ສະຫາຍເລຂາທິການໃຫຍ່ຕ້ອນຮັບຄະນະຜູ້ແທນພັກກອມມູນິດປອກຕຸຍການ

           ສະຫາຍ ຈູມ​ມາລີ ໄຊ​ຍະ​ສອນ, ເລຂາທິການໃຫຍ່ຄະນະບໍລິຫານງານສູນ ກາງພັກ, ປະທານປະ ເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າ ຢ້ຽມຂ່ຳ ນັບຂອງສະຫາຍ ​ເຮ​ໂຣນີ​ໂມ ​ເດ ຊູ​ຊາ (Jeronimo de Sousa), ເລຂາທິການ​ໃຫຍ່ ພັກ​ກອມ​ມູນິດ​ ປອກຕຸຍ​ການ ພ້ອມ​ຄະນະ​ໃນ​ຕອນແລງວັນ​ທີ 28 ກຸມພາ 2013 ທີ່ ຫ້ອງ​ວ່າການ​ສູນ​ກາງ​ພັກ​ນະຄອນ ຫລວງວຽງຈັນ ໃນໂອກາດທີ່ສະຫາຍ ແລະ ຄະນະ ພວມດຳເນີນການຢ້ຽມຢາມ ສປປ ລາວ ເປັນເວລາ 5 ວັນ (25/2-1/3/20123).

            ໂອກາດນີ້ ສະຫາຍ ຈູມມາລີ ໄຊຍະສອນ ໄດ້​ສະແດງຄວາມຊົມ​ເຊີຍ ແລະ  ​ ຕີ​ລາຄາ​ສູງ ຕໍ່​ການ​ມາ​ຢ້ຽມຢາມ ສປປ ລາວ ຂອງ​ຄະນະ​ຜູ້​ແທນ​ພັກກອມມູນິດ ປອກຕຸຍການໃນຄັ້ງນີ້ ຊຶ່ງ​ເປັນ​ການ​ປະກອບສ່ວນ​ສຳຄັນ​ເຂົ້າ​ໃນ​ການເພີ່ມພູນສ້າງ​ສາຍ​ພົວພັນທີ່​ມີ​ມູນ​ເຊື້ອລະຫວ່າງ ​ພັກ ​ປປ ລາວ ແລະ ພັກກອມມູນິດ ປອກຕຸຍການ. ພ້ອມທັງໄດ້ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມໃຫຍ່ຄັ້ງທີ 19 ຂອງພັກປອກຕຸຍ ການ ໃນທ້າຍເດືອນພະຈິກ 2012 ຜ່ານມາ ໂດຍເລືອກເອົາສະຫາຍ ເຮ​ໂຣນີ​ໂມ ​ເດ ຊູ​ຊາ ເປັນເລຂາທິການໃຫຍ່ພັກກອມມູນິດປອກຕຸຍການອີກວາລະ ໜຶ່ງ.

        ສະຫາຍເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ຍັງໄດ້ແຈ້ງໃຫ້ແຂກຊາບ ກ່ຽວກັບ ສະພາບການທີ່ພົ້ນເດັ່ນ ຂອງ ພັກ-ລັດ ລາວ ໂດຍສະເພາະ ບັນດາຄາດໝາຍສູ້ຊົນ ຂອງພັກ ປປ ລາວ ໃນປະຈຸ ບັນຕາມມະຕິຂອງກອງປະຊຸມໃຫຍ່ຄັ້ງທີ IX ຂອງພັກ ປປ ລາວ; ແຈ້ງໃຫ້ຄະນະຊາບ ກ່ຽວກັບການເຄື່ອນ ໄຫວຕ່າງປະເທດທີ່ພົ້ນເດັ່ນໃນປີ 2012 ຜ່ານມາ. ພ້ອມທັງໄດ້ຕີລາຄາສູງ ຕໍ່ຜົນການພົບປະເຮັດວຽກນຳກັນ ລະຫວ່າງສອງພັກ ແລະ ເຊື່ອໝັ້ນວ່າ: ການພົວພັນຮ່ວມມື ແລະ ການສະໜັບສະໜູນເຊິ່ງກັນ ແລະ ກັນ ລະ ຫວ່າງ ພັກ ປປ ລາວ ແລະ ພັກກອມມູນິດ ປອກຕຸຍການ ຈະສືບຕໍ່ຂະຫຍາຍຕົວ ແລະ ແຕກດອກອອກຜົນ.

ສະຫາຍ ​ເຮ​ໂຣນີ​ໂມ ​ເດ ຊູ​ຊາ ​ກໍ ໄດ້​ສະ​ແດງ​ຄວາມດີໃຈ ທີ່ໄດ້ມີ ໂອກາດມາຢ້ຽມຢາມລາວ ແລະ ໄດ້ ຮັບຮູ້ ເຂົ້າໃຈແຈ້ງກວ່າເກົ່າກ່ຽວກັບມູນເຊື້ອການຕໍ່ສູ້ທີ່ຍາວນານ, ພິລາດອາດຫານ ແລະ ຜົນ ສຳເລັດຮອບ ດ້ານ ທີ່ ສປປ ລາວ ຍາດມາໄດ້ພາຍໃຕ້ການນຳພາຂອງພັກ ປປ ລາວ ໃນຕະຫຼອດໄລຍະຜ່ານມາ. ສະຫາຍໄດແຈ້ງ ສະພາບໂດຍຫຍໍ້ຂອງປະເທດປອກຕຸຍການ ກໍຄືສະພາບການຂອງພັກກອມມູນິດປອກຕຸຍການ ໃຫ້ສະຫາຍ ເລຂາທິການໃຫຍ່ຈູມມາລີ ໄຊຍະສອນ ຊາບ; ໄດ້ສະແດງຄວາມຂອບໃຈຢ່າງຈິງໃຈຕໍ່ການຕ້ອນຮັບອັນອົບ ອຸ່ນຂອງບັນດາສະຫາຍລາວ. ພ້ອມທັງໄດ້ອວຍພອນໃຫ້ສະຫາຍເລຂາທິການໃຫຍ່ຄະນະບໍລິຫານງານສູນກາງ ພັກ ປປ ລາວ ຈົ່ງສືບຕໍ່ນຳພາປະຊາຊົນກ້າວຂຶ້ນຕາມທິດທາງທີ່ກຳນົໄວ້.