ເຈົ້າຫນ້າທີ່ມອດໄຟເຕືອນໃຫ້ ສັງຄົມມີສະຕິປ້ອງກັນອັກຄີໄພ

       ເຈົ້າໜ້າທີ່ຕ້ານ ແລະ ມອດໄຟນະຄອນຫລວງວຽງຈັນໄດ້ເຕືອນໃຫ້ສັງຄົມຈົ່ງເພີ່ມສະຕິລະມັດລະວັງຕໍ່ການປ້ອງກັນ ອັກຄີໄພທີ່ອາດຈະເກີດຂຶ້ນ, ຫລັງຈາກໃນໄລຍະນີ້ແມ່ນລະດູແລ້ງອາກາດຮ້ອນເອົ້າມັກ ເກີດອັກຄີໄພເຊິ່ງໃນວັນທີ 19 ມີນານີ້ ເວລາປະມານ 8:30 ໂມງ ໄດ້ເກີດອັກຄີໄພຢູ່ເຂດບ້ານຂົວຫລວງ ເມືອງຈັນທະບູລີ ນະຄອນຫລວງວຽງຈັນ ໄຟໄດ້ໄໝ້ຊັ້ນ 3 ຂອງອາຄານບໍລິສັດພອນສະຫວັນຊິບປິງ, ແຕ່ພະນັກງານຂອງບໍລິສັດ ແລະ ເຈົ້າໜ້າທີ່ມອດໄຟສາມາດຊ່ວຍກັນສະກັດກັ້ນ ກະແສໄຟບໍ່ໃຫ້ລຸກລາມເປັນບໍລິເວນກວ້າງໄດ້ເຊິ່ງເຫດການເທື່ອນີ້ແມ່ນເກີດຈາກການໄຕ້ທູບທຽນບູຊາ ແລະ ກໍ່ໃຫ້ເກີດຜົນ ເສຍຫາຍເລັກໜ້ອຍ.

     ເຈົ້າໜ້າທີ່ຕ້ານ ແລະ ມອດໄຟ ນະຄອນຫລວງວຽງຈັນໃຫ້ຮູ້ວ່າ: ແຕ່ຕົ້ນປີ 2013 ເປັນຕົ້ນມາຢູ່ນະຄອນຫລວງວຽງຈັນ ໄດ້ເກີດອັກຄີໄພຫລາຍເຖິງ 20 ກໍລະນີມີມູນຄ່າເສຍຫາຍຫລາຍຮ້ອຍລ້ານກີບ ໂດຍສາເຫດສ່ວນໃຫຍ່ແມ່ນເກີດຈາກ ໄຟຟ້າລັດວົງຈອນ, ໄຕ້ທູບທຽນບູຊາເຫລົ່ານີ້ເປັນຕົ້ນ. ສະນັ້ນ ເພື່ອຫລີກເວັ້ນຄວາມສູນເສຍດັ່ງກ່າວຈຶ່ງຮຽກຮ້ອງໃຫ້ສັງຄົມ ມີສະຕິຕໍ່ການຊົມໃຊ້ໄຟຟ້າຄວນໝັ່ນກວດກາເບິ່ງສາຍໄຟຟ້າພາຍໃນອາຄານຢ່າງເປັນປົກກະຕິ, ຖ້າຫາກພົບເຫັນສາຍໄຟມີ ການຊຸດໂຊມເກົ່າແກ່ກໍຮີບຮ້ອນປ່ຽນໂດຍໄວ ເພື່ອຮັບປະກັນບໍ່ໃຫ້ເກີດມີການສູນເສຍຍ້ອນອັກຄີໄພຫລຸດໜ້ອຍລົງ.