕໍ່ກັບການກ້າວເຂົ້າ AEC ໂດຍການເຜີຍແຜ່ຂໍ້ມູນທີ່ຈຳເປັນກ່ຽວກັບ AEC ແລະ ການສະໜອງການບໍລິການທີ່ກ່ຽວພັນໃຫ້ກັບສະມາຊິກ,ເປັນຕົ້ນແມ່ນການສ້າງຄວາມອາດສາມາດໃນການແຂ່ງຂັນໃຫ້ແກ່ວິສາຫະກິດຂອງລາວ, ການສ້າງຄວາມເຂັ້ມແຂງດ້ານຜະລິດຕະພາບ
ແລະ ການປັບປຸງຄຸນນະພາບຜະລິດຕະພັນຕ່າງໆໃຫ້ມີຄວາມພ້ອມໃນໄລຍະຍາວຂອງພາກເອກະຊົນ, ຊຶ່ງສະພາການຄ້າ ແລະ ອຸດສາຫະກຳແຫ່ງຊາດຈະຕ້ອງໄດ້ສ້າງວິໄສທັດ, ພ້ອມດ້ວຍຍຸດທະສາດໄລຍະສັ້ນ ແລະ ໄລຍະຍາວໃນການພັດທະນາພາກເອກະຊົນຈົນເຖິງປີ 2030 ແລະ ເຊື່ອໝັ້ນວ່າກອງປະຊຸມຄັ້ງນີ້ຈະເຮັດໃຫ້ການປັບປຸງແຜນຍຸດທະສາດຂອງສະພາການຄ້າ ແລະ ອຸດສະຫະກຳແຫ່ງຊາດລາວສອດຄ່ອງກັບແຜນພັດທະນາເສດຖະກິດ-ສັງຄົມ, ທັງເປັນການສະແດງເຖິງຜົນງານຂອງພາກທຸລະກິດປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດດີຂື້ນ.
No comments:
Post a Comment