ໂດຍ: ຂ.ຊານຸບານ
ມື້ນັ້ນວັນທີ 19 ມີນາ 2013ເຊິ່ງເປັນໄລຍະເວລາທີ່ຄະນະຜູ້ແທນສະມາຄົມນັກຂ່າວແຫ່ງ
ສປປ ລາວ ໄດ້ມີໂອກາດຢ້ຽມ ຢາມ ສປ ຈີນ ເພື່ອແລກປ່ຽນບົດ ຮຽນ ແລະ ປະສົບການດ້ານວຽກງານສື່ມວນຊົນຕາມສັນຍາຮ່ວມມືຂອງສະມາຄົມນັກຂ່າວສອງປະເທດ
ລາວ ແລະ ສປ ຈີນ ທີ່ເຄີຍໄດ້ປະຕິບັດກັນມາບົນຈິດໃຈຄູ່ຮ່ວມມືຍຸດທະສາດຊ່ວຍເຫລືອເຊິ່ງກັນ
ແລະ ກັນ ເພື່ອພ້ອມກັນກ້າວຂຶ້ນໃຫ້ທັນຍຸກສະໄໝ ແລະ ໂອກາດດັ່ງກ່າວ, ຄະ ນະນັກຂ່າວພວກເຮົາກໍໄດ້ຮັບກຽດໄປຢ້ຽມຊົມສິ່ງມະ
ຫັດສະຈັນກຳແພງເມືອງຈີນ ຫລື ເອີ້ນ ວ່າ: “ກຳແພງຍັກ” ທີ່ຕັ້ງຢູ່ຫ່າງຈາກນະຄອນຫລວງປັກກິ່ງໄປທາງທິດເໜືອປະມານ
60 ກວ່າກິໂລແມັດ, ທີ່ຄະນະພວກເຮົາຕ້ອງໃຊ້ເວລາເດີນທາງດ້ວຍລົດໂອໂຕຫລາຍກວ່າຊົ່ວໂມງເຄິ່ງ
ມັນເປັນໄລຍະເວລາທີ່ໂຊກດີ ແລະ ຫລາຍຄົນຢູ່ບັນດາປະເທດທີ່ມີອາກາດຮ້ອນ
ໃຜໆກໍຢາກພົບເຫັນນັ້ນແມ່ນຫິມະ. ພໍຄະນະພວກເຮົາຈະກ້າວໄປເຖິງເຂດກຳແພງຍັກປະມານ
10-20 ກິໂລແມັດ ກໍຈະເຫັນຫິມະຕົກລົງມາເປັນໄລຍະໄລຍະຢ່າງງົດງາມ ຕົ້ນໄມ້ສົນແຄມທາງຄ່ອຍໆປົກຫຸ້ມໄປດ້ວຍສີຂາວຈົນກະໂຕເພື່ອນສະຫາຍຈີນຜູ້ພາທາງພວກຂ້າພະເຈົ້າເອງກໍຕ້ອງອອກປາກມາວ່າ:
ມັນເປັນ
ໂອກາດທີ່ສວຍງາມ ແລະ ໂຊກດີຫລາຍທີ່ພວກເຮົາໄດ້ມາພົບພໍ້ຫິມະຕົກໃນໄລ
ຍະລະດູບານໃໝ່ກ້າວມາເຖິງ, ຕາມປົກກະຕິແລ້ວ ແມ່ນຈະເຫັນໄດ້ຍາກ ເພາະຫິມະສ່ວນຫລາຍຈະຕົກຢູ່ໃນໄລຍະລະດູໜາວ
ໂດຍສະເພາະໄລຍະເດືອນທັນວາ ແລະ ເດືອນມັງກອນ-ກຸມພາເທົ່ານັ້ນ. ພໍຄະນະພວກເຮົາໄປເຖິງເຂດທ່ອງທ່ຽວກຳແພງຍັກ
ກໍເກືອບຈະເປັນເວລາທ່ຽງວັນ, ແຕ່ຫິມະກໍຍິ່ງເພີ່ມທະວີຕົກລົງມາຢ່າງບໍ່ຂາດໄລຍະ,
ພໍພວກເຮົາກ້າວລົງຈາກອາຍອຸ່ນຂອງລົດ ຈຶ່ງເຫັນວ່າອາກາດຂົງເຂດນັ້ນມີຄວາມໜາວເຢັນພຽງໃດ,
ແຕ່ຄະນະພວກເຮົາໃຜໆກໍຊື່ນຊົມກັບຄວາມໜາວກັບຝຸ່ນລະອອງຂອງຫິມະທີ່ຕົກລົງມາຢ່າງບໍ່ຂາດສາຍ,
ສີຂຽວຂອງຕົ້ນໄມ້ໃບຫຍ້າ ແລະ ຫລັງຄາສີແດງຂອງອາ ຄານບ້ານເຮືອນພ້ອມຖະໜົນຫົນ
ທາງທີ່ກຽມຈະກ້າວຂຶ້ນສູ່ຍອດສູງຂອງກຳແພງຍັກໄດ້ປ່ຽນເປັນສີຂາວໄປເປັນສ່ວນຫລາຍ,
ແຕ່ຄະນະພວກເຮົາໃຜໆກໍບໍ່ໄດ້ເອົາຫົວຊາກັບຄວາມໜາວເຢັນດັ່ງກ່າວ, ແຂ່ງຂັນກັນບັນທຶກເອົາຮູບພາບ
ແລະ ຄວາມມະຫັດ ສະຈັນຂອງກຳແພງເມືອງຈີນອັນເປັນສິ່ງມະຫັດສະຈັນນີ້ໄວ້ຈົນນັບບໍ່ຖ້ວນ,
ຄະນະພວກເຮົາໄດ້ຮ່ວມກັນຖ່າຍຮູບຢູ່ຕໍ່ໜ້າອະ ນຸສາວະລີຫີນສີລາຂາວກ້ອນໜຶ່ງສູງປະມານ
2 ແມັດ ປາຍເປັນຮູບລັກສະນະ 4 ຫລ່ຽມກົມ ກວ້າງປະມານແມັດກວ່າ ເຊິ່ງເບື້ອງ ໜ້າຂອງມັນໄດ້ສະຫລັກໂຕອັກ
ສອນຈີນ ເຊິ່ງເປັນຄຳເວົ້າຂອງປະທານ ເໝົາເຈີຕຸງ ທີ່ມີຄວາມໝາຍຢ່າງເລິກເຊິ່ງໄວ້ວ່າ:
“ຖ້າຜູ້ໃດມາຮອດເຂດກຳແພງຍັກແລ້ວ ແຕ່ຫາກບໍ່ປີນຂຶ້ນກຳແພງດັ່ງ ກ່າວ ຜູ້ນັ້ນຈະບໍ່ແມ່ນຄົນທີ່ກ້າ
ຫານ”. ຈາກຄຳເວົ້າດັ່ງກ່າວກໍເຮັດໃຫ້ຄະນະພວກເຮົາເພີ່ມກຳລັງໃຈ່ຜ່ານຜ່າຫິມະ
ແລະ ລົມເຢັນແຂ່ງຂັນກັນປີນຂັ້ນໄດອັນສູງຊັນຂອງກຳແພງຍັກທີ່ຄົດໆລ້ຽວໆໄປຕາມສາຍພູສູງດ້ວຍຄວາມມານະອົດທົນ,
ແຕ່ຖັນແຖວກຳລັງປີນພູຂອງພວກເຮົາກໍຄ່ອຍໆຫ່າງອອກຈາກກັນ ແລະ ບາງຄົນກໍຕ້ອງຍອມຈຳນົນຕໍ່ການທ້າທາຍກັບຄວາມສູງຊັນຂອງສິ່ງມະຫັດສະຈັນດັ່ງກ່າວ,
ແຕ່ບາງຄົນກໍກາຍເປັນຜູ້ “ແຊ໊ມ ປຽນ” ຂອງຄະນະນັກຂ່າວພວກເຮົາ ແລະ ສົມກັບເປັນຜູ້ກ້າຫານອີ່ຫລີ,
ແຕ່ຄວາມທ້າທາຍໃໝ່ພັດມີຂຶ້ນມາ ໃນເມື່ອພວກເຮົາຈະຕ້ອງໄດ້ໄຕ່ລົງມາຈາກຄວາມສູງດັ່ງກ່າວ
ພາຍຫລັງຫິມະຕົກລົງມາກອງເຕັມພັກຂັ້ນໄດ ແລະ ເກີດມີຄວາມມື່ນ, ແຕ່ຜູ້ປີນພູພວກເຮົາກໍຕ້ອງໄດ້ພະຍາຍາມສາວລົງມາຕາມຮາວພັກຂັ້ນໄດດ້ວຍຄວາມລະມັດລະວັງຈົນເກືອບຊົ່ວໂມງ,
ໃນທີ່ສຸດກໍເກືອບຈະຮອດບ່າຍຄະນະພວກເຮົາກໍສາມາດລົງມາຮອດບ່ອນນັດໝາຍດ້ວຍຄວາມປອດໄພ.
ກຳແພງເມືອງຈີນສິ່ງມະຫັດສະຈັນຂອງໂລກແຫ່ງນີ້
ໄດ້ຮັບການສ້າງຕັ້ງຂຶ້ນຕະຫຼອດໄລຍະສະຕະວັດທີ 5 ເຖິງສະຕະ ວັດທີ 16 ຍາວປະມານ
6.700 ກິໂລແມັດ, ທີ່ແກ່ຍາວແຕ່ທິດຕາເວັນອອກຫາທິດຕາເວັນຕົກຂອງຈີນ ຜ່ານເຂດທະເລຊາຍ,
ພູ ຜາປ່າໄມ້ ບາງບ່ອນເປັນພູສູງກວ່າ 1.000 ແມັດ ທຽບໃສ່ລະດັບນ້ຳ ທະເລ. ເບິ່ງແລ້ວປຽບເໝືອນຮູບໂຕມັງກອນ
ເພື່ອເປັນກຳແພງປ້ອງກັນການບຸກໂຈມຕີຂອງສັດຕູພາຍນອກ ແລະ ຊົນເຜົ່າສ່ວນໜ້ອຍອື່ນໆມາຈາກຕ່າງແດນ,
ໃນນັ້ນ ບາງຍ່ານຂອງກຳແພງຍັກໄດ້ສ້າງຂຶ້ນໃນສະຕະວັດທີ 5 ແຕ່ອັນພົ້ນເດັ່ນແມ່ນສະໄໝເຈົ້າຊີວິດທຳອິດຂອງຈີນຄື
ຈິນຊີຮົງເຕ ເຊິ່ງຫລາຍຄົນກໍເຄີຍໄດ້ເບິ່ງຮູບເງົາກ່ຽວກັບເລື່ອງນີ້ມາແລ້ວ.
ກຳແພງເມືອງຈີນມີຄວາມສູງສະເລ່ຍປະມານ 7 ແມັດ ຈາກໜ້າດິນ, ໜ້າກວ້າງຂອງກຳແພງເບື້ອງເທິງຈະປະມານ
5-6 ແມັດ ໂດຍຄາດຄະເນແລ້ວປະມານ 70% ຂອງພົນລະເມືອງຈີນເວລານັ້ນແມ່ນໄດ້ປະກອບສ່ວນເຂົ້າໃນການກໍ່ສ້າງກຳແພງມະຫັດສະຈັນດັ່ງກ່າວ
ແລະ ບໍ່ພຽງແຕ່ເທົ່ານັ້ນ, ກຳແພງຍັກຍັງເປັນສິ່ງຢືນຢັນເຖິງປະຫວັດ ສາດອັນຍາວນານ,
ວັດທະນະ ທຳອັນຫລາຍສີສັນ ແລະ ການພັດທະນາຂອງປະເທດຈີນຕະ ຫລອດໄລຍະ 2.400 ປີຜ່ານມາ.
ດັ່ງນັ້ນ ຖ້າໃຜຫາກຢາກເປັນຜູ້ກ້າຫານໄດ້ສຳຜັດກັບສິ່ງມະຫັດສະຈັນແຫ່ງນີ້ ກໍອາດໄປທ່ອງທ່ຽວໄດ້ທຸກໆໂອ
ກາດ.
No comments:
Post a Comment