ປກສ ເມືອງສີສັດຕະນາກມອບລົດຈັກທີ່ຖືກຄົນຮ້າຍລັກຄືນໃຫ້ເຈົ້າຂອງ

         ໃນວັນທີ 28 ກຸມພານີ້ ກອງບັນຊາການ ປກສ ເມືອງສີສັດຕະນາກ ນະ ຄອນຫຼວງວຽງຈັນ ໄດ້ມອບ ລົດຈັກຮອນດາເວບ 100 ສີດຳປອນ ຄືນໃຫ້ເຈົ້າຂອງ ເດີມພາຍຫຼັງທາງເຈົ້າໜ້າທີ່ສາມາດເກັບກູ້ລົດຄັນໄດ້ ກ່າວໄດ້ຈາກຄົນຮ້າຍທີ່ລັກໄປ ຊຶ່ງພິທີໄດ້ຈັດຂື້ນຢູ່ຫ້ອງການ ປກສ ເມືອງ ດັ່ງກ່າວ.

           ເຈົ້າໜ້າທີ່ ປກສ ເມືອງ ໃຫ້ຮູ້ວ່າ: ລົດຈັກຄັນດັ່ງກ່າວ ແມ່ນເປັນລົດຂອງ ນາງ ມະໄລພອນ ຢ່າທໍ່ຕູ້ ອາຍຸ 32 ປີ ອາຊີບ ນັກທຸລະກິດ ຢູ່ບ້ານດົງນາໂຊກເໜືອ ເມືອງສີໂຄດຕບອງ ນະຄອນຫຼວງວຽງຈັນ ຊຶ່ງຄົນ ຮ້າຍໄດ້ລັກ ໄປໃນວັນທີ 12 ທັນ ວາ 2012 ຊຶ່ງຜ່ານການແຈ້ງຄວາມ ແລະ ທາງເຈົ້າໜ້າທີ່ກໍໄດ້ມີການ ຕິດຕາມ ແລະ ການໃຫ້ຂໍ້ມູນຂອງພົນລະເມືອງດີ ໄດ້ຊ່ວຍໃຫ້ເຈົ້າໜ້າທີ່ສາມາດຈັບຕົວຜູ້ຕ້ອງຫາ ໄດ້ຄື: ທ້າວ ຊາປູຊາ ຫຼື ຂຽວ ອາຍຸ 23 ປີ ຢູ່ ບ້ານ ສີບຸນເຮືອງ ເມືອງຈັນທະບູລີ ນະຄອນຫຼວງວຽງຈັນ ໃນວັນທີ 14 ທັນວາ 2012 ຜ່ານມາ.

            ຜູ້ຕ້ອງຫາໄດ້ຮັບສາລະພາບວ່າ: ໄດ້ເຂົ້າໄປລັກຊັບ ແລະ ລົດຈັກຄັນດັ່ງກ່າວຢູ່ພາຍໃນເຮືອນຂອງຜູ້ ເສຍຫາຍແລ້ວ ລົບໜີກ່ອນທີ່ຈະນຳເອົາລົດໄປຕິດຕໍ່ຂາຍໃຫ້ ທ້າວ ພຸດທະວົງ ແລະ ຜ່ານການຊັດທອດດັ່ງກ່າວ ເຈົ້າໜ້າທີ່ ກໍໄດ້ນຳຈັບຕົວທ້າວ

ພຸດທະວົງ ໃນວັນທີ 20 ທັນວາ 2012 ຜ່ານມາໃນຂໍ້ຫາສົມຮູ້ຮ່ວມຄິດ ແລະ ຊື້ຂາຍສິ່ງຂອງທີ່ຜິດກົດໝາຍເພື່ອມາດຳເນີນ ຄະດີ ແລະ ການສືບສວນ-ສອບສວນຮູ້ວ່າ: ຜູ້ຕ້ອງຫາໄດ້ມີການ ພົວພັນກັບກຸ່ມແກ້ງ ແລະ ພັກພວກຫຼາຍຄົນທີ່ເຄື່ອນໄຫວ ລັກລົດຈັກ ແລະ ນຳໄປຂາຍຢູ່ຕ່າງແຂວງຊຶ່ງທາງ ເຈົ້າໜ້າທີ່ກຳລັງສືບຕໍ່ມ້າງກຸ່ມແກ້ງອັນຕະລາຍດັ່ງກ່າວໃຫ້ໄດ້ໂດຍໄວ.

        ເຈົ້າໜ້າທີ່ ປກສ ເມືອງສີສັດຕະນາກ ກ່າວວ່າ: ສະພາບລົດເສຍຍັງເປັນປະກົດການຫຍໍ້ທໍ້ ແລະ ເກີດຂື້ນຢ່າງຕໍ່ເນື່ອງ ຄື: ໃນເດືອນມັງກອນ ຜ່ານມານີ້ ຢູ່ເມືອງສີສັດຕະນາກໄດ້ຮັບແຈ້ງລົດຈັກເສຍຫາຍ ແລ້ວຫຼາຍກ່ວາ 20 ຄັນ ຊຶ່ງລົດທີ່ເສຍສ່ວນໃຫຍ່ຈະເປັນລົດຮອນດາເວບ ແລະ   ກໍເຫັນວ່າການເກັບກູ້ລົດ ທີ່ເສຍຂອງເຈົ້າໜ້າທີ່ຍັງເປັນອຸປະສັກເນື່ອງມາຈາກຂະບວນການລັກລົດຈັກນີ້ ຈະເຮັດເປັນກຸ່ມແກ້ງມີຜູ້ທີ່ຕິດ ຕໍ່ຊື້ຂາຍ ແລະ ຈຳໜ່າຍ ໄປຍັງຕ່າງແຂວງຊຶ່ງທາງເຈົ້າໜ້າທີ່ຈະຕ້ອງໄດ້ເລັ່ງແກ້ໄຂ.