ນະຄອນຫລວງວຽງຈັນເພີ່ມທະວີ ໂຄສະນາຜົນຮ້າຍຂອງຢາເສບຕິດໃນຫມູ່ນັກຮຽນ-ນັກສຶກສາ

    ຄະນະກຳມະການກວດກາ ແລະ ຄວບຄຸມຢາເສບຕິດ ນະຄອນຫລວງວຽງຈັນ, ຈະສຸມໃສ່ການໂຄສະນາ ເຜີຍແຜ່ຜົນຮ້າຍ ຂອງຢາເສບຕິດໃນ ກຸ່ມນັກຮຽນ-ນັກສຶກສາ ໃຫ້ຫລາຍ ແລະ ກວ້າງຂວາງກວ່າເກົ່າ, ຫລັງ ຈາກ ເຫັນວ່າຄົນກຸ່ມດັ່ງກ່າວແມ່ນ ເປົ້າໝາຍໃນການຕົກເປັນເຫຍື່ອຂອງຂະບວນການຄ້າຂາຍຢາເສບຕິດ.

    ຄະນະກຳມະການດັ່ງກ່າວລະບຸວ່າ:ເພື່ອໃຫ້ບັນຫາຢາເສບຕິດໃນສັງຄົມຫລຸດໜ້ອຍຖອຍລົງເທື່ອລະກ້າວ ນັ້ນ ຊຶ່ງກ່ອນອື່ນ ຈະຕ້ອງໄດ້ສຸມໃສ່ການໂຄສະນາ ແລະ ສ້າງກິດຈະກຳໃຫ້ມວນຊົນໄດ້ຮູ້ເຖິງ ຜົນຮ້າຍກໍຄື ໄພອັນຕະລາຍຂອງຢາເສບ ຕິດໂດຍ ສະເພາະແມ່ນກຸ່ມນັກຮຽນ-ນັກສຶກສາເຊິ່ງແມ່ນກຸ່ມຄົນທີ່ຂະບວນ ການຄ້າ ຂາຍຢາເສບຕິດພະຍາຍາມຍົວະ ຍົງເພື່ອໃຫ້ຕົກ ເປັນເຫຍື່ອຂອງພວກເຂົາ ແລະ ກ້າວສູ່ການເປັນນັກເລງ ອັນຕະພານ ກໍຄວາມບໍ່ສະຫງົບໃນສັງຄົມ ເຊັ່ນ: ການປຸ້ນຈີ້-ຊິງຊັບ, ຂີ້ລັກງັດແງະ ແລະ ປະກົດການຫຍໍ້ທໍ້ ອື່ນໆ.ຜ່ານການເກັບກຳຂໍ້ມູນສະຖິຕິຜູ້ຕິດຢາເສບຕິດຢູ່ນະຄອນຫລວງວຽງຈັນໃນປີ ຜ່ານມາພົບວ່າ:ມີຜູ້ຕິດຢາ ເສບຕິດປະເພດຢາບ້າປະມານ 7 ພັນກວ່າຄົນ(ຍິງ 500 ກວ່າຄົນ) ໃນນັ້ນຫລາຍກວ່າເຄິ່ງ ໜຶ່ງຂອງຜູ້ທີ່ຕິດຢາເສບຕິດແມ່ນນັກຮຽນ-ນັກສຶກສາ.

       ຄະນະກຳມະການດັ່ງກ່າວ ໃຫ້ຮູ້ວ່າ: ໃນໜຶ່ງປີຜ່ານມາໄດ້ມີການເຜີຍແຜ່ຜົນຮ້າຍ ແລະ ໄພອັນຕະລາຍ ຂອງຢາເສບຕິດ ແລະ ວິທີປ້ອງກັນໃຫ້ປະຊາຊົນ, ຊາວໜຸ່ມ, ກຳມະກອນ, ນັກຮຽນ-ນັກສຶກສາໃນ 9 ເມືອງ ຂອງນະຄອນຫລວງວຽງຈັນ ຫລາຍກວ່າ 146 ເທື່ອ, ມີຜູ້ເຂົ້າຮ່ວມ 57 ພັນກວ່າຄົນ, ນອກຈາກນີ້ ໄດ້ສຶກສາ ອົບຮົມກຸ່ມສ່ຽງຫລາຍກວ່າ 1800 ຄົນ.